CHLOʼILAJ XCHIʼUK SLAKʼNA JUN STESTIGO JEOVA

¿Bakʼin lik ajvalilajuk li Ajvalilal yuʼun Diose? (Sbavokʼal)

Jkʼelbetik jun skʼelobil ti kʼu yelan chchiʼin sbaik ta loʼil jun stestigo Jeova xchiʼuk slakʼnae. Jnoptik noʼox ti Julio sbi li stestigo Jeova ti tsvulaʼan jun vinik ti Ernesto sbie.

JOTETAN TA SAʼEL LI YOJTIKINOBILE

Julio: Ernesto, ta melel ta jkʼupin tajek li kʼusitik ta jloʼiltatik ta sventa Vivliae. * ¿Mi xvul ta ajol ti oy kʼusi laj ajakʼbun ta sventa li Ajvalilal yuʼun Diose? Laj avalbun ti chakʼan chanaʼ kʼu yuʼun chkalkutik li stestigounkutik Jeova ti lik ajvalilajuk ta 1914.

Ernesto: Xvul ta jol, yuʼun jech la jta ta kʼelel ta jlik arevistaik ti chal ti lik ajvalilajuk ta 1914 li Ajvalilal yuʼun Diose, vaʼun oy kʼusi muʼyuk laj kaʼibe smelolal. Li voʼoxuke chavalik ti te lokʼem skotol ta Vivlia li kʼusi achʼunojike.

Julio: Jaʼ jech, te lokʼem skotol ta Vivlia.

Ernesto: Li voʼone jkʼeloj sliklej li Vivliae, pe muʼyuk bu la jta ti chalbe skʼoplal li 1914. Jaʼ yuʼun libat ta Internet xchiʼuk la jsaʼ li jpʼel kʼop «1914» ta jlik Vivlia ta Internet, pe muʼyuk bu la sabun talel.

Julio: Ta jkʼan ta jkʼupil kʼoptaot, yuʼun oy chaʼtos kʼusi lek laj apas. Li baʼyele jaʼ ti laj xa akʼel sliklej li Vivliae. Lek jamal xvinaj ti toj ep sbalil chavile.

Ernesto: Jaʼ jech, li voʼone muʼyuk kʼusi xkoʼolaj-o chkil li Vivliae.

Julio: Jaʼ jech chkil ek. Li xchibal kʼusi lek laj apase jaʼ ti laj avakʼ persa saʼel ta Vivlia li kʼusi mu xavaʼibe smelolale. Jech laj apas kʼuchaʼal chal li Vivliae: jotetan me ta saʼel li yojtikinobile. * ¡Toj lek ti jech chavakʼ tajek persae!

Ernesto: Kolaval Julio. Yuʼun ta jkʼan ta jchan kaʼi batel mas. Jech oxal, lik jsabe jutuk mas skʼoplal li ta livro ti yakal ta jchantike, vaʼun te laj kil ti chal ta sventa li 1914. Chalbe skʼoplal jtekʼ mukʼta teʼ ti la xtuchʼike xchiʼuk ti lik chʼiuk yan veltae... Veno, jechtik chal taje.

Julio: Aa, jech avaʼuk. Taje jaʼ li albil kʼop ta kapitulo 4 yuʼun Daniele. Jaʼ chalbe skʼoplal xvayich jun ajvalil ta Babilonia, ti Nabucodonosor sbie.

Ernesto: Jaʼ taje. Ep ta velta la jkʼel, pe ti melel xkaltike mu xkaʼibe-o smelolal kʼuxi te stsakojbe sba skʼoplal xchiʼuk li Ajvalilal yuʼun Diose o li 1914.

Julio: Mu xavul avoʼonton. Yuʼun li j-alkʼop Daniel eke muʼyuk bu laj yaʼibe smelolal li kʼusi akʼbat snaʼ yuʼun Diose.

Ernesto: ¿Aa, mi jech?

Julio: Jech, kʼelavil li kʼusi la stsʼiba liʼ ta Daniel 12:8: «Laj caʼay li cʼusi laj yale, pero muc xcaʼibe smelol».

Ernesto: Maʼuk noʼox jtuk un chaʼa. Muʼyuk xa bu mas chopol chkaʼi jba.

Julio: ¿Mi xanaʼ kʼu yuʼun jech kʼot ta stojolal li Daniele? Yuʼun muʼyuk toʼox kʼotem yorail yuʼun Dios sventa xichʼ aʼibel smelolal li kʼusitik taje. Pe  taje jelem xa. Li avie xuʼ xa xkaʼibetik smelolal li albil kʼopetik laj yakʼ ta tsʼibael li Diose.

