Xuʼ xijnopajutik ta stojolal li Buchʼu chaʼi jkʼoptike

EP KRIXCHANOETIK chalik ti xchʼunojik Diose, pe mu x-al yuʼunik li kʼusitik xchʼunojike. Mu x-al yuʼunik xtok ti kʼu yuʼun chopol kʼusitik tspasik li relijionetike o ti kʼu yuʼun yakʼoj to oyuk vokolil li Diose. Li kʼusi xa noʼox xuʼ spasike jaʼ ti tskʼoponik ta orasion li buchʼu mu xojtikinike.

Akʼo mi jech, xuʼ xijnopajutik ta stojolal li Buchʼu chaʼi jkʼoptike. Sventa jkʼantik xchiʼuk jkʼuxubintik li Diose skʼan xkojtikintik, taje jaʼ li kʼusi mas tsots skʼoplal sventa oyuk li xchʼunel koʼontontike. Jaʼ yuʼun, sventa oyuk xchʼunel koʼontontik ta melele skʼan oyuk sprevailtak li kʼusi ta jchʼuntike (Hebreos 11:1). Mi la achan li kʼusi melel ta sventa Diose, xuʼ xavojtikin xchiʼuk xuʼ xakʼopon kʼuchaʼal jun avamigo. Ta jkʼelbetik batel jun-chibuk skʼelobil ti oy krixchanoetik tspasik orasion akʼo mi xchibet yoʼontonik mi oy ta melel li Diose.

◼ Patricia (ti laj kalbetik skʼoplal ta baʼyel mantale). «Oy jun kʼakʼal kʼalal te oyun xchiʼuk lajunvoʼ kamigotake lik yalbeik skʼoplal relijion. Kalojbeik xa onoʼox yaʼiik ti oy jun veltae, ay jun yajrextiko Jeova ta jnakutik ti loʼilaj xchiʼuk li jtot ti mu xchʼun mi oy Diose, pe li voʼone libat, yuʼun mu jkʼan jchikinta li kʼusi chalike. Li jun kamigoe xi laj yale: “Xuʼ van oy srasonik li yajrextikotak Jeovae”.

»Xi laj yal jun tsebe: “¿Kʼu yuʼun mu xijbat jkojuk ta stsobajelik sventa jkʼeltik kʼuyelane?”. Vaʼun li batkutik. Ta skoj li slekil yoʼontonik yajrextikotak Jeovae, jlome li batilankutik to ta tsobajel, manchuk mi mu jchʼunkutik lek.

»Pe oy jun domingoe oy kʼusi laj yalik ta tsobajel ti jel-o li kʼusi ta jnope. Li mantal echʼe laj yichʼ alel ti kʼu yuʼun chil svokol li krixchanoetike. Te la jchan ti lek tukʼ laj yichʼ pasel li baʼyel vinike, pe kʼalal muʼyuk la xchʼun mantale la sjelubtasbe mulil xchiʼuk lajelal li xnichʼnabtake. Jech xtok, laj yalik ti sventa sta krixchanoetik li kʼusi la xchʼay li baʼyel jtotike persa cham li Jesuse (Romanos 5:12, 18, 19). * Jaʼ to te laj kaʼibe smelolal skotol li kʼusitik mu toʼox jnaʼe. Laj kakʼ venta ti oyutik ta yoʼonton ta melel li Diose. Muʼyuk laj kikta jba ta xchanel li Vivliae xchiʼuk jaʼ to te laj kaʼibe smelolal ti oy buchʼu ta melel xuʼ jkʼopone.»

◼ Allan (ti laj kalbetik skʼoplal ta baʼyel mantal eke). «Jun kʼakʼale kʼotik ta jnakutik li yajrextikotak  Jeovae, vaʼun li kajnile laj yakʼ ochuk ta yut jnakutik, yuʼun kʼot ta yoʼonton kʼalal albat ta sventa jun kuxlejal ta sbatel osil liʼ ta Balumile. Li voʼone toj chopol laj kaʼi, jaʼ yuʼun laj kikʼ batel ta kosina, vaʼun xi laj kalbee: “Mu xavakʼ aba ta loʼlael. ¡Naka jutbil li kʼusi chalike!”.

