¿Mi chopol van li espiritismoe?

Kʼalal tseb toʼox li Barbarae * oy kʼusitik lik yil xchiʼuk oy kʼusitik lik yaʼi. Chal xtok ti laj la xchiʼin ta loʼil yutsʼ yalaltak ti chamemik xaʼoxe. Koʼol lik skʼelik slivroaltak espiritismo xchiʼuk li smalal ti Joaquín sbie, la xchanik xtok stunesel lek svarajail tarot. Ta skoj taje la snaʼik ti ep tspasik kanal takʼin ta tsʼakale; jech onoʼox kʼot ta pasel, yuʼun lekub batel li yabtelike. Jun velta li ta varajae laj yilik ti chkʼot la chaʼvoʼ krixchanoetik ta snaik ti xibalik sbae xchiʼuk albatik kʼuyelan xuʼ spoj sbaik.

MANCHUK mi chichʼ nopel ti voʼne xa komem skʼoplal li espiritismoe, ta skoj ti toj ep buchʼutik kʼupil chaʼiik li kʼusi labalik sba chkʼot ta pasel ti mu staleluk onoʼoxe toj pukem skʼoplal li avie. Buyuk xa noʼox ti xkuchet smetsʼul chanav li krixchanoetike xchiʼuk tskʼoponik j-espiritistaetik sventa tsjakʼik kʼusi chkʼot ta pasel ta jelavel o kʼuxi xuʼ spoj sbaik li ta kʼusitik chopole. Li ta revista Focus te ta Alemaniae lokʼ jun mantal «Lucifer y las computadoras» sbi, te laj yichʼ alel ti «Internete chakʼ ayanuk ta yoʼonton krixchanoetik li akʼchamele».

¿Mi anaʼoj ti oy chalbe skʼoplal espiritismo li Vivliae? Xuʼ van labal chavaʼi li kʼusi chale.

¿Kʼusi chal li Vivliae?

Li Diose xi toʼox la spʼijubtas li voʼneal Israele: «Mu me oyuc bochʼo [...] xachanic tʼunul jech chac cʼu chaʼal tspasique, xchiʼuc mu me xanopic ti xuʼ avuʼunic snaʼel cʼusi chcʼot ta pasel ta tsʼacale, xchiʼuc mu me xachanic acʼchamel. Mu me xachanic tuchʼ ora. Mu me cʼusi xbat avaqʼuic ta tʼunel ta stojol li jtʼunuletique, xchiʼuc li bochʼotic snaʼic scʼopanel chʼulelale, xchiʼuc mu me cʼusi xajaqʼuic ta stojol li bochʼotic chamenic xae. Yuʼun li bochʼotic jech tspasique, ilinem ta stojolic li Mucʼul Diose» (Deuteronomio 18:10-12). ¿Kʼu yuʼun chopol chil Dios li espiritismoe?

Jech kʼuchaʼal li jun nupultsʼakal laj kaltik ta slikebale, oy ep buchʼutik xchʼunojik ti xuʼ jchiʼintik ta loʼil li animaetike xchiʼuk ti jaʼ la xchʼulel animaetik ti chkʼopojik kʼalal tspasik li kʼusitik sventa espiritismoe. Jech xchʼunojik yuʼun jutuk mu skotoluk relijionetik chalik ti oy la bu nakal li xchʼulel animaetike. Yan li Vivliae mu jechuk chal, yuʼun xi chale: «Pero li bochʼotic chamenic xae mu xa cʼusi snaʼic o» (Eclesiastés 9:5). Jech xtok, chal ti kʼalal chcham jun krixchanoe xkoʼolaj la jaʼ noʼox ta xvay, ti  mu snaʼ kʼusi chkʼot ta pasel ta spat xokone (Mateo 9:18, 24; Juan 11:11-14). * Mi jech taje, ¿kʼu yuʼun oy krixchanoetik chalik ti tskʼoponik xchʼulel animaetike? ¿Buchʼu tskʼoponik ta melel?

