Micaela: Li avie yakal chkakʼbe yil skotol alakʼnatak li jun tratado liʼe. Jaʼ sbi ¿Mi cha kʼan cha naʼ li kʼusi melele? Liʼe jaʼ avuʼun.

Sofía: ¿Mi jaʼ chalbe skʼoplal relijion?

Micaela: Jaʼ. Oy vakib sjakʼobil ti te cholol tal li ta baʼyel pajinae. Li sjakʼobiltak liʼe...

Sofía: Ta jtuchʼ ta be li aloʼile, yuʼun jecheʼ chachʼay akʼakʼal mi chachiʼinun ta loʼile.

Micaela: ¿Kʼu yuʼun ti jech chavale?

Sofía: Chkalbot ta jamal ti xichibet mi oy ta melel li Diose.

Micaela: Kolaval ti jamal chaval li kʼusi chanope. ¿Mi jech onoʼox anopoj taje?

Sofía: Moʼoj, yuʼun chikʼot toʼox ta chʼulna kʼalal bikʼitun toʼoxe. Pe voʼne xa tajek ti muʼyuk xa chikʼote.

Micaela: A, vaʼ yelan. Muʼyuk kaloj jbi batsʼil, li jbie jaʼ Micaela.

Sofía: Li voʼone jaʼ jbi Sofía.

Micaela: Lek chkaʼi ti chakojtikinote.

Sofía: Jech chkaʼi ek.

Micaela: Maʼuk lital sventa ta jsujot ta xchʼunel li kʼusi jchʼunoje. Akʼo mi jech, oy kʼusi ta jkʼan ta jnaʼ. ¿Mi jaʼ ta skoj ti oy kʼusi kʼotem ta pasel ta atojolal ti mu xachʼun ti oy ta melel li Diose?

Sofía: Jaʼ. Yuʼun oy xa ta vuklajuneb jabil ti laj ta karo li jmeʼe.

Micaela: Toj chopol chkaʼi li kʼusi kʼot ta pasele. ¿Mi toj tsots laj li ameʼe?

Sofía: Tsots laj, yuʼun mu xa xbakʼ sbekʼtal kom-o.

Micaela: Toj chopol li kʼusi kʼot ta stojolale. Toj kʼux van chavaʼi ti jech taje.

Sofía: Jech, kʼux tajek chkaʼi. Jaʼ yuʼun ta jnopilan, mi oy ta melel li Diose, ¿kʼu yuʼun ti jech laj yakʼ kʼotuk ta pasele? ¿Kʼu yuʼun chakʼ ti xkil jvokoltik jech li Diose?

Micaela: Li kʼuyelan chavaʼi abae xchiʼuk li kʼusitik chajakʼe stalel onoʼox jech. Kʼalal chkil jvokoltike ta onoʼox jakʼbe jbatik ti kʼu yuʼun jeche. Ta melel, oy onoʼox tukʼil viniketik xchiʼuk antsetik ti chalbe skʼoplal Vivliae jech la sjakʼik ek.

Sofía: ¿Mi jech ta melel?

Micaela: Jech. ¿Mi xuʼ xkakʼ avil ta Vivlia junuk skʼelobil?

Sofía: Lek chkaʼi maʼ taje.

Micaela: Kʼelo avil kʼusi la sjakʼbe Dios li tukʼil j-alkʼop Habacuc ti te ta jtatik ta Habacuc kapitulo 1 versikulo 2 xchiʼuk 3, xi chale: «Mucʼul Dios ¿Baqʼuin to chavaʼibun jcʼop ti liʼ xiʼavet o ta atojol, ti yoquel mu xatacʼbun oe? ¿Baqʼuin to chacoltavan ti liʼ chicʼopoj ta scoj ti oy ep utsʼintaele? ¿Cʼu yuʼun ti chavacʼbun quil puru vocole?». Li voʼote, ¿mi jaʼ jechtik li kʼusitik ajakʼoj eke?

Sofía: Jech.

Micaela: Li Diose muʼyuk onoʼox laj yut Habacuc ti jech la sjakʼe, mi jaʼuk laj yalbe ti skʼan oyuk mas xchʼunel yoʼontone.

Sofía: Labal sba maʼ taje.

Micaela: Li ta Vivliae chal ti yiloj Dios ti chkil jvokoltike xchiʼuk ti tstsak ta ventae.

Sofía: ¿Kʼusi skʼan xal taje?

Micaela: Chkakʼ avil jun skʼelobil liʼ ta Éxodo 3:7. ¿Mi xuʼ xakʼel tal kʼusi chal?