»Xi laj yalbune: “Mi loʼlaele chaʼa, bat chiʼino ta loʼil, akʼbo yilik ti mu meleluk li kʼusitik chalike”.

»Muʼyuk vul ta jol kʼusi xuʼ xkalbeik. Li yajrextikotak Jeovae ta slekil yoʼonton la skʼoponikun xchiʼuk laj yiktabeikun jlik livro ti chalbe skʼoplal ti kʼuxi ayan li kʼusitike, mi kʼunkʼun kʼataj talel o mi laj yichʼ pasel. Li kʼusi lik jchane toj lek jamal smelolal xchiʼuk oy lek sprevailtak ti jech kʼot ta pasele, jaʼ yuʼun lik jchan mas ta sventa li Diose. Lik skoltaikun xchanel Vivlia li yajrextikotak Jeovae, jaʼ jech ta anil laj kakʼ venta ti kʼusitik te chale jelel tajek xchiʼuk li kʼusitik ta jnop toʼox ta sventa relijione. Kʼalal laj kojtikin mas li Jeovae mas xa ep kʼusitik chkalbe li ta j-orasione. Jnaʼoj ti ep kʼusitik skʼan jel li ta jtalelale, jaʼ yuʼun la jkʼanbe koltael li Jeovae, vaʼun la stakʼbun li j-orasione.»

◼ Andrew (likem ta Inglaterra). «Akʼo mi oy ta koʼonton xchiʼuk lek tajek chkaʼi xchanel li  siensiae, jchʼunoj toʼox xtok ti kʼunkʼun kʼataj talel li kuxlejaletike, yuʼun chalik ti oy sprevailtak ti jech kʼot ta pasele. Pe ta skoj ti oy ep kʼusitik chopol chkʼot ta pasel li ta balumile, mu jchʼun mi oy ta melel jun Dios.

»Akʼo mi jech, oy bakʼintike xi ta jnope: “Mi oy buchʼu te ta vinajele ta jkʼan ta jakʼbe kʼusi sbalil li jkuxlejaltike, kʼu yuʼun oy ep milbail xchiʼuk paskʼop”. Kʼalal oy jvokole, bakʼintike ta jpas orasion sventa ta jkʼan koltael, pe mu jnaʼ buchʼu yakal ta jkʼopon.

»Li vaʼ kʼakʼale, li kajnile akʼbat yuʼun yajrextiko Jeova jlik tratado ti jaʼ sbi ¿Podrá sobrevivir este mundo? Taje jaʼ li kʼusi ta onoʼox jakʼbe jbae. Li tratadoe laj yakʼ jnop mi xlokʼ van venta jsabe li stakʼobiltak chakʼ Vivliae. Ta mas tsʼakal kʼalal jaʼo oyun ta vakasione, oy buchʼu laj yakʼbun li livro La Biblia... ¿la Palabra de Dios, o palabra del hombre? * Kʼalal laj kakʼ venta ti mu skontrain kʼusi chal Vivlia xchiʼuk li kʼusi chal siensiae, la stij koʼonton ta xchanel mas. Jaʼ yuʼun la jchʼam ti xchanubtasun ta Vivlia jun yajrextiko Jeovae. Kʼalal laj kojtikin li kʼusi tskʼan tspas li Jeovae, laj kakʼ venta ti oy ta melele, taje jaʼ la skoltaun sventa sjunuluk koʼonton jkʼopon ta orasion.»

◼ Janet (ti laj yichʼ chanubtasel ta Londres ta jun relijion ti xchʼunoj Cristoe). «Ta skoj ti naka noʼox chloʼlavanik li ta relijione xchiʼuk ti ep vokolil ta balumile laj kikta li relijione. Jech xtok, la jnop ti muʼyuk xa chichanunaj ta universidade. Sventa ta jta jtakʼine ta jtij vob xchiʼuk chikʼejin. Laje laj kojtikin Patrick. Ta sbikʼtale katoliko toʼox, pe laj yikta jech kʼuchaʼal li voʼone.

