Li baʼyel vinik ti jaʼ li Adane ta sienal noʼox jabil kuxi. Pe kʼunkʼun lik malubuk, vaʼun cham. Ta skoj taje li krixchanoetike lik sabeik skʼoplal sventa mu xmalubik. Pe muʼyuk buchʼu ti mu snaʼ xchame. ¿Kʼu yuʼun? Yuʼun li Adane malub xchiʼuk cham ta skoj ti la spas smule, jaʼ xkaltik, la stoy sba ta stojolal Dios. Li voʼotik eke chijmalub xchiʼuk chijchamutik, taje jaʼ ta skoj ti la sjelubtasbutik mulil li Adane. (Kʼelo Génesis 5:5; Romanos 5:12.)

Sventa jtatik li kuxlejal sbatel osile skʼan oyuk buchʼu spojutik (Job 33:24, 25). Li jun pojelale jaʼ li kʼu yepal stojol chichʼ akʼel sventa chichʼ koltael jun krixchano ti chukbil batele, li voʼotik eke skʼan xkichʼtik pojel lokʼel li ta lajele (Éxodo 21:29, 30). Kʼalal laj yakʼ xkuxlejal li Jesuse la stoj li jmultike. (Kʼelo Juan 3:16.)

Mu jkotoltikuk xuʼ xkichʼtik pojel lokʼel li ta chameletik xchiʼuk ta malubele. Yuʼun li buchʼu tstoy sba ta stojolal Dios jech kʼuchaʼal la spas li Adane muʼyuk tsta xkuxlejal. Jaʼ noʼox tskʼupin xkuxlejalik ta sbatel osil li buchʼutik tstaik perton ta skoj li smulike. (Kʼelo Isaías 33:24; 35:3-6.)

Sventa jtatik pertone oy kʼusi skʼan jpastik. Skʼan xkojtikintik Dios, pe sventa taje skʼan jchantik li Vivliae. Jaʼ te ta jchantik kʼuxi xuʼ lek jkʼupin jkuxlejaltik, kʼuxi xuʼ lek xilutik li Diose xchiʼuk ti kʼuxi xuʼ jtatik li kuxlejal sbatel osile. (Kʼelo Juan 17:3; Hechos 3:19.)