«LI Diose jaʼ jun Espiritu», mu xkiltik (Juan 4:24, TNM). Akʼo mi jech, li Vivliae chal ti oy la buchʼutik laj yilike (Hebreos 11:27). ¿Mi stakʼ van jkʼeltik ta melel li «Dios ti mu xquiltique»? (Colosenses 1:15.)

Kʼalal maʼsat chvokʼ li jun krixchanoe, ¿mi mu van xaʼibe smelolal li kʼusitik chkʼot ta pasel ta spat xokone? Mu jechuk. Yuʼun ep ta tos kʼuxitik xuʼ snaʼ kʼu yelan li krixchanoetike xchiʼuk li kʼusitik oy ta spat xokone. Xi laj yal jun vinik ti maʼsate: «Maʼuk chkiltik-o osil li ta jsatike, jaʼ chkiltik-o osil li ta jnopbentike».

Jaʼ jech ek li voʼotike, akʼo mi mu xkil ta jsatik li Diose, oy yan kʼuxi xuʼ xkiltik (Efesios 1:18, Ch). Jchantik batel oxtos ti kʼuxi xuʼ jkʼeltike.

Li buchʼutik maʼsate mas chpʼijub li xchikinike xchiʼuk li kʼu yelan chaʼiik li kʼusitike, yoʼ snaʼik kʼu yelan li kʼusitik oy ta spat xokonike. Jaʼ jech ek li voʼotike xuʼ jtunes jsatik, jchikintik, jniʼtik, kʼusitik ta jpiktik xchiʼuk smuil kʼusitik sventa jchanbetik skʼoplal li kʼusitik ta jpat jxokontike, vaʼun jaʼ jech ta jnabetik skʼoplal li Dios ti jaʼ la spas li kʼusitik taje. «Jaʼo noʼox cʼalal imeltsaj banamil[e] laj yacʼ ta ilel [Dios] li [«stalelaltak», TNM] [ti] muʼyuc toʼox yacʼoj ta ilele [...]. Ta sventa cʼusitic spasoj, jech ivinaj ti jaʼ Diose.» (Romanos 1:20.)

Kalbetik skʼoplal li Balumile. Maʼuk noʼox pasbil sventa jnaklebintik yuʼun jaʼ sventa jkʼupintik xtok li jkuxlejaltike. ¿Mi mu jechuk ti ta jkʼupintik ti lek sikiket chtal ikʼ chkaʼitike, ti lek kʼixin li Kʼakʼale xchiʼuk ti lek mu ta lajesel chkaʼitik jpʼejuk sat teʼe o ti chkaʼitik chkʼejinik li mutetike? ¿Mi mu jaʼuk sprevail ti oy slekil yoʼonton, ti oyutik ta yoʼonton xchiʼuk ti chkʼuxubinutik li Jpasvanej kuʼuntike?

¿Kʼusi van xuʼ jchantik xtok kʼalal ta jkʼeltik li vinajele? Baʼyele chakʼ ta ilel li sjuʼel Diose. Li buchʼutik chchanbeik skʼoplal vinajele jaʼtik to laj yalik ti yantik xmukʼib batele, pe maʼuk noʼox taje, yuʼun chalik xtok ti mas xa la anil chmukʼibe. Kʼelo avil li vinajel kʼalal ikʼ xaʼox osile xchiʼuk xi xakʼbe abae: «¿Bu van chtal skotol li ipalil ti jech chmukʼib batel yuʼune?». Li Vivliae chal ti «toj echʼem stsatsal» li Jpasvaneje (Isaías 40:26). Li kʼusitik pasbile chakʼ ta ilel ti jaʼ li Buchʼu skotol xuʼ yuʼune, ti «toj echʼem stsatsal[e]» (Job 37:23).

Xi chal jun ants ti oy chaʼvoʼ yalab ti maʼsate: «Sventa xichʼik chanubtasele toj tsots skʼoplal ti xichʼik kʼoponele. Skʼan xkalbetik skotol li kʼusitik chkiltik xchiʼuk li kʼusi chkaʼitike akʼo mi muʼyuk oyutik ta jnatik. Yuʼun jaʼ chijkʼot ta satik». Jaʼ jech ek, akʼo «me junuc muʼyuc bochʼo yiloj li Diose», li Xnichʼon ti jaʼ li Jesuse «ti jun oyic xchiʼuc Stote» jaʼ laj yakʼ kojtikintik buchʼu jaʼ li Diose (Juan 1:18). Li Jesuse jaʼ baʼyel pasat yuʼun li Jeovae, jaʼ stuk Jeova la spas. Ti xkaltike jaʼ jsatik chkʼot, yuʼun jaʼ li buchʼu xuʼ xalbutik lek kʼu yelan li Diose.

Ta smiyonal xa noʼox jabil ti te oy xchiʼuk Stot li Jesuse. Jkʼeltik jaytosuk ti laj yalbe smelolal ta stojolal li Stote:

• Li Diose mu xpaj ta abtel. «Li Jtote ta to xʼabtej.» (Juan 5:17.)

• Li Diose snaʼoj li kʼusitik chtun kuʼuntike. «Li Jtotique snaʼoj xa onoʼox cʼusitic chtun avuʼunic.» (Mateo 6:8.)