Skʼoponel kuxlejaletik ti mu xvinajik ta kʼelele

Li Evanjelioetike chakʼ ta ilel ti kʼalal liʼ toʼox oy ta Balumil li Jesuse la skʼopon kuxlejaletik ti mu xvinajik ta kʼelele. Li ta Marcos 1:23, 24, chal ti xi albat yuʼun jun chopol kuxlejal ti mu xvinaj ta kʼelel li Jesuse: «Jnaʼoj ti voʼot Xchʼul Nichʼonot Diose», xut. ¿Mi anaʼoj ti xayojtikin ek li kuxlejaletik taje? Pe li voʼote, ¿kʼusitik xanaʼ ta sventa li kuxlejaletik taje?

Li Jeovae baʼyel la spas epal miyon anjeletik kʼalal muʼyuk toʼox spasoj krixchanoetike. Li xnichʼnabtak Dios taje mas ep yipalik, jaʼ xkom to li krixchanoetike (Job 38:4-7; Hebreos 2:6, 7). Yuʼun oy sjuʼelik xchiʼuk toj echʼem pʼijik ti laj yichʼik pasel sventa tspasik li kʼusi tskʼan yoʼonton Diose. Jech chakʼ iluk li jtsʼibajom yuʼun salmo ti xi laj yale: «Albeic slequilal Mucʼul Dios voʼoxuc li yajʼalmantaloxuque ti oy avuʼelic, ti lec xuʼ avuʼunique, ti chachʼunic, ti chapasic scotol li cʼusitic chayalboxuque» (Salmo 103:20).

Li Vivliae chal ti ta jelavele, oy jlom anjeletik lik xchiʼinik ta loʼil krixchanoetik ti muʼyuk jech albilik yuʼun Jeovae. ¿Kʼu yuʼun jech la spasik? Li baʼyel anjele la sloʼla Adán xchiʼuk Eva sventa tsnamajes ta stojolal li Jpasvanej yuʼunike. Jaʼ jech pas-o ta Satanás, ta Diablo, ta jchopolkʼoptavanej xchiʼuk ta yajkontra Dios li anjel taje (Génesis 3:1-6).

Ta tsʼakale, li anjeletike «la scomtsanic li yavil acʼbilique» xchiʼuk la spas sbekʼtalik sventa chtalik ta Balumil xchiʼuk tal xchiʼinik ta naklej alakʼ sba antsetik (Judas 6; Génesis 6:1, 2). Li jtoyba anjeletik xchiʼuk xnichʼnabik ti ojtikinbilik kʼuchaʼal nefilime la sibtasik tajek li krixchanoetike. Jaʼ ta skojik ti «toj ep cʼusitic chopol [kʼot ta pasel] ta banamile». Jaʼ yuʼun li ta skʼakʼalil Noee, li Diose la slajes ta Nojelal ta voʼ skotol li chopol krixchanoetik taje. Xuʼ van oy avabinoj ti jech kʼot ta pasele (Génesis 6:3, 4, 11-13).

Ta skoj li Nojelal ta voʼe, li anjeletike chaʼsutik batel ti bu oy li kuxlejaletik ti mu xvinajik ta kʼelele xchiʼuk laj yikta li sbekʼtalike. Pe li Jeovae muʼyuk xa bu xakʼ staik li yavil akʼbilik ta vinajele, moʼoj, «la sjip batel ta yutil icʼal osil» (2 Pedro 2:4, 5). Li Vivliae «pukujetik» yakʼojbe sbi li jtoyba anjeletik taje (Santiago 2:19). Taje jaʼ li buchʼu chkʼopojik kʼalal tspasik li kʼusitik sventa espiritismoe.

¿Kʼusi tskʼanik li pukujetike?

