Li jkʼelvunetike tskʼan tsnaʼik

¿Mi ta van xlaj li Balumile?

▪ Junantike la xchʼunik ti ta 21 yuʼun oktuvre ta 2011, chlaj ox li Balumile. Pe mu jechuk kʼot ta pasel. Jun j-abtel ta radio ti Harold Camping sbie laj yal ti mukʼta chapanele chkʼot ox la ta 21 yuʼun mayo ta 2011, pe mu jechuk kʼot ta pasel. Li vaʼ kʼakʼale ta la xtal ox jun tsatsal nikel ti tslilin li Balumile, kʼalal mi echʼ xaʼox voʼob ue chlaj li Balumile, taje ta ox la xkʼot ta 21 yuʼun oktuvre.

Pe li kʼusi melele jaʼ ti muʼyuk chlaj li Balumile yuʼun li Buchʼu la pase muʼyuk chakʼ ti jech chkʼot ta pasele. Li ta Skʼope xi chale: «Voʼot laj anacan li banamile, jech lec nacal icom o» (Salmo 119:90).

Akʼo mi jech, junantik li buchʼu chchanik Vivliae mu jechuk tsnopik, yuʼun chalik ti ta la xlaj ta kʼokʼ li Balumile. Jech tsnopik ta skoj li kʼusi chal ta 2 Pedro 3:7, 10 ti xi chale: «Li vinajel xchiʼuc banamile chapanbil xa scʼoplal ta xcʼacʼ ta cʼocʼ ti cʼalal yorail chapanele, jaʼ ta scʼop noxtoc li Diose. Xchiʼuc jaʼ yorail chbatic ta chʼayel li chopol cristianoetique. [...] Li scʼacʼalil cʼalal chtal Cajvaltique jaʼ jech chac cʼu chaʼal jun jʼelecʼ. Ta scʼacʼalil leʼe, tsots xvoʼet cʼalal chcʼacʼ li vinajele. Li cʼusitic oy ta vinajele ta xʼul ta cʼocʼ. Jech noxtoc li banamile xchiʼuc scotol li cʼusitic te oye ta xlaj scotol». Kʼalal laj yal Pedro ti chkʼakʼ ta kʼokʼ li Balumile, ¿mi jech chkʼot ta pasel ta melel?

Moʼoj, yuʼun ti jechuke jaʼ jech chichʼ albel smelolal ta sjunul li skarta Pedroe xchiʼuk li ta yantik livroetik ta Vivliae. Ti jechuk tajek chichʼ albel smelolal kʼuchaʼal chal li versikuloetike, ta skoj noʼox li xchopolal krixchanoetike chkʼakʼ jechuk li vinajel ti noj ta epal miyon kʼanaletik xchiʼuk yantik kʼusitik oye. Jnoptik ta sventa liʼe: ¿Mi ta van xachikʼ skotol amanyachenekʼ mi kʼajomal noʼox jpʼej kʼoʼe? Moʼoj. ¡Muʼyuk srasonal ta melel! Jaʼ yuʼun li Jeova eke muʼyuk tslajes skotol li kʼusitik spasoj ta skoj ti jayvoʼ noʼox la stoy sbaike.

Jech noxtok, mi ta jchʼuntik ti chlaj li Balumile mu xkoʼolaj xchiʼuk li kʼusi laj yal Jesucristo liʼe: «Xcuxet noʼox yoʼnton li bochʼo mucʼ noʼox yoʼntonique, yuʼun jaʼ ch-acʼbat sventainic li banamil ti albil scʼoplale» (Mateo 5:5; Salmo 37:29). ¿Mi oy xa noʼox jun lekil totil ti tsvaʼanbe alakʼ sba sna yutsʼ yalal sventa noʼox chchikʼ ta mas tsʼakale? (Salmo 115:16.) ¡Taje muʼyuk buchʼu jech tspas! Li Jeovae maʼuk noʼox Jpasvanej, moʼoj, yuʼun jaʼ jun jkʼanvanej Totil (Salmo 103:13; 1 Juan 4:8).

Li ta 2 Pedro 3:7, 10, kʼalal la stunes li jpʼel kʼop balumile li jtakbole jaʼ laj yalbe skʼoplal li chopol krixchanoetike. Akʼo venta ti la skoʼoltas li slajebal kʼakʼal jech kʼuchaʼal kʼot ta pasel li Nojelal ta voʼ ta skʼakʼalil Noee (2 Pedro 3:5, 6). Li vaʼ kʼakʼal taje jaʼ noʼox cham li chopol krixchanoetike. Pe muʼyuk xlaj li Balumile, mi jaʼuk li Noé ti jaʼ jun tukʼil krixchanoe xchiʼuk li yutsʼ yalale. Li versikuloetik taj eke ta lokʼolkʼop chichʼ tunesel li vinajel xie, yuʼun li Pedroe jaʼ chalbe skʼoplal li krixchanoetik ti ch-ajvalilajike. Jaʼ yuʼun li krixchanoetik ti toj chopol kʼusitik tspasike xchiʼuk li chopol ajvaliletike chichʼik lajesel xchiʼuk jaʼ ch-och ta kʼexolil li Ajvalilal yuʼun Dios te ta vinajele (Daniel 2:44).

Vaʼun chaʼa, ¿mi ta van xlaj li Balumile? Moʼoj. Li kʼusi chlaje jaʼ li chopol krixchanoetike, jaʼ xkaltik, li balumil ti jaʼ skʼoplalike. Li Balumil xchiʼuk krixchanoetik ti chchʼunbeik smantal Diose te oyik-o sbatel osil (Proverbios 2:21, 22).