¿Kʼusi ora chlik li paskʼop ta Armagedone?

«Laj quil yepal oy bu talemic ta jujun banomil ti oyic ta mucʼtiquil lumetique, ti jujutos ti stsʼunobalique, ti jujutos ti scʼopique, ti oyic ta jujun jteclume. Ti yepal noʼox ta jʼechʼel ti muʼyuc buchʼu xchap yuʼun cʼu yepalique, [...] jaʼic ti buchʼutic cuch yuʼun [«li tsots vokole», NM].» (APOCALIPSIS 7:9, 14, Ch)

TA SKOJ li kʼusitik chkʼot ta pasele chakʼ ta ilel ti poʼot xa li Armagedone. ¿Kʼuxi jnaʼtik?

Li avie oy xa epal miyon krixchanoetik ti chtunik ta stojolal Jeovae xchiʼuk ti chakʼ ta xkuxlejalik li mantaletik ta sventa talelal chal Vivliae. Akʼo mi jelel stsʼunbalik, skʼopik xchiʼuk li slumalike jun noʼox yoʼonton skʼanoj sbaik kʼuchaʼal yutsʼ yalal sbaik, yuʼun koltabilik yuʼun Dios. Taje jaʼ noʼox chkʼot ta pasel ta stojolal li yajrextikotak Jeovae (Juan 13:34, 35).

Li Satanase poʼot xa stsob yajsoltarotak xchiʼuk chbat stsak ta tsatsal kʼop li jteklum ti mu kʼusi chale xchiʼuk ti muʼyuk spojobbail yilele (Ezequiel 38:8-12; Apocalipsis 16:13, 14, 16). ¿Kʼu yuʼun xuʼ jchʼuntik ta melel ti jech chkʼot ta pasele? Li Vivliae chakʼ ta ilel jaytosuk kʼusitik chkʼot ta pasel ti jaʼ tskoltautik snaʼel kʼusi ora chlik li paskʼop ta Armagedone. Li kʼusitik taje ep xa yakal chkiltik chkʼot ta pasel.

Albilkʼopetik ti chkʼotanuk xa ta pasele

Li Jesuse jakʼbat yuʼun yajtsʼaklomtak kʼuxi xuʼ snaʼ krixchanoetik ti kʼusi ora chlik li «slajebal cʼacʼale» (Mateo 24:3). Kʼalal la stakʼ li Jesuse, jaʼ laj yalbe skʼoplal li kʼusitik chkʼot ta pasel ta mas jelavele, xi laj yale: «Ti jun mucʼ ta lume ta xlic scontrain sbaic xchiʼuc yan mucʼ ta lum. Ti jun ajvalile ta xlic scontra sbaic xchiʼuc ti yan ajvalile. Ta xtal viʼnal. Ta xtal chamel. Buyuc noʼox oy ti niquele». Xi to laj yal xtoke: «Sliquebal to vocol maʼ ti vaʼi sʼelan taje» (Mateo 24:7, 8, Ch). Ti kʼu sjalil taje, li jtakbol Pabloe la sbiiltas «slajebal [kʼakʼal]» xchiʼuk laj yal ti chvinaj «tsots vocol[e]» (2 Timoteo 3:1). ¿Kʼusi chanop li voʼote? ¿Mi yakal van chkʼot ta pasel avi li kʼusitik taje?

Pe, ¿kʼu yuʼun toj tsots vokolil li ta slajebal kʼakʼale? Li jtakbol Juane laj yal ta jun albilkʼop li srasonale. Laj yal ti jaʼ ta skoj «ti mu xa  jaluc [ch-abtej]» ta Balumil li Satanás xchiʼuk spukujtake. Jech xtok, laj yalbe smelolal ti «ilinem» tajek li Satanase (Apocalipsis 12: 7-12). ¿Mi mu jechuk ti maʼuk noʼox ta jun lum ti kapem xvinaj xchiʼuk ti simaron noʼox tspas sbaik li krixchanoetike?

Li Jesuse laj yal xtok ti ta slajebal kʼakʼal, kʼalal jaʼo oy tsots vokolile, oy jun abtelal ti labal sba kʼuyelan chichʼ pasele. Xi laj yale: «Ti lequil achʼ cʼop scʼoplal ti ventainel yuʼun ti Diose, ta xichʼ puquel ta sbejel banomil yoʼ jech ta snaʼic scotolic ti oy coltaele. Vaʼi un, ta xtal ti slajebal cʼacʼale» (Mateo 24:14, Ch). Li yajrextikotak Jeovae yakal chcholbeik skʼoplal li Ajvalilal yuʼun Dios ta mas ta 235 mukʼtik lumetik xchiʼuk bikʼtal lumetik xchiʼuk tslokʼesik vunetik mas ta 500 kʼopetik. Chaʼtos revista tspasik ti lokʼesbil skʼoplal ta Vivliae, jaʼ li ¡Despertad! xchiʼuk Li Jkʼel osil ta toyole. Xchaʼtosal li revistaetik taje toj echʼ xa noʼox chichʼ pukel ta spʼejel Balumil. Jech xtok, sjelubtasojik te van ta 100 kʼopetik li Vivliae. Chlokʼ ta yoʼonton stukik spasbel yabtel Dios li yajrextikotak Jeovae, muʼyuk chichʼik tojel xchiʼuk ta matanal takʼin chkʼot ta pasel li yabtelik ta spʼejel Balumile. Ti vaʼ kʼusitik chichʼ pasel sventa cholmantale, ¿mi jaʼ van skʼoteb ta pasel li kʼusi laj yal Jesuse?