Li pukujetike ta xchiʼinik ta loʼil krixchanoetik sventa mu xichʼik ta mukʼ li melel Dios Jeovae. Ti kʼusitik labalik sba ta ilel ti chkʼot ta pasel yuʼun li espiritismoe jaʼ noʼox chchʼaybe yoʼonton li buchʼutik lek xa chilike, vaʼun jech mu staik li melel yojtikinobil Diose xchiʼuk ti mu lekuk xil sbaike.

Pe li pukujetike oy to kʼusi yan tskʼanik. Taje te chkiltik kalal laj yalbe Jesús ti chakʼbe sbain «scotol svuʼelic li ajvaliletic liʼ ta banamile». ¿Kʼusi laj yalbe Jesús ti skʼan spase? «Me chaquejan aba ta jtojole, me chavichʼun ta muqʼue», xut. Kʼalal jech laj yale, laj yakʼ ta ilel ti tskʼanik ichʼel ta mukʼ li Satanás xchiʼuk spukujtake. Akʼo mi jech, li Jesuse muʼyuk buchʼu yan la skʼan laj yichʼ ta mukʼ, jaʼ noʼox stuk li Jeovae (Mateo 4:8-10).

 Avi li pukujetike mu toj tukʼuk tskʼoponik li krixchanoetike. Moʼoj, yuʼun sventa tsloʼla tal li krixchanoetike tstunes yan kʼusitik ti muʼyuk chopol yileluk kʼalal chichʼ pasele, jech kʼuchaʼal li smesel o stusel ta ton alakʼ o ta yan kʼusitik li jun krixchanoe, li pik chʼichʼe, li skʼoponel xkaxail rioxe, li stunesel stsʼubilal kafee, li skʼelel svarajail tarote xchiʼuk li oroskopoetike. ¡Mu xachʼun loʼlael! Mu staleluk maʼ ti kʼusitik chkʼot ta pasel yuʼun taje. Li kʼusi lek xa chilik li pukujetike jaʼ ti kʼupil xa chilik espiritismo li krixchanoetike, jaʼ yuʼun jech xa tsloʼlaan xchiʼuk jech mu xa xnopajik ta stojolal Jeova. Kʼalal mu jechuk chkʼot ta pasel taje, chilbajinik ta jyalel li krixchanoetike. ¿Kʼuxi xuʼ xapoj aba mi jech chkʼot ta pasel ta atojolale?

Kʼuxi ta tsalel

Mu xavakʼ aba ta loʼlael: jaʼ yajkontratak Dios li kuxlejaletik ti mu xvinaj ta kʼelel ti chkʼopojik xchiʼuk li krixchanoetike, xchiʼuk albil skʼoplalik ti chichʼik lajesele (Judas 6). Jaʼ noʼox chloʼlavanik, jaʼ xa tskʼatajes sbaik li ta krixchanoetik ti chamemik xae. ¿Kʼu van yelan chavaʼi aba mi laj avakʼ venta ti jaʼ noʼox tskʼan chilbajinot ti buchʼu jaʼ avamigo avaloje? ¿Kʼusi van chapas mi laj avakʼ venta ti jaʼ jun tsatsal jtsakvanej li buchʼu laj avojtikin ta Internete? Mas to me xibal sba mi ta jpasbetik yabtel li pukujetike. Jaʼ yuʼun skʼan me xavakʼ persa sventa xavikta aba ta spasel li kʼusitik taje. ¿Kʼuxi xuʼ xapas?

Kʼalal laj yojtikinik kʼusi chal Skʼop Dios ta sventa espiritismo li jlom jnaklejetik ta voʼneal Efesoe, la xchikʼik li svunaltak majia yuʼunike, yuʼun laj yakʼik venta ti jech skʼan spasike. Li Vivliae chal ti «la xchiqʼuic ta stojol scotol cristianoetic» akʼo mi toj toyolik tajek stojol (Hechos 19:19, 20). Li avie maʼuk xa noʼox chichʼ tunesel livroetik, metsʼuletik, moʼoj, yuʼun oy xa noʼox kʼusitik sventa espiritismo ti chichʼ tael ta Internete. Skʼan me xachʼay batel skotol li kʼusitik te nitil skʼoplal xchiʼuk espiritismoe.

