Li Smita * ti 35 sjabilal ti te toʼox naki ta Daca (Bangladés), lek ojtikinbil ta skoj ti lek stalelale. Skotol xojtikinik kʼuchaʼal jun ajnilal ti lek noʼox xmuyubaje xchiʼuk ti lek x-abtej ta skoltael krixchanoetik yoʼ xchanbeik li smantaltak Diose. Akʼo mi jech, li yutsʼ yalaltake solel laj yat yoʼontonik kʼalaluk tsake ta chamel li Smita ti mu sta jun xemana kuch yuʼune.

Li James xchiʼuk yajnil ti te van 35 sjabilalike lek laj yichʼik ojtikinel ta skoj ti jech stalelalik kʼuchaʼal li Smitae. Oy xa sjayibal jabil ay svulaʼanik jayvoʼuk yamigoik ta stukʼil slokʼeb Kʼakʼal ta Estados Unidose, pe muʼyuk xa bu sutik li ta snaik ti te xkom ta Nueva Yorke yuʼun lajik ta karo, vaʼun li yutsʼ yalal xchiʼuk li yamigotakike mu xa noʼox x-echʼ li at-oʼonton laj yaʼiike.

Buchʼuuk xa noʼox chakʼ venta ti ta buyuk xa noʼox oy li vokoliletik xchiʼuk li choplejale. Li paskʼopetike smiloj ep soltaroetik xchiʼuk krixchanoetik. Ta skoj li milbail xchiʼuk li majbaile ta smilal xa noʼox krixchanoetik chamemik ti muʼyuk smulike. Li kʼusi xibal sba chkʼot ta jtojolaltike, li tsatsal chameletike maʼuk tsjakʼ jayib jabilaltik xchiʼuk mi jkʼulejutik o povreutik. Li nikel, nojelal ta voʼ o yan kʼusitike toj ep slajesoj lumetik. Jech xtok, li kʼusi chopol chichʼ nopel ta anil ta stojolal yantike xchiʼuk li kʼusitik muʼyuk tukʼe ta buyuk xa noʼox xvinaj. Xuʼ van oy anuptanoj jtosuk li vokoliletik taje.

Jaʼ yuʼun stalel ti xi ta jakʼbe jbatike:

• ¿Kʼu yuʼun oy kʼusi chopol tsnuptan li lekil krixchanoetike?

• ¿Mi jaʼ ta smul li Diose?

• ¿Mi ta jech noʼox chkʼotanuk li vokoliletike o mi jaʼ ta skoj li kʼusitik tspasik li krixchanoetike?

• ¿Mi jaʼ van ta skoj karma, jaʼ xkaltik, li kʼusitik spasojik ta jkʼol toʼox xkuxlejalike?

• Ti mi oy jun Dios ti skotol xuʼ yuʼune, ¿kʼu yuʼun muʼyuk chchabi li lekil krixchanoetike?

• ¿Mi ta van xlaj junuk kʼakʼal li choplejal xchiʼuk li vokoliletike?

Sventa jnaʼtik taje skʼan jtakʼtik chib sjakʼobil ti tsotsik skʼoplale: ¿kʼu yuʼun oy kʼusitik chopol chkʼot ta pasel?, xchiʼuk ¿kʼusi tspas Dios ta sventa taje?