»Te toʼox nakalunkutik ta jpʼej na ti chʼabal yajvale, te jchiʼukutik ta naklej yan kerem tsebetik ti yiktaojik li chanun eke xchiʼuk oy ta yoʼontonik li relijionetik ta slokʼeb Kʼakʼale. Bakʼintike toj ikʼ xa chivaykutik ta skoj ti ta jloʼiltakutik ti kʼu yuʼun kuxulutike. Li Patrick xchiʼuk voʼone muʼyuk jchʼunojkutik ti oy Diose, akʼo mi jech, ta jnopkutik ti oy van jun «juʼelal» la spas skotol li kʼusitik oye.

»Ta mas tsʼakale libatkutik ta snorteal Inglaterra sventa ta jsaʼ kabtelkutik ta tij son, taje te vokʼ li jkeremkutike. Jun akʼobale ipaj li jneneʼkutike, vaʼun lik jpas orasion, manchuk mi mu jchʼun mi oy ta melel li Diose. Ta tsʼakale lik jkʼopkutik xchiʼuk li Patricke, jaʼ yuʼun lilokʼ batel xchiʼuk laj kikʼ batel li kole. Ta skoj ti ta jkʼan koltaele la jpas orasion yan velta xtok, yuʼun la jnop ti xuʼ van oy buchʼu chaʼibune. Li Patricke la spas orasion ek, manchuk mi mu toʼox jnaʼ.

»Li ta smalel kʼakʼal taje, kʼot svulaʼanik Patrick chaʼvoʼ yajrextiko Jeova, vaʼun akʼbat yil tojobtaseletik ta Vivlia ti jtunelike. Laje la skʼoponun batel li Patricke xchiʼuk la sjakʼbun mi lek chkaʼi ti jmoj xkichʼkutik chanubtasel ta Vivlia yuʼun li yajrextikotak Jeovae. La jchankutik ti skʼan xinupunkutik mi ta jkʼan ta jmuyubtabekutik yoʼonton li Diose, pe taje toj tsots ta pasel laj kaʼikutik.

»Ta jkʼan tajek ta jchankutik kʼuxi chkʼotanuk ta pasel li albilkʼopetik ta Vivliae, kʼu yuʼun oy li vokoliletike xchiʼuk kʼusi jaʼ ta melel li Ajvalilal yuʼun Diose. Ta kʼunkʼun laj kaʼibekutik smelolal ti oyutik ta yoʼonton li Diose. Ta skoj ti ta jkʼan ta jpaskutik li kʼusi lek chil Diose linupunkutik. Li chanubtasel chakʼ Diose jaʼ skoltaojunkutik ta stsʼitesel li oxvoʼ kalab jnichʼnabkutike. Ta melel, jchʼunojkutik ti la xchikinta j-orasionkutik li Jeovae.»

Kʼelbo batel li sprevailtake

Li Patricia, Allan, Andrew, Janet xchiʼuk ta smiyonal xa noʼox krixchanoetike muʼyuk laj yakʼ sbaik ta loʼlael yuʼun li jecheʼ relijione, moʼoj, yuʼun la xchan ta stukik ti kʼu yuʼun yakʼoj to oyuk vokolil li Diose. Ta skoj ti la xchanik lek Vivliae laj yakʼik venta ti chchikinta j-orasiontik li Jeovae.

¿Mi chakʼan chakʼelbe sprevailtak ti oy ta melel li Diose? Li yajrextikotak Jeovae ta sjunul yoʼonton ta skoltaot sventa xavojtikin li kʼusi melel ta sventa li Buchʼu chaʼi jkʼoptike xchiʼuk ti xanopaj ta stojolale (Salmo 65:2).

[Tsʼibetik ta yok vun]

[Tsʼib ti mukʼtik sletraile ta pajina 10]

«Kʼalal laj kojtikin li kʼusi tskʼan tspas li Jeovae, laj kakʼ venta ti oy ta melele, taje jaʼ la skoltaun sventa sjunuluk koʼonton jkʼopon ta orasion»

[Lokʼol ta pajina 9]

Sventa oyuk li xchʼunel koʼontontik ta melele, skʼan oyuk ta koʼontontik xchanel li kʼusi melel ta sventa Diose