Li relijione, ¿mi tsots skʼoplal chilik li paskʼope?
Li Albertoe echʼ ta soltaroal jutuk mu lajunebuk jabil. Xi chale: «Li palee xi chalbunkutik sventa chakʼ bendisione: “Te xchiʼinoxuk Dios”. Pe xi ta jnope: “Chbat milvankun chkaʼie, pe li Vivliae chal ti mu xijmilvane”».
Ray, jaʼ jun vinik ti abtej ta soltaroal ta nab kʼalal jaʼo Xchibal Mukʼta Paskʼop ta spʼejel Balumile. Jun veltae xi la sjakʼbe li palee: «Voʼote chtal akʼopon Dios ta jtojolalkutik xchiʼuk ti xkuch kuʼunkutik li paskʼope. ¿Mi mu jechuk tspas li kajkontrakutik eke?» Li palee laj yal ti mu xkaʼibetik lek smelolal li kʼusitik tspas Kajvaltike.
Mi mu xkʼot ta avoʼonton li stakʼobil taje, mu atukuk.
¿KʼUSI CHCHANUBTASVAN LI VIVLIAE?
Li Jesuse laj yal jun li ta smantal Dios ti mas tsots skʼoplale, xi laj yale: «Cʼano achiʼil jech chac cʼu chaʼal cʼux ta avoʼnton abecʼtal atuc» (Marcos 12:31). ¿Mi jaʼ noʼox van laj yal Jesús ti jkʼantik li buchʼu bu koʼol nakalutik o koʼol jlumaltike? Moʼoj. Xi laj yalbe li yajtsʼaklomtake: «Jaʼuc me jech chacʼanan abaic li voʼoxuque. Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:34, 35). Ti jech tskʼan sbaik ta jujuntale toj lek tajek xvinaj, yuʼun jaʼ chichʼik-o ojtikinel. Maʼuk noʼox ti muʼyuk tsmil xchiʼilike, yuʼun xuʼ van xakʼ xkuxlejalik ta skoj yantik.
Li baʼyel yajtsʼaklom Cristoe jech la spasik kʼuchaʼal laj yal Jesuse. Li The Encyclopedia of Religion xi chale: «Li baʼyel jbeiltasvanejetik ta relijione, jech kʼuchaʼal, Tertuliano xchiʼuk Origenese laj yalik ti mu lekuk chilik milvanej li yajtsʼaklom Cristoe, taje jaʼ koltaatik sventa muʼyuk la stikʼ sbaik ta soltaroal ta Roma».
¿MI JECH TSPASIK LI STESTIGOTAK JEOVAE?
Ta skoj ti nakalik ta jutuk mu skotoluk lumetik li stestigotak Jeovae oy junantik ti bu nakalike skontrainoj sba li slumalike. Pe yakʼojbeik yipal ti oyuk-o yuʼunik li kʼusi chichʼik-o ojtikinele, jaʼ ti skʼanoj sbaike.
¿Mi chchanubtasvanik sventa xijkʼanvan ta melel kʼuchaʼal yajtsʼaklom Cristo li jbeiltasvanejetik ta relijione?
Jech kʼuchaʼal liʼe, li ta Ruanda ta sjabilal 1994, lik paskʼop ta skoj ti jelel stsʼunbalik li j-hutuetik xchiʼuk jtutsietike, pe li stestigotak Jeovae muʼyuk la stikʼ sbaik ta paskʼop. Li jun stestigo Jeovae la xchabi yan stestigo Jeova ti yan-o stsʼunbale, oy bakʼintik ti laj yakʼ ta vokol xkuxlejalike. Li chaʼvoʼ stestigotak Jeova j-hutuetike la xchabi yermanoik ti jaʼik li jtutsietike, vaʼun kʼalal laj yichʼik chukele xi albatik yuʼun soltaroetik ta Interahamwe li chaʼvoʼ j-hutuetike: «Skʼan xavichʼik milel, yuʼun la akoltaik sventa xjatav li jtutsietike». Kʼux ta alel, pe milat xchaʼvoʼal li j-hutuetik ti jaʼ stestigotak Jeovae (Juan 15:13).
Kʼusi chanop ta sventa liʼe: ¿Mi jech tspasik stestigotak Jeova jech kʼuchaʼal laj yal Jesús ti skʼan xkʼanvanik akʼo mi xichʼ svokolike?