Ernesto: ¿Aa, mi jech?

Julio: Jech, li ta versikulo 9 te chalbe smelolal. Kʼelavil li kʼusi chal ta Daniel 12:9: «Li cʼusitic laj yichʼ alele mucul to, jaʼ to me la sta li slajebale». Jech kʼuchaʼal chavakʼ ventae, li albil kʼop liʼe jaʼ to chichʼ aʼibel smelolal kʼalal «me la sta li slajebale». Skotol li kʼusitik chkʼot ta pasele chakʼ ta ilel ti oyutik xa li ta slajebal taje. Ta jchantik ta jelavel li ta livro yakal ta jchantike. *

Ernesto: Avokoluk Julio, albun smelolal li albil kʼope.

Julio: Chkakʼ persa yalbel smelolal chaʼa.

LI XVAYICH NABUCODONOSORE

Julio: Baʼyel jkʼeltik jlikeluk li kʼusi la xvaychinta li ajvalil Nabucodonosore, mi laje kalbetik smelolal kʼusi skʼan xal. ¿Kʼu yelan chavaʼi?

Ernesto: Lek.

Julio: Li Nabucodonosore la xvaychinta jtekʼ mukʼta teʼ ti chkʼot kʼalal to ta vinajele. Vaʼun li ta xvayiche laj yaʼi jun yaj-almantal Dios ti chal akʼo yichʼ tsʼetel li teʼe. Li kʼusi noʼox kome jaʼ li yisime xchiʼuk li xchumanile. Vaʼun jelav «vucub jabil», ta tsʼakale lik chʼiuk tal yan velta li teʼe. * Li albil kʼop taje, kʼot ta pasel baʼyel ta stojolal Nabucodonosor. Li stuke jaʼ toʼox li ajvalil ti mas tsots sjuʼele, xkoʼolaj kʼuchaʼal li jtekʼ teʼ ti chkʼot kʼalal to ta vinajele. Ti xkaltike la xtuchʼik ek xchiʼuk «vucub jabil» jech kom. ¿Mi xvul ta ajol kʼusi skʼan xal taje?

Ernesto: Mu xvul ta jol.

Julio: Li Vivliae chal ti lik xchuvaj li ajvalile xchiʼuk «vucub jabil» jech kom. Melel onoʼox ti laj yikta li yabtel ta ajvalilale. Pe kʼalal echʼ li vukub jabile, lik lekubuk xchiʼuk lik ochuk yan velta li ta ajvalilale. *

Ernesto: Lek oy, yakal chkaʼibe batel smelolal. Pe, ¿kʼuxi ti te stsakojbe sba skʼoplal li Ajvalilal yuʼun Dios xchiʼuk li 1914?

Julio: Yuʼun li albil kʼop ti naka to laj kalbetik skʼoplale chib to velta kʼot ta pasel. Li baʼyele jaʼo kʼalal lokʼ kʼuk sjaliluk ta ajvalilal li Nabucodonosore. Li xchibale jaʼo kʼalal kechi li ajvalilal tspas Diose. Li ta xchibal taje jaʼ te tsakal skʼoplal li Ajvalilal yuʼun Diose.

Ernesto: Pe, ¿kʼuxi xanaʼ ti chib to velta kʼot ta pasel li albil kʼope?

Julio: Aa, li ta albil kʼop sventa Daniele te onoʼox ta jtabetik jayibuk sprevailtak. Jech kʼuchaʼal chal li ta Daniel 4:17, jaʼ sventa akʼo snaʼik skotol krixchanoetik «ti jaʼ sventainojbe yabtel scotol ajvaliletic li Bochʼo te oy ta vinajele. Jaʼ chacʼbe yabtel li bochʼo tscʼan chacʼbee». ¿Mi laj avaʼi «ti jaʼ sventainojbe yabtel scotol ajvaliletic» ti xie?

Ernesto: Laj kaʼi, li tee chal «ti jaʼ sventainojbe yabtel scotol ajvaliletic li Bochʼo te oy ta vinajele».

Julio: ¿Buchʼu xanaʼ skʼoplal li «Bochʼo te oy ta vinajele»?

Ernesto: ¿Mi mu jaʼuk li Diose?

Julio: Jaʼ. Li jpʼel kʼop taje chakʼ ta ilel ti maʼuk noʼox chalbe skʼoplal Nabucodonosor li albil kʼope. Jaʼ chalbe skʼoplal xtok «ti jaʼ [sventainoj] [...] scotol ajvaliletic» li Diose, jaʼ xkaltik, sventainoj skotol li krixchanoetike. Mi la jchanbetik skʼoplal li stsʼak loʼil li ta albil kʼope, chavakʼ venta ti oy lek srasonale.

