¿Kʼu yuʼun yakʼoj to oyuk vokolil?

OY KRIXCHANOETIK ti tskʼoponik ta orasion li Diose, pe mu xchʼunik mi oy ta melel. ¿Kʼu yuʼun ti jech xchibet yoʼontonike? Xuʼ van jaʼ ta skoj ti ep vokolil chilik li ta sba balumile. ¿Mi oy ajakʼojbe aba junuk velta kʼu yuʼun yakʼoj to oyuk vokolil li Diose?

¿Mi jech onoʼox van la spasutik Dios ti jpasmulilutik xchiʼuk ti chkil jvokoltike? Ti oyuk jun dios ti yolbaj jech la spasutike xuʼ van mu xal koʼontontik xkichʼtik ta mukʼ. Nopo ta sventa liʼe: voʼote yakal chakʼel jkot achʼ karo, pe chavakʼ venta ti potsʼkʼijem li stakʼinale, ¿mi chanop van ti jech laj yichʼ pasel ta yachʼile? Ta melel mu jechuk chanop. Xuʼ van chanop ti lek laj yichʼ pasel li jkot karoe, jaʼ noʼox ti oy kʼusi potsʼkʼij-oe o ti oy buchʼu la spotsʼkʼine.

Jech ek, kʼalal ta jkʼeltik li kʼusitik pasbile chkakʼtik venta ti lek chapale xchiʼuk ti lek tajek pasbile, pe chkiltik xtok ti ep tajek kʼusitik chopole xchiʼuk ti sokem xa tajek li krixchanoetike. ¿Mi jech onoʼox van oy ta yoʼonton li Jpasvaneje? Li ta Vivliae chal ti kʼalal laj yichʼik pasel li baʼyel jtot jmeʼtike, tukʼik toʼox, pe ta skoj li kʼusitik la spasike kʼotik ta jpasmulil (Deuteronomio 32:4, 5). Akʼo mi jech, li Diose yaloj ti chchaʼlekubtas skotol li kʼusitik sokeme xchiʼuk chakʼ ti xkʼotik ta tukʼil krixchanoetik li buchʼutik chchʼunik mantale. Mi jeche, ¿kʼu yuʼun jal xa jelavem ti muʼyuk kʼusi spasoje?

¿Kʼu yuʼun toj jal?

Li stakʼobil taje te tsakal skʼoplal li sjakʼobil liʼe: ¿Buchʼu oy ta sba tspas ta mantal li krixchanoetike? Li Jeovae oy ox ta yoʼonton ti tsventaine, maʼuk ti tsventain sba stukike. Xi chal ta melel li Vivliae: «Mu xuʼ ta spas sba ta mantal stu[k]» li krixchanoetike (Jeremías 10:23, Ch). Kʼux ta alel, pe li Adán xchiʼuk Evae la spʼajik li Ajvalilal yuʼun Diose, jech oxal kʼotik ta jpasmuliletik ta skoj li stoyobbailike (1 Juan 3:4). Jaʼ yuʼun chʼay yuʼunik ti tukʼik toʼoxe, vaʼun la sta-o svokolik xchiʼuk li yalab xnichʼnabike.

 Oy xa jaymiluk jabil ti yakʼoj akʼo sbeiltas sba stuk krixchanoetik li Jeovae. Kʼalal ta sbeiltas sba stukike kʼajomal noʼox chakʼ vokolil, mu spas lek li yabtelike, yuʼun mi junuk ajvalil slajesoj li paskʼopetike, li pʼaj mantale, li kʼusitik muʼyuk tukʼ chkʼot ta pasele o li chameletike.

¿Kʼuxi ta stukʼibtas Dios li kʼusitik sokeme?

Li Vivliae chal ti yaloj onoʼox Dios ti poʼot xa chichʼ tal achʼ balumil ti bu oy tukʼilale (2 Pedro 3:13). Jaʼ noʼox te chkuxiik li buchʼutik chakʼik ta ilel ti skʼanojik li xchiʼiltakike xchiʼuk ti skʼanojik li Diose (Deuteronomio 30:15, 16, 19, 20).

Li Vivlia xtoke chal ti ta «yorail chapanele», ti poʼot xa chtale, li Diose tslajes li vokoliletike xchiʼuk li buchʼutik chakʼ vokolile (2 Pedro 3:7). Vaʼun, li Jesucristo ti jaʼ li Ajvalil biiltasbil yuʼun Diose, tsventain li jchʼunej mantal krixchanoetike (Daniel 7:13, 14). ¿Kʼusi chkʼot ta pasel yuʼun li ajvalil taje? Li Vivliae xi chale: «Li bochʼotic biqʼuit chacʼ sbaique jaʼ chuʼuninic o li yosilalique; jun noʼox yoʼnton te oyic o» (Salmo 37:11).

Li Jesucristo ti jaʼ li ajvalil ta vinajele, chchaʼlekubtas skotol li kʼusitik sokem ta skoj ti stoyoj sbaik li krixchanoetik ta stojolal Dios ti jaʼ li snioʼal kuxlejale. Muʼyuk xa buchʼu ta x-ipaj, ta xmalub xchiʼuk ta xcham (Salmo 36:9). Li buchʼutik chakʼ sbaik ta stojolal li jkʼanvanej ajvalil yuʼun Jesuse ta xkoltaatik. Chakʼ kʼotuk ta pasel li kʼusi chal Vivlia liʼe:

◼ «Mu jbejuc ta na jech chal: “Toj ipun”.» (Isaías 33:24.)

 ◼ «Li Diose ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay. Yuʼun ilaj xa scʼoplal scotol ti jech toʼox oy ta baʼyuque.» (Apocalipsis 21:4.)

¿Mi mu tauk spat koʼontontik snaʼel ti poʼot xa tslajes vokoliletik li Diose? Manchuk mi yakʼoj to oyuk li vokolile, xuʼ jchʼuntik ti chaʼibutik ta melel li j-orasiontike.

Nopol oy ta jtojolaltik li Diose. Jech, manchuk mi jutuk tajek li kʼusitik kʼux chavaʼie o li yatel avoʼontone, pe mi chavalbee chchikinta. Jech xtok, oy ta yoʼonton ti xkʼot skʼakʼalil ti mu xa xchibetuk avoʼonton ta stojolale xchiʼuk ti muʼyuk xa chavil avokole.