NOPAJAN TA STOJOLAL DIOS
¿Mi oyutik van ta yoʼonton ta melel li Diose?
«Li kʼusi van mas vokol chkaʼie jaʼ ti muʼyuk jbalile». Taje jech laj yal jun ants ti tsnop ti muʼyuk kʼusi lek tspas sventa lek ch-ilat yuʼun li Jeovae. ¿Mi oy van jech avaʼioj aba junuk velta ek? Mi jeche, xuʼ van xi chajakʼbe abae: «¿Mi oyun van ta yoʼonton ta melel li Diose?». Li stakʼobile jaʼ ti oyutik ta yoʼontone, taje jech laj yal Jesús. (Kʼelo Juan 6:44.)
Jaʼ noʼox xojtikin lek stuk Jesús li stalelal xchiʼuk kʼusi tskʼan yoʼonton li Jeovae (Lucas 10:22). ¿Kʼusi van laj yal Jesús ta sventa taje? Xi laj yale: «Muʼyuc bochʼo xuʼ yuʼun ta xtal ta jtojol me muc icʼbiluc tal yuʼun li Jtot ti la stacun tale». Ta melel, ti kʼu noʼox yelan xuʼ xijkʼotutik ta yajtsʼaklom Jesús xchiʼuk ta yajtunel li Jtotik ta vinajele, jaʼ ti xikʼutik tal stuk li Jeovae (2 Tesalonicenses 2:13). Mi xkaʼibetik lek smelolal taje, solel chkʼot ta koʼontontik ta melel ti oyutik ta yoʼonton ta jujuntal li Diose.
¿Kʼusi skʼan xal ta melel kʼalal laj yal Jesús ti jaʼ ta xikʼutik tal stuk li Jeovae? Taje maʼuk skʼan xal ti tsujutik sventa xijtun ta stojolal li Jeovae. Li stuke yakʼoj jtʼujtik kʼusi ta jkʼan ta jpastik ta jujuntal, muʼyuk tsujutik (Deuteronomio 30:19, 20). Jech kʼuchaʼal laj yal jun krixchano ti lek xchanoje, li jun krixchanoe jaʼ noʼox xuʼ spas ta mantal yoʼonton, muʼyuk buchʼu yan xuʼ spas ta mantal. Li ta smiyonal noʼox krixchanoetik ta Balumile, li Jeovae jaʼ tsaʼ li buchʼu chlokʼ ta yoʼonton yojtikinele (1 Crónicas 28:9). Vaʼun mi la sta xaʼoxe, labal sba ti kʼuyelan tstijbe yoʼontone. ¿Kʼuxi ti jech taje?
Kʼalal oy jun krixchano tskʼan chojtikin ta melel li Diose, chikʼ talel ta stojolal (Hechos 13:48, TNM). ¿Kʼuxi van tspas taje? Jaʼo kʼalal chaʼi li lekil aʼyej ta Skʼop Diose, jaʼ tskʼopon stuk yaʼeluk li krixchanoe xchiʼuk ta xchʼul espiritu ti jaʼ chkoltaat sventa xaʼibe smelolal li Skʼop Diose xchiʼuk ti xakʼ ta xkuxlejale (1 Corintios 2:11, 12). Ti muʼyukuk tskoltautik li Diose, mu xijkʼot ta yajtunel, mi jaʼuk ta yajtsʼaklom Xnichʼon ti jechuke.
«Li jun krixchanoe jaʼ noʼox xuʼ spas ta mantal yoʼonton, muʼyuk buchʼu yan xuʼ spas ta mantal»
Vaʼun chaʼa, ¿kʼusi ta jchantik ta stojolal Jeova li kʼusi laj yal Jesús ta Juan 6:44? Ti jaʼ chikʼ talel kʼalal chil ti oy kʼusi lek ta yoʼonton li jun krixchanoe xchiʼuk ti oyutik ta yoʼonton ta jujuntal li Diose. Ti laj yaʼibe smelolal li kʼusi melel taje, li ants ti laj kalbetik skʼoplal ta slikebale jaʼ patbat-o yoʼonton. Xi chale: «Ti chitun ta stojolal Jeovae jaʼ jun mukʼta matanal ti mu kʼusi xkoʼolaj-oe, ti la stʼujun sventa chitun ta stojolale yuʼun tsots jkʼoplal chilun». Li kʼusi melel taje ta jkʼankutik ti jaʼ skoltaot sventa xlokʼ ta avoʼonton yojtikinel li Diose.