Sofía: Lek oy. Xi chale: «Pero li Mucʼul Diose te to chloʼilaj o: “Quiloj scotol cʼu xʼelan xcʼuxul  svocolic li jteclum cuʼun te ta Egiptoe. Caʼyoj ti xvocoletic ta jtojol ta scoj li bochʼotic tsujvanic ta abtele, xchiʼuc jnaʼoj lec scotol ti cʼu xʼelan chichʼic vocole”».

Micaela: Kolaval. Jech kʼuchaʼal chal liʼe, ¿mi yiloj ti chil svokol li steklumale?

Sofía: Yaʼeluke yiloj.

Micaela: Maʼuk ti jutuk noʼox chakʼ venta li kʼusitik chkʼot ta pasele. Kʼelo yan velta kʼusi chal ta slajeb li versikuloe. Xi laj yal li Diose: «Jnaʼoj lec scotol ti cʼu xʼelan chichʼic vocole». Taje, ¿mi chakʼ ta ilel ti jaʼ jun Dios ti muʼyuk xkʼuxul yoʼontone?

Sofía: Moʼoj ta melel.

Micaela: Jech taje, yuʼun li Diose maʼuk noʼox chakʼ venta, moʼoj, yuʼun kʼux chaʼi ek kʼalal chkil jvokoltike.

Sofía: Jech avaʼuk.

Micaela: Ti jnaʼojtik xa taje jkʼelbetik to skʼoplal kʼalal laj yil svokolik yan velta li steklumal Diose. Taje te ta jtatik ta Isaías 63:9. Ta slikebal li versikuloe xi chale: «Scotol li svocolic toʼoxe jaʼ la svocolin stuc scotol». ¿Mi xuʼ xkaltik un chaʼa ti kʼux laj yaʼi ek kʼalal laj yil svokol li steklumale?

Sofía: Yaʼeluke kʼux laj yaʼi ek.

Micaela: Melel taje, yuʼun oyutik tajek ta yoʼonton li Diose xchiʼuk chopol tajek chil ti oy jvokoltike. Mi oy jvokoltike chil svokol ek.

Micaela: Yoʼ to mu xibate oy to kʼusi ta jkʼan chkakʼbot avil.

Sofía: Lek oy.

Micaela: Jnoptik ta sventa li sjuʼel Dios ti chal ta Vivliae. Li teksto ta jkʼan ta jkʼelbote jaʼ Jeremías 10:12. ¿Mi xuʼ xakʼel tal avokoluk?

Sofía: Xuʼ. Xi chale: «Li Mucʼul Diose ta svuʼel la spas li banamile; ta sbijil la xchapan, la snacan lec li osil banamile, xchiʼuc ta sventa sbijil la xlichʼan batel li vinajele».

Micaela: Kolaval. Jnoptik jlikeluk kʼusi skʼan xal li teksto liʼe. ¿Mi toj ep van sjuʼel la stunes Dios xanaʼ sventa tspas li labal sba vinajelbalumil xchiʼuk li kʼusitik oye?

Sofía: Ta melel toj ep sjuʼel.

Micaela: Vaʼun chaʼa, mi oy sjuʼel sventa la spas li kʼusitik oy ta jpat jxokontike, ¿mi mu oyuk sjuʼel xanaʼ xtok sventa oyuk ta skʼob li spasbentake?

Sofía: Ta melel oy.

Micaela: Nopbo skʼoplal jlikeluk li ameʼe. ¿Kʼu yuʼun kʼux chavaʼi ti chil svokole?

Sofía: Yuʼun jkʼanoj li jmeʼe.

Micaela: Ti oyuk ajuʼel sventa xachʼaybe svokol li ameʼe, ¿mi chapas ti jechuke?

Sofía: Ta jpas.

Micaela: Nopo kʼusi xuʼ jchantik yuʼun taje. Li Vivliae chakʼ ta chanel ti yiloj ti oy jvokoltik li Diose, ti oyutik ta yoʼontone xchiʼuk ti mu albajuk kʼu to yepal li sjuʼele. Jnoptik un chaʼa, li Diose solel tspajtsan to sba sventa mu slajes ta anil li jvokoltike.

Sofía: Taje mi jutebuk toʼox jech jnopoj.

Micaela: ¿Mi oy van lek srasonal yuʼun xanaʼ ti kʼu yuʼun muʼyuk to slajesoj li jvokoltike? *

Sofía: Chkal noʼox voʼone oy srasonal yuʼun.

Micaela: Chbakʼ chkaʼi li atelefonoe, pe mi chakʼane chisut tal ta yan velta sventa xkalbetik mas skʼoplal taje.

Sofía: Kolaval, lek chkaʼi mi chatale. *