¿Mi xvul ta ajol li Bárbara xchiʼuk Joaquín ti laj kalbetik skʼoplal ta slikeb li mantal liʼe? Jaʼ ta skoj li svarajail tarot ti laj yaʼiik ti chkʼot ta snaik chaʼvoʼ xibal sba krixchanoetik ta alele xchiʼuk ti mu stakʼ xchikintabeik mi jaʼuk stakʼ kʼusi xchʼambeike. Akʼo mi jech, kʼalal kʼot Connie xchiʼuk Gudrun ti jaʼik yajrextiko Jeova ta sna li nupultsʼakal taje xchiʼuk ti kʼot yalik ti yichʼojik batel lekil aʼyej sventa li melel Diose, la xchʼamik. Lik yalik li kʼusitik sventa espiritismoe, pe li yajrextikotak Jeovae laj yakʼbeik yil kʼusi chal Vivlia ta sventa taje. Vaʼun, li Joaquín xchiʼuk Barbarae la xchʼamik jun chanubtasel ta Vivlia.

Li nupultsʼakal taje ta anil laj yiktaik li kʼusitik tspasik ta sventa pukujetike. Li kʼusi albatik yuʼun li chaʼvoʼ yajrextiko Jeovae jaʼ ti muʼyuk lek chil pukujetik ti kʼusi chlik spasike. Jech onoʼox ta melel, kʼalal lik xchanik Vivlia li Joaquín xchiʼuk Barbarae toj ep laj yil svokolik xchiʼuk tsots ilbajinatik yuʼun li pukujetike. Skotol akʼobal chiʼik, jaʼ to kom svokolik kʼalal la sjel batel snaike. Kʼalal jaʼo tsots laj yil svokolike, jaʼ patbat yoʼontonik yuʼun li kʼusi chal Filipenses 4:13, yuʼun xi chale: «Scotol xuʼ cuʼun ta sventa Cristo, yuʼun jaʼ chiyacʼbun jtsatsal». Li Jeovae laj yakʼbe bendision li nupultsʼakal taje, ta mas tsʼakale muʼyuk xa x-ilbajinatik yuʼun li pukujetike. Avi li Joaquín xchiʼuk Barbarae xmuyubaj chtunik ta stojolal li melel Diose.

Li buchʼutik tskʼanik li bendision chakʼ Jeovae skʼan spasik li kʼusi chal li Skʼop Dios liʼe: «Acʼo abaic ta scʼob li Diose. Jaʼ contrainic li pucuje, jech chjatov loqʼuel ta atojolic. Nopajanic ta stojol li Diose, jech chnopaj ta atojolic ec» (Santiago 4:7, 8). Mi jech chakʼane, li buchʼu Skotol xuʼ yuʼune xuʼ skoltaot sventa xakol lokʼel li ta kʼusitik chloʼlavan-o li pukujetike. Kʼalal tsnopik li Joaquín xchiʼuk Barbara ta sventa li kʼusi la snuptanike chalik jech kʼuchaʼal li Salmo 121:2: «Li jcoltaele te ta xlic tal ta stojol li Mucʼul Diose».

[Tsʼibetik ta yok vun]

[Tsʼib ti mukʼtik sletraile ta pajina 11]

Li espiritismoe jaʼ chakʼ ti mu lekuk xil sbaik xchiʼuk Dios li krixchanoetike

[Tsʼib ti mukʼtik sletraile ta pajina 12]

«Nopajanic ta stojol li Diose, jech chnopaj ta atojolic ec.» (SANTIAGO 4:7, 8)