Xuʼ van mu xapat avoʼonton ta stojolal junuk relijion ta skoj ti oy chibaj avoʼonton yuʼune. Pe xuʼ me xachʼun ti oy jun relijion ti xuʼ xapat-o avoʼontone. Kʼalal liʼ toʼox oy ta Balumil li Jesuse la slikes jvokʼ yajtsʼaklom, taje la xchanubtas sventa xakʼ ta xkuxlejalik li smantaltak Diose. Li avie oy to li melel yajtsʼaklom Cristoe, chakʼik persa sventa jechuk xkuxiik kʼuchaʼal chal li mantaletik sventa yajtsʼaklom Cristoe. ¿Buchʼutik taje?

Xi chal li Estelle ti laj kalbetik skʼoplal ta baʼyel mantale: «Jaʼ to laj kaʼibe smelolal Vivlia kʼalal lik jchan Vivlia xchiʼuk li stestigotak Jeovae. Anil noʼox laj kaʼibe smelolal li kʼusi chal Juan 8:32: “Chavotquinic o li cʼusi melele. Ta sventa li cʼusi melele chaloqʼuic o ta mozoil”».

Xi chal li Ray eke: «Laj yakʼik kil ta Vivlia li stestigotak Jeova ti maʼuk chakʼ jvokoltik li Diose. Laj kil ti akʼo mi oy lek srasonal yuʼun ti yakʼoj to oyuk vokolile, yaloj ti poʼot xa slajesbe skʼoplale».

Tsots ta pasel li kʼusi leke, yuʼun jutuk mu skotoluk krixchanoetik mu jechuk tspasik. Pe spas me kuʼuntik. Ep buchʼutik tskʼanik koltael sventa xaʼibeik smelolal xchiʼuk ti xakʼ ta xkuxlejalik li kʼusi chchanubtasvan Vivliae. Jech oxal, jujun xemana ta smiyonal noʼox chakʼik chanubtasel li stestigotak Jeovae xchiʼuk ta moton jech tspasik ta spʼejel Balumil. Ep buchʼutik yakal chchanik li kʼusi chchanubtasvan ta melel li Vivliae, jaʼ yuʼun yakal xa chnopajik ta stojolal li Jpasvanej kuʼuntike xchiʼuk mas xa xmuyubajik. *

Mi la akʼopon ta yan velta li stestigotak Jeovae jakʼbo kʼu yuʼun spatoj yoʼonton ta srelijionik. Kʼelbo lek skʼoplal li kʼusi chakʼik ta chanel xchiʼuk stalelalike, vaʼun te chavakʼ venta mi oy junuk relijion ti xuʼ xapat-o avoʼontone.