NOPAJAN TA STOJOLAL DIOS
«Mu xlaj avoʼntonic ta scʼanilanbel li Diose, jech chayacʼboxuc»
«Cajval, chanubtasuncutic ta scʼopanel Dios.» (Lucas 11:1.) Taje jech albat yuʼun jun yajtsʼaklom li Jesuse. Kʼalal la stakʼe la stunes chib lokʼolkʼop o skʼelobil sventa chakʼ ta chanel kʼuxi ta pasel orasion yoʼ xchikintabutik li Diose. ¿Mi oy ajakʼojbe aba mi chchikinta a-orasion li Diose? Mi jeche, oy van ta avoʼonton chanaʼ li kʼusi la stakʼ Jesuse. (Kʼelo Lucas 11:5-13.)
Li baʼyel lokʼolkʼope jaʼ mas chalbe skʼoplal li buchʼu tspas orasione (Lucas 11:5-8). Li Jesuse chalbe skʼoplal jun vinik ti chkʼot yajvulaʼal ta oʼlol akʼobale, pe muʼyuk kʼusi xuʼ xakʼbe slajes. Tsots skʼoplal chaʼi ti oy kʼusi xakʼbe li yajvulaʼale, jaʼ yuʼun chbat skʼanbe oxpʼej pan jun yamigo manchuk mi akʼobaltik xa. Ta slikebale mu skʼan xlik li yamigoe, yuʼun mu skʼan stijbe svayel li yutsʼ yalale. Pe ta skoj ti mu xlaj yoʼonton skʼanel pan li vinike, li yamigoe chlik yakʼbe li kʼusi tskʼane. *
¿Kʼusi xuʼ jchantik yuʼun ta sventa li orasione? Jaʼ ti skʼan mu xlaj koʼontontik skʼanilanel, saʼilanel xchiʼuk stijulanele (Lucas 11:9, Achʼ Testamento, ta skʼop Chenalhó; 11:10). ¿Kʼuxi taje? ¿Mi yuʼun van laj yal Jesús ti koʼol xchiʼuk ta jtijbetik stiʼ sna jun Dios ti mu skʼan xchikinta kʼalal ta jpastik orasione? Moʼoj ta melel. Li Diose mu xkoʼolaj kʼuchaʼal li amigoile, yuʼun li stuke chakʼbe kʼusi tskʼan li buchʼu oy xchʼunel yoʼonton tspas orasione xchiʼuk ti mu skontrain Dios li kʼusi tskʼane. Kʼalal mu xlaj koʼontontik ta skʼanele te chvinaj ti oy xchʼunel koʼontontike. Kʼalal ep ta velta ta jkʼantike chkakʼbetik yil ti chtun kuʼuntik ta melele xchiʼuk jchʼunojtik ti xuʼ chakʼbutik mi jech tskʼan yoʼonton li Diose (Marcos 11:24; 1 Juan 5:14).
Li xchibal lokʼolkʼope jaʼ mas chalbe skʼoplal li Buchʼu chaʼi orasione, ti jaʼ li Jeovae (Salmo 65:2). Xi la sjakʼ li Jesuse: «Voʼoxuc li totiloxuque, me ta scʼanboxuc vaj sveʼ anichʼnabique, ¿me ton chavacʼbeic? Me chascʼanboxuc choy stiʼe, ¿me chon chavacʼbeic? Me ta scʼanboxuc ton caxan sloʼe, ¿me stsec chavacʼbeic?». Jamal ta aʼiel li stakʼobile, yuʼun mu junuk totil ti skʼanoj xnichʼnabtake chakʼbe li kʼusi xuʼ chopol tspasbatike. Li Jesuse laj yal ti mi mu kʼusi chopol chakʼbe xnichʼnab li totiletik ti chopolik noʼoxe, «¡buuc xa li Atotic te oy ta vinajele Chʼul Espíritu chacʼbe li bochʼotic ta scʼanique!», ti jaʼ li mas lekil matanale (Lucas 11:11-13; Mateo 7:11). *
Li Diose oy ta yoʼonton chakʼbe kʼusi tskʼan li buchʼu oy xchʼunel yoʼonton tspas orasione
Jech taje, li Jesuse laj yakʼ ta ilel ti chaʼi j-orasiontik li Jeovae, ti xkoʼolaj ta Jtotik ti kʼanvanem xchiʼuk ti oy ta yoʼonton chakʼ li kʼusi chtun kuʼuntike. Jaʼ yuʼun, li buchʼu chichʼik ta mukʼ Jeovae xuʼ jun yoʼonton xalbeik kʼusi tsvul-o yoʼontonik. Jech xtok, ta skoj ti snaʼojik ti tskʼan Dios ti lekuk xbat xkuxlejalike, ta sjunul yoʼonton chchʼamik li kʼuyelan chtakʼbat s-orasionike, manchuk mi mu jechuk toʼox ti kʼuyelan la skʼanike. *
Bu kʼalal xuʼ jkʼeltik Vivlia li u liʼe:
^ par. 4 Li lokʼolkʼop laj yal Jesuse chakʼ ta ilel kʼusi nopem xaʼiik spasel ta voʼne. Ti lek chchʼam yajvulaʼalik li judioetike tsots tajek skʼoplal chilik. Nopem toʼox xaʼiik ti jaʼ noʼox tspasik pan ti kʼuyepal chtun yuʼunik ta jujun kʼakʼale, jaʼ yuʼun mi laj noʼox yuʼunike tskʼanbe slakʼnaik. Mi povreike ta piso chvay skotolik ta jun noʼox kuarto.
^ par. 6 Kʼalal «buuc xa» xi li Jesuse, jaʼ sventa tskoʼoltajes kʼusitik bikʼitik kʼalal chalbe smelolal li kʼusitik tsotsik skʼoplale.
^ par. 7 Mi chakʼan chachanbe mas yaʼyejal ti kʼuxi ta pasel orasion sventa xaʼibot li Diose, kʼelo li kapitulo 17 ta livro ¿Kʼusi chchanubtasvan ta melel li Vivliae?, ti pasbil yuʼun stestigotak Jeovae.
