¿Mi oy buchʼu chaʼi li j-orasiontike?

«Manchuk mi mu toʼox jchʼun mi oy ta melel li Diose ta onoʼox jkʼopon ta orasion bakʼintik. Akʼo mi mu jnaʼ lek mi oy buchʼu chaʼi li j-orasione, pe li ta koʼontone ta jkʼan ti oyuk buchʼu xaʼibune. Chʼabal ximuyubaj xchiʼuk muʼyuk sbalil chkaʼi li jkuxlejale. Mu toʼox jkʼan jchʼun ti oy Diose, yuʼun ta jnop ti jaʼ noʼox jech tspasik li buchʼutik abol sbaike.» (PATRICIA, LIKEM TA IRLANDA) *

¿MI JECH chavaʼi aba kʼuchaʼal li Patriciae? ¿Mi chakʼopon Dios akʼo mi mu xanaʼ mi oy ta melel? Mi jeche, mu atukuk.

◼ Kʼalal laj yichʼik jakʼbel 2,200 li buchʼutik nakalik ta Gran Bretañae, te vinaj ti jaʼ noʼox 22% xchʼunojik ti oy jun Jpasvanej ti chaʼi j-orasiontike. Akʼo mi jech, oy 55% laj yalik ti tspasik orasion bakʼintike.

◼ Kʼalal laj yichʼ chiʼinel ta loʼil 10,000 krixchanoetik xtok ti likemik tal ta chanib mukʼta lumetike, vinaj ti buchʼu mu xchʼunik Diose oy 30% ti tspasik orasione.

¿Kʼu yuʼun ti xchibetike?

Jun vinik likem ta Inglaterra ti jaʼ sbi Allan, xi chal ti kʼu yuʼun muʼyuk toʼox xchʼunoj Diose: «Li voʼone ta toʼox jnop ti jaʼ noʼox sventa tsloʼla krixchanoetik li relijione xchiʼuk ti tspojbe stakʼinike. Xchiʼuk xi ta jnope: “Mi oy ta melel li Diose, chʼabal jechuk li choplejale”. Akʼo mi jech, bakʼintike chichoti xchiʼuk oy kʼusi “chkalbe”. Xchiʼuk ta jakʼbe jba kʼu yuʼun ti liʼ oyutike».

Ep ta tos srasonal ti kʼu yuʼun mu xchʼunik lek ti oy buchʼu tstakʼ li orasione. Bakʼintike jaʼ ta skoj ti mu stabeik stakʼobil li sjakʼobiltak liʼe:

◼ ¿Mi oy van Buchʼu spasojutik?

◼ ¿Kʼu yuʼun jaʼ noʼox chakʼ vokolil li relijionetike?

◼ ¿Kʼu yuʼun yakʼoj oyuk vokolil li Diose?

Ti xanaʼuk li stakʼobiltak taje, ¿mi mas van jun avoʼonton chapas orasion?

[Tsʼib ta yok vun]