Li Vivliae chal kʼusitik chkʼot ta pasel xtok kʼalal jaʼ xa slikeb li paskʼop tspas Jeova xchiʼuk li yajkontratake. Jchantik batel oxib albilkʼopetik ti skʼan to xkʼot ta pasele.

Albilkʼopetik ti poʼot xa xkʼot ta pasele

Baʼyel albilkʼop. Li ta Vivliae chal ti xi la chlik yalik li ajvaliletike: «Jun coʼntontic, muʼyuc cʼusi xiʼbal sba». Kʼalal jech chalike, tsnopik ti chchapaj xa yuʼunik li kʼusitik tsots yakal chkʼot ta pasel ta Balumile. Pe bu chata, li kʼusitik chkʼot ta pasel kʼalal mi jech laj xaʼox yalik li ajvaliletike, maʼuk sventa jun oʼontonal (1 Tesalonicenses 5:1-3).

Xchibal albilkʼop. Mi kʼot xaʼox ta pasel taje, oy jlom ajvaliletik chlik skontrainik li relijionetik ta spʼejel Balumile. Li ajvaliletik taje koʼoltasbilik kʼuchaʼal jun jtiʼvanej bolom li ta Vivliae, yan li jecheʼ relijionetik ta spʼejel Balumile koʼoltasbilik ta jun ants ti kajal ta sba li jtiʼvanej bolome (Apocalipsis 17:3, 15-18). Li jecheʼ relijionetik ti naka noʼox tskuy sbaik ta yajtunel Diose, ta x-akʼbat slajeb yuʼun li jtiʼvanej bolome. Kʼalal mi jech kʼot ta pasele, li ajvaliletike muʼyuk chakʼik venta, pe chakʼik kʼotuk ta pasel li kʼusi tskʼan Diose.

Xi chal kʼusi chkʼot ta pasel li jtakbol Juane: «Li lajuneb xulub jtiʼvanej bolom laj avile, jaʼ chlic scontrainic li jmulavil antse. Solel stuc chcom yuʼunic o, tstʼananic comel ta jyalel. Ta stiʼbeic li sbecʼtale jaʼo chlic xchiqʼuic ta cʼocʼ. Yuʼun li Diose jaʼ chacʼbe ta yoʼntonic spasel li cʼusi snopoj onoʼox stuque» (Apocalipsis 17:16, 17).

Yoxibal albilkʼop. Kʼalal mi lajik xaʼox li jecheʼ relijionetike, li Satanase tstijbe yoʼonton ajvaliletik sventa chbat stsak ta kʼop li yajtuneltak Jeovae (Apocalipsis 7:14; Mateo 24:21).

¿Kʼusi skʼan xapas li voʼote?

Mi mu to xavojtikin lek li kʼusitik chal Vivliae, xuʼ van vokol chachʼun mi chkʼot ta pasel li kʼusitik taje. Pe oy lek skʼelobiltak ti chakʼ jchʼuntik ti poʼot xa xkʼot ta pasele. Li epal albilkʼopetik ti kʼotemik xa ta pasele chakʼ ta ilel ti ta melel chkʼot ta pasele. *

¿Mi xanaʼ kʼu yuʼun xchʼunojik tajek li yajrextikotak Jeova ti nopol xa li «mucʼta pleito ta scʼacʼalil [...] li Dios ti echʼem svuʼele»? ¿Mi chakʼan chanaʼ kʼu yuʼun muʼyuk srasonal chaxiʼta li paskʼop taje? ¿Kʼu yuʼun mu xachʼakbe yorail sventa xachanbe smelolal? Albo ti akʼo yakʼboxuk avil ta Vivlia li yajrextikotak Jeova ti kʼusi skʼan jpastik sventa xkichʼtik chabiel yuʼun Jeova kʼalal mi tal li Armagedone (Apocalipsis 16:14). Li kʼusi chlik achane xuʼ sjelbot anopben sventa li kʼusitik chtal ta jelavele.

[Tsʼib ta yok vun]

[Tsʼib ti mukʼtik sletraile ta pajina 8]

Ti vaʼ kʼusitik tspasik sventa cholmantal li yajrextikotak Jeovae, ¿mi mu jaʼuk van skʼoteb ta pasel li albilkʼop ta Vivliae?