¿MI TOJ chopol chavaʼi li sjakʼobil taje? Jlome jech chaʼiik. Pe jlom xtoke jech tsjakʼbe sbaik o bakʼintike tsnopik ti muʼyuk xkʼuxul yoʼonton li Diose. ¿Kʼu yuʼun?

Li buchʼu kuxul komik ta nikel, nojelal ta voʼ o yantike, xi chalike: «¿Kʼu yuʼun ti jech yakʼoj chkʼot ta pasel li Diose? ¿Mi muʼyuk van xkʼuxul yoʼonton xchiʼuk mu skʼanutik?».

Yantik xtoke chopol chilik jlom loʼiletik ta Vivlia, jech kʼuchaʼal li Nojelal ta voʼ ta skʼakʼalil Noee. Xi tsjakʼbe sbaike: «¿Kʼuxi xa noʼox ti epal krixchanoetik la smil Dios mi chkʼanvane? ¿Mi muʼyuk xkʼuxul yoʼonton?».

¿Mi oy jech ajakʼojbe aba ek? ¿Mi mu xtakʼ chavaʼi kʼalal oy buchʼu jech tsjakʼe? Mi jeche, xuʼ skoltaot mi la achan li sjakʼobil chtale.

Li chonbolometike oy kʼusi muʼyuk yuʼunik, li voʼotike jnaʼtik li kʼusi lek xchiʼuk kʼusi chopole. Yuʼun «jaʼ la slocʼta sba jech cʼu chaʼal stuc» kʼalal la spasutik li Diose (Génesis 1:​27). ¿Kʼusi skʼan xal taje? Jaʼ ti jech la spasutik ti kʼuyelan stuke, ti xuʼ xkakʼtik ta ilel li stalelaltake, ti jnaʼtik li kʼusi lek xchiʼuk kʼusi chopole. Jnoptik liʼe: mi chopol chkiltik ti muʼyuk xkʼuxul oʼontonale, ¿mi mu van masuk chopol chil xanaʼ li Diose?

Taje jech onoʼox chal li Vivliae, yuʼun jech chalbe sba skʼoplal stuk li Diose, xi chale: «Mu xacʼotic ta snopel ti bu cʼalal ta jnop li vuʼune» (Isaías 55:9). Mi chkaltik ti muʼyuk xkʼuxul yoʼonton li Diose xkoʼolaj ta jnoptik ti mu xnop yuʼun Dios li kʼusi ta jnoptike. Pe kʼalal mu to jnoptik taje jaʼ mas lek ti baʼyel jsabetik mas yaʼyejale. Xuʼ van mas lek ti jakʼbe jbatik baʼyel ti kʼu yuʼun muʼyuk xkʼuxul yoʼonton yileluk Dios ta sventa li kʼusitik tspase, ti mu jaʼuk baʼyel jakʼtik mi muʼyuk xkʼuxul yoʼontone. Lik jkʼeltik kʼusi skʼan xal ti muʼyuk xkʼuxul oʼontonale.

Kʼalal chkaltik ti oy buchʼu muʼyuk xkʼuxul yoʼontone, chkaltik ti muʼyuk lek kʼusi tspase. Li buchʼu jech taje lek chil kʼalal oy svokol yantike o mu xkʼuxubaj ta yoʼonton akʼo mi chil ti oy svokolike. Jech kʼuchaʼal liʼe: kʼalal tstukʼibtas xnichʼon li jun totil sventa chopol chaʼi sba yuʼune, chakʼ ta ilel ti muʼyuk xkʼuxul yoʼontone. Pe mi tstukʼibtas ta skoj ti tskʼan chchanubtas o sventa chchabie, jaʼ lekil totil. Ta skoj ti mu jnaʼtik bakʼintik kʼu yuʼun jech tspasik jlome, xuʼ chopol kʼusi jnoptik ta stojolal, ti oy van jech kʼotem ta jtojolaltik eke.

Jkʼelbetik lek skʼoplal li srasonaltak laj kaltik ta slikebal ti kʼu yuʼun oy tsnopik ti muʼyuk xkʼuxul yoʼonton li Diose, ti jaʼ ta sventa nikel, nojelal ta voʼ o yantike xchiʼuk ti chal li Vivlia ti laj yakʼ kastigo Dios ta voʼnee. ¿Mi jaʼ van sprevail ti muʼyuk xkʼuxul yoʼonton li Diose?