NOPO ti oy jun avamigo ti lek chavilbe stalelale, pe oy kʼusi tspas ti mu xavaʼibe smelolale. Jlome chalik ti muʼyuk lek li kʼusi la spase, ti muʼyuk xkʼuxul yoʼontone. ¿Mi jech chanop ta anil kʼuchaʼal tsnop yantike o mi baʼyel van chachikinta li kʼusi chal avamigoe? Pe mi muʼyuk te oy sventa chalbot srasonale, ¿mi ta anil van chopol kʼusi chanop ta stojolal?

Kʼalal mu to kʼusi chanop ta stojolale, jakʼbo aba liʼe: «¿Mi xkojtikin lek li kamigoe? ¿Kʼu yuʼun lek chkilbe stalelal?». ¿Mi mu meleluk ti jaʼ baʼyel skʼan jakʼbe jbatik taje? ¿Mi mu jechuk skʼan jakʼbe jbatik ek sventa jnaʼtik mi melel ti muʼyuk xkʼuxul yoʼonton li Diose?

Xuʼ van mu xavaʼibe smelolal kʼu yuʼun oy kʼusitik spasoj Dios o ti yakʼoj to oyuke. Ep van buchʼutik chalboxuk ti muʼyuk xkʼuxul yoʼonton li Diose xchiʼuk xuʼ van tsujoxuk sventa xanop jech ek. ¿Mi chanop ta anil kʼusi chopol ta stojolal o mi baʼyel chavojtikin lek? Jaʼ van chakʼbot stakʼobil mi xavojtikin lek o mi moʼoj li Diose. Jakʼbo aba liʼe: «¿Kʼusi van spasoj Dios ta jtojolal?».

Mi ep vokolil anuptanoj ta akuxlejale, xuʼ van chanop ti maʼuk avamigo li Diose. Pe nopo liʼe: ¿mi jaʼ van ta smul Dios li kʼusitik chopol chkʼot ta akuxlejale o mi jaʼ chakʼ li kʼusitik leke? Jech kʼuchaʼal la jchantik xae, «li banquilal jpasmantal liʼ ta banamile» jaʼ li Satanase (Juan 12:​31). Jaʼ yuʼun, jaʼ ta smul jutuk mu skotoluk li vokolil oy ta balumile. Jech xtok, jlom jvokoltike jaʼ ta skoj ti jmulavilutike o ti mu jnaʼtik kʼusi chkʼot ta pasel ta jkuxlejaltike.

Pe, ¿kʼusi spasoj li Diose? Li Vivliae chal ti jaʼ la spas vinajel xchiʼuk Balumile; ti jaʼ spasoj xtok li jbekʼtaltik, ti labal sba kʼuyelan pasbile, jech xtok ti jaʼ oy ta skʼob li jkuxlejaltike (Salmo 124:8; 139:​14; Daniel 5:​23). ¿Kʼusi skʼan xal taje?

Jaʼ skʼan xal ti jech oy ta yoʼonton ti kuxulutike (Hechos 17:​28). Ti kʼuyelan kʼupil sba ta kʼelel li balumile, ti chijkʼanvane, ti oy kamigotike, li kʼusi ta jkʼupintike, ti xkaʼitik kʼusi chbakʼe, ti xkaʼitik kʼusi ta jpiktike xchiʼuk li smuil kʼusi ta jlajestike... skotol jaʼ matanal yakʼoj Dios (Santiago1:​17). Ta sventa li kʼusitik yakʼojbutike, ¿mi mu meleluk ti sta-o jkʼantik xchiʼuk jpat koʼontontik ta stojolal kʼuchaʼal junuk kamigotike?

Akʼo mi jech, xuʼ van vokol chavaʼi ti xapat avoʼonton ta stojolal Diose. Xuʼ van chanop ti mu to xavojtikin leke. Oy srasonal ti jech chanope. Li mantaletik echʼ liʼe mu onoʼox bu chalbe skotol srasonaltak ti mu jechuk ti muʼyuk xkʼuxul yoʼonton li Diose. Pe mi chkakʼtik persa yojtikinele ta me jtabetik sbalil. * Mi chavakʼ persa yojtikinele ta xachan li kʼusi melel ta stojolale. Mu meleluk ti muʼyuk xkʼuxul yoʼonton li Diose. Yuʼun xi chal li Vivliae: «Li Diose jaʼ stalel ta xcʼanvan o» (1 Juan 4:8).