Li relijione, ¿mi tsots skʼoplal chilik li takʼine?
Li Estelle * oy toʼox tajek ta yoʼonton li relijione xchiʼuk oy ep yalab. Xi chal li Estelle: «Laj kalbe ti ta jkʼan ta jchan kaʼi Vivlia li jbabe ta jrelijione». Pe muʼyuk bu albat ti chchanubtasate. Ta tsʼakale muʼyuk xa xbat li ta srelijione. Xi to chal xtoke: «Li jbabeetik ta jrelijione laj yalbeikun mi mu xuʼ kuʼun xibate jaʼuk noʼox la jtakbeik batel takʼin. Vaʼun xi la jnope: “Muʼyuk tsots jkʼoplal chilikun chaʼa, jaʼ noʼox tskʼanik li jtakʼine”».
Angelina ti oy onoʼox ta yoʼonton li relijione xi chale: «Kʼalal chibat ta chʼulnae oxib to velta chjelav li moch sventa tskʼanik-o takʼine, vaʼun ta jujun veltae persa chkakʼkutik. Tee ta onoʼox skʼanik takʼin. Xi la jnope: “Muʼyuk te ta stojolalik li s-espiritu Diose”».
¿Mi tskʼanik o tsujvanik ta yakʼel takʼin li relijionetik bu nakalote? ¿Mi chal Vivlia ti jech skʼan pasele?
¿KʼUSI CHCHANUBTASVAN LI VIVLIAE?
Li buchʼu la slikes ti oy li stsobobbail yajtsʼaklomtak Cristo, ti jaʼ li Jesuse, xi laj yale: «Amotonic laj cacʼboxuc, jech ta matanal me xacoltavanic ec» (Mateo 10:8). Li mantaletik ta Vivliae mu stakʼ manel, jaʼ yuʼun buchʼuuk noʼox xuʼ xchan mi oy ta yoʼontone.
¿Kʼuxi toʼox tstaik takʼin chtun ta tsobobbail li baʼyel yajtsʼaklomtak Cristoe?
Chakʼik ta jujuntal ti «cʼu yepal acʼbat snaʼ yuʼun ti sjol yoʼnton, ti maʼuc xchibal yoʼntone, ti maʼuc sujbile, yuʼun ta xcʼuxubine yuʼun Dios ti buchʼu xmuyubaj ta xaqʼue» (2 Corintios 9:7, Ch). Li jtakbol Pabloe xi laj yale: «Laj avilic ti ta cʼacʼal ta acʼubal tsots liʼabtejcutic sventa chicuxicutique, yuʼun jech muc xcacʼcutic avocolic ti cʼalal te la jcholcutic avaʼyic li Lequil Aʼyej yuʼun Diose» (1 Tesalonisenses 2:9). Abtej ta stsʼisel nukul sventa karpanaetik yoʼ sta kʼusi chtun yuʼun ta cholmantal li jtakbol Pabloe (Hechos 18:2, 3).
¿MI JECH TSPASIK LI STESTIGOTAK JEOVAE?
Li Salon sventa Tsobobbail ti jaʼ jech sbi li bu tstsob sbaik li stestigotak Jeovae lek noʼox sba ta kʼelel. ¿Bu tstaik li takʼin chtun yuʼunik ta stsobobbailike? Muʼyuk tsjelubtasik moch mi jaʼuk tstsʼibaik karta sventa skʼanik matanal takʼin. Li buchʼu oy sbalil chil li mantal ch-echʼe, xuʼ xbat stikʼ matanal takʼin li ta xkaxail ti te oy ta salone.
¿Bu van tstaik li takʼin chtun yuʼunik ta jujun relijione?
Li revista liʼ eke lajem takʼin yuʼun sventa laj yichʼ pasel imprimir xchiʼuk ti laj yichʼ takel tale. Pe muʼyuk bu chata ti te chal ti chichʼ kʼanel takʼine. Li kʼusi tsots skʼoplal chale jaʼ li kʼusi chchanubtasvan Vivliae.
Kʼusi chanop ta sventa liʼe: ¿Mi jech chichʼ pasel kʼuchaʼal laj yal Jesuse xchiʼuk mi jaʼ chichʼ chanbel li baʼyel yajtsʼaklom Cristoe?
^ par. 2 Jlom biiletik li ta mantaletik liʼe jelbil.