• Li Diose tskʼupin yakʼel li kʼusi chtun kuʼuntike. «Li Diose coʼol ta xacʼ qʼuepuc ta stojol li bochʼotic chopolique xchiʼuc li bochʼotic lequique. Coʼol chacʼbe voʼ li bochʼotic tucʼ yoʼntonique xchiʼuc li bochʼotic muc tucʼuc yoʼntonique.» (Mateo 5:45.)

•  Li Diose oy jbaliltik chilutik ta jujuntal. «Xanaʼic ti jun centavo noʼox stojol ta chaʼcot li bicʼtal mutetique. Pero me jcotuc mu xbaj yalel ta banamil me mu jechuc tscʼan li Jtotique. Li voʼoxuque cʼalal ta stsotsil ajolic lec atbil. Jaʼ yuʼun mu me xaxiʼic. Yuʼun voʼoxuc echʼem tsots acʼoplalic jech chac cʼu chaʼal li bicʼtal mutetique.» (Mateo 10:29-31.)

Li maʼsatetike mu koʼoluk kʼusitik chaʼibeik smelolal xchiʼuk li buchʼutik xilik osile. Jech kʼuchaʼal liʼe, kʼalal chaʼibeik skʼoplal li axinale, maʼuk van chtal ta sjolik ti bu ikʼmutsʼan ti muʼyuk chkʼot li xojobal Kʼakʼale, xuʼ van jaʼ chtal ta sjolik ti bu lek sikiket ti muʼyuk bu chkʼot li xkʼixnal Kʼakʼale. Jech kʼuchaʼal li maʼsat ti mu xil li lus xchiʼuk axinale, li voʼotik eke mu xkaʼibetik lek smelolal kʼu yelan Jeova mi ta jtuktik noʼox ta jsabetik skʼoplale. Jaʼ yuʼun, li Diose la stak talel jun vinik sventa lek tukʼ xakʼ ta ilel kʼu yelan li stalelale.

Li vinik taje jaʼ li Jesuse (Filipenses 2:7). Li stuke chalbutik skʼoplal li Stote xchiʼuk chakʼbutik ta ilel kʼu yelan xtok. Li yajtakbol ti Felipe sbie, xi laj yale: «Cajval, acʼbun cotquincutic li Jtotic Diose». Pe li Jesuse xi takʼave: «Li bochʼotic laj xa yilicune laj xa yilic o li Jtote» (Juan 14:8, 9). ¿Kʼusi van xuʼ jtatik ta kʼelel ta stojolal Dios kʼalal ta jchanbetik skʼoplal li xkuxlejal Jesuse?

Li Jesuse kʼuxubinvan, bikʼit laj yakʼ sba xchiʼuk xijnopaj noʼox ta stojolal (Mateo 11:28-30). Ta skoj taje nopaj tal krixchanoetik ta stojolal. Kʼuxubaj ta yoʼonton li svokol krixchanoetike xchiʼuk xmuyubaj ek kʼalal xmuyubajike (Lucas 10:17, 21; Juan 11:32-35). Kʼalal chachan o chachikintabe skʼoplal li sloʼilal xkuxlejal Jesuse, tuneso asat, achikin, aniʼ, kʼusitik chapik xchiʼuk smuil kʼusitik, vaʼun nopo ti yakal chkʼot ta pasel ta anopben li kʼusi chakʼele. Mi chanopbe skʼoplal ti kʼu yelan tstsak ta venta krixchanoetik li Jesuse, mas me lek jamal chavilbe li labalik sba stalelal Diose xchiʼuk mas me nopol chavaʼi aba ta stojolal.

Jun ants ti stsʼibaoj jlik livroe chal kʼusi tspasik li maʼsatetik sventa snaʼik li kʼusi oy ta spat xokonike: «Ta jujutuchʼ chkʼot ta snopbenik xchiʼuk jeltos ti bu chlik talele, (ta kʼusitik tspikik, chutsʼiik, chaʼiik xchiʼuk ta yan kʼusitik), vaʼun li kʼusi chkʼot ta snopbenike tstsobik skotol sventa snabeik lek skʼoplal li kʼusitik chkʼot ta pasele». Jaʼ jech ek, mi ta jkʼeltik li spasbentake, mi ta jchantik li kʼusi laj yal Jesús ta sventa li Stote xchiʼuk mi ta jkʼelbetik skʼoplal ti kʼu yelan laj yakʼ ta ilel li stalelaltake, mas me jamal chkiltik ti kʼu yelan li Diose xchiʼuk mas me kuxul chkiltik.

Taje jaʼ jech kʼot ta stojolal li Jobe, ti te chichʼ albel skʼoplal ta Vivliae. Li ta slikebale laj yalbe skʼoplal li kʼusitik mu xaʼibe smelolale (Job 42:3). Akʼo mi jech, kʼalal laj xaʼox xchanbe skʼoplal li labalik sba spasbentak Diose, xi laj yale: «Leʼ volje chabje tale ta jchiquin noʼox laj caʼay acʼoplal, pero liʼ ta orae ta xquilot lec ta jsat» (Job 42:5).

Xuʼ me jech xkʼot ta atojolal ek. Mi chasaʼ li Diose «chacʼ sba ta ilel» (1 Crónicas 28:9). Li stestigotak Jeovae oy me tajek ta yoʼontonik sventa skoltaot ta yojtikinel li Dios ti mu xvinaje.