Li Vivliae mu xkoʼolaj-o xchiʼuk li yan livroetike. Ta smiyonal noʼox yichʼoj pasel imprimir ta sienal kʼopetik li Vivliae. Li mantaletik yichʼoj talele oy sjuʼel sventa tsjelbe xkuxlejal li krixchanoetike. (Kʼelo 1 Tesalonicenses 2:13; 2 Timoteo 3:16.)

Jnaʼojtik ti likem tal ta stojolal Dios li Vivliae, yuʼun lek jamal chal li kʼusi chkʼot ta pasel ta tsʼakale. Mi junuk krixchano spas yuʼun ta stuk noʼox jech taje. Jun skʼelobile jaʼ ta sventa li slivroal Isaiase. Te laj yichʼ tael jun skopiail slivroal Isaías ta jun chʼen te nopol ta Nab Muerto, ti yichʼoj tsʼibael mas xa ta sien jabil kʼalal skʼan toʼox xvokʼ li Jesuse. Li livro taje te laj yal ti slumal Babiloniae muʼyuk xa buchʼu te chnaki. Taje jaʼo kʼot ta pasel kʼalal epal jabil xaʼox slajel li Jesuse. (Kʼelo Isaías 13:19, 20; 2 Pedro 1:20, 21.)

Li Vivliae jalij 1,600 jabil kʼalal laj yichʼ tsʼibaele. Te van 40 viniketik la stsʼibaik li Vivliae xchiʼuk jun noʼox sloʼilal laj yalbeik skʼoplal ti muʼyuk bu tsvalopatin sba li kʼusi la stsʼibaike. ¿Kʼuxi kʼot ta pasel taje? Yuʼun jaʼ laj yal Dios li kʼusi la stsʼibaike. (Kʼelo 2 Samuel 23:2.)

Li Diose la skʼoponan ta stojolal anjeletik junantik velta li buchʼutik la stsʼibaik li Vivliae, akʼbatik yil yuʼun Dios o ta xvayichik. Jutuk mu skotoluk velta, li Diose jaʼ laj yakʼbe ta snopbenik kʼusi tstsʼibaik li jtsʼibajometike xchiʼuk laj yakʼ ti akʼo yal ta skʼop stukike. (Kʼelo Apocalipsis 1:1; 21:3-5.)