¿Mi oyutik van ta yoʼonton ta melel li Diose o mi mu van kʼusi sventa-o li jvokoltike? Li kʼuyelan tstakʼ Vivlia taje tspat koʼontontik. Ta melel, chchabiutik xchiʼuk tskʼan ti jkʼupin li jkuxlejaltike. Ta jtabetik sbalil jujun kʼakʼal li slekil yoʼonton Diose, akʼo mi oy jlom ti mu snaʼ stojik ta vokole. Jkʼelbetik skʼoplal kʼusi laj yal li jtakbol Pabloe. (Kʼelo Hechos 14:16, 17.)

Xi laj yalbe buchʼu muʼyuk chichʼik ta mukʼ Dios ta Listra li Pabloe: «Li cristianoetic ta voʼonee iʼacʼbat spasic yuʼun Dios li cʼusi tscʼan yoʼnton stuquic jujunique. Pero mu yuʼunuc muc xacʼ sba ta ilel ti ta melel oy li Diose, yuʼun oy cʼusi lec tspas. Jaʼ ta xacʼ tal voʼ. Ta xacʼ satinuc li cʼusitic chichʼ tsʼunele, yuʼun jech ta jta jveʼeltic, jech xcuxet noʼox coʼntontic». ¿Kʼu van yelan laj yaʼiik ti kʼusi laj yal Pablo li krixchanoetik taje?

Li krixchanoetik ta Listrae lek xojtikinik li kʼusi laj yal Pabloe. Yuʼun li bu nakalike lek stsʼunolajik, chchʼi kʼusitik xchiʼuk yox li yosilalike. Akʼo mi jech, vulesbat ta sjolik yuʼun Pablo ti jaʼ Yakʼoj Dios ti chakʼ voʼe xchiʼuk ti lek xchʼi li kʼusitik chichʼ tsʼunele. Jaʼ yuʼun, kʼalal lek chakʼ sat li kʼusitik tstsʼunik xchiʼuk tskʼupinik slajesele, jaʼ tstabeik sbalil li slekil yoʼonton Diose.

Li kʼusi albatik yuʼun Pablo li krixchanoetik ta Listrae oy kʼusi tsots skʼoplal xuʼ jchantik ta sventa li Jeova Diose.

Yakʼoj jtʼuj jtuktik kʼusi ta jkʼantik li Jeovae. Li krixchanoetik ta skotol lumetike «iʼacʼbat spasic yuʼun Dios li cʼusi tscʼan yoʼnton stuquic jujunique». Jun livro ti jaʼ sventa li buchʼutik tsjelubtasik ta yan kʼop li Vivliae chal ti jpʼel kʼop taje xuʼ jaʼ skʼan xal «spasel kʼusi tskʼanik» o «spasel li kʼusi lek yalojike». Li Jeovae muʼyuk tsujvan sventa xkichʼtik ta mukʼ. Yuʼun yakʼoj jtʼujtik li kʼusi ta jkʼan ta jpas ta jkuxlejaltike (Deuteronomio 30:19).

Oy ta yoʼonton ti xkojtikintik li Jeovae. Li jtakbol Pabloe laj yal ti mu jechuk ti «muc xacʼ sba ta ilel ti ta melel oy li Diose». Li livro laj kalbetik xa skʼoplale chal xtok ti xuʼ la xi laj yichʼ jelubtasele: «Laj yakʼ sba lek ta ilel ta stojolal krixchanoetik ti kʼusi Diosal li stuke». Li ta kʼusitik spasoj Diose chakʼ ta ilel «li cʼusi muʼyuc toʼox yacʼoj ta ilele» ti te tsakal skʼoplal li slekil yoʼonton, spʼijil, sjuʼel xchiʼuk ti chkʼanvane (Romanos 1:20). Li ta Vivliae te to chakʼ sba ta ojtikinel mas li Diose (2 Timoteo 3:16, 17). ¿Mi mu jamaluk ta aʼiel ti oy ta yoʼonton ti xkojtikintik li Diose?

Oy ta yoʼonton ti xijmuyubajutik li Jeovae. Li jtakbol Pabloe laj yal ti «jech ta jta jveʼeltic, jech xcuxet noʼox coʼntontic» yuʼun li Diose. Akʼo mi jun jmulavil ti mu snaʼ stojbe ta vokol li Jeovae ta onoʼox skʼupin slajesel li kʼusi lek chaʼie xchiʼuk xmuyubaj noʼox. Akʼo mi jech, li Diose tskʼan ti jtatik li muyubajel ti muʼyuk spajebe, taje jaʼ noʼox xuʼ jtatik mi ta jchantik li kʼusi melel ta stojolal Diose xchiʼuk mi ta jchʼunbetik smantale (Salmo 144:15; Mateo 5:3).

Jkotoltik ta jtabetik sbalil jujun kʼakʼal li slekil yoʼonton Jeovae. ¿Kʼu yuʼun mu xachan mas sventa kʼuyelan xuʼ xatojbe ta vokol Dios ti «jech ta jta jveʼeltic, jech xcuxet noʼox coʼntontic» yuʼune?