Ernesto: Lek oy, jchantik batel.

LI KʼUSI MAS CHALBE SKʼOPLAL LI SLIVROAL DANIELE

Julio: Li ta slivroal Daniele jaʼ mas chalbe skʼoplal li kʼusi ora chlik ventainvanuk li Ajvalilal yuʼun Diose xchiʼuk li ajvalil ti jaʼ li Jesucristoe. ¿Kʼu yelan chavil ti jkʼeltik junuk skʼelobile? Te ta jtatik ta Daniel 2:44. Kʼelo tal avokoluk.

Ernesto: Lek oy. Xi chale: «Cʼalal jaʼo ochemic ta ajvalilal li ajvaliletic leʼe, li Dios te oy ta vinajele ta sliques jun ajvalil; muʼyuc bochʼo xuʼ chtuchʼbat  yabtel, mu junuc lum chtal tsalatuc yuʼun. Jaʼ ta stsal, jaʼ ta slajesbe scʼoplal scotol li yantic ajvaliletique; yan li stuque jʼechʼel te chcom o sbatel osil».

Julio: Kolaval. ¿Mi jaʼ chalbe skʼoplal Ajvalilal yuʼun Dios xanaʼ li teksto taje?

Ernesto: Mu jnaʼ lek.

Julio: Li tekstoe chal ti «jʼechʼel te chcom o sbatel osil» li ajvalilale, jaʼ xkaltik muʼyuk spajeb. ¿Mi oy van yan ajvalilal ti mu snaʼ xlaj skʼoplale?

Ernesto: Muʼyuk.

Julio: Jech ta melel. Jkʼeltik yan albil kʼop ti chalbe skʼoplal li Ajvalilal yuʼun Diose. Jaʼ ta Daniel 7:13 xchiʼuk 14, jech xtok chalbe skʼoplal jun krixchano ti ch-och ta ajvalile. Kʼelavil li kʼusi chale: «Laj yichʼ acʼbel tsots yabtel; laj yichʼ acʼbel svuʼel, xchiʼuc laj yichʼ acʼbel spas mantal. Li cristianoetic ta jujun lum, ta jujun banamil, ta jujuchop cʼope te chtunic ta stojol. Li yabtel iʼacʼbate mu xlaj scʼoplal o; li yabtel ta ajvalilale mu xuʼ chichʼ tuchʼbel o». Li versikuloetik taje oy kʼusi chakʼ ta ilel ti laj xal kalbetik tal skʼoplale.

Ernesto: Jech avaʼuk, chalbe skʼoplal yan velta li ajvalilale.

Julio: Jech taje. Pe maʼuk kʼusiuk noʼox ajvalilal. Mi laj avakʼ ventae, chal ti yichʼoj tsots yabtel ta stojolal skotol «li cristianoetic ta jujun lum, ta jujun banamil, ta jujuchop cʼope». Jaʼ xkaltik, jaʼ tsventain spʼejel li Balumile.

Ernesto: Muʼyuk toʼox bu kakʼoj venta, pe oy arason. Yuʼun te chal.

Julio: Kʼelavil yan velta kʼusi chal liʼe: «Li yabtel iʼacʼbate mu xlaj scʼoplal o; li yabtel ta ajvalilale mu xuʼ chichʼ tuchʼbel o». ¿Mi mu jechuk ti xkoʼolaj tajek xchiʼuk Daniel 2:44 li teksto naka to la jkʼeltike?

Ernesto: Jech, xkoʼolaj tajek.

Julio: Jechuke. Jvules ta joltik li kʼusi laj xa kalbetik tal skʼoplale. Li albil kʼop ta kapitulo 4 yuʼun Daniele chakʼbe snaʼ skotol krixchanoetik «ti jaʼ sventainojbe yabtel scotol ajvaliletic li Bochʼo te oy ta vinajele». Taje chakʼ ta ilel ti maʼuk noʼox ta stojolal Nabucodonosor kʼot ta pasel li albil kʼope, yuʼun oy to buchʼu mas tsots skʼoplal chkʼot ta stojolal. Jech xtok, ta sliklej li slivroal Daniele te ta jtatik albil kʼopetik ti chal kʼusi ora lik ventainvanuk li Ajvalilal yuʼun Diose xchiʼuk li ajvalil ti jaʼ li Jesucristoe. Skotol taje chakʼ ta ilel ti oy srasonal ti jnoptik ti jaʼ chalbe skʼoplal Ajvalilal yuʼun Dios li kapitulo 4 yuʼun Daniele, ¿mi mu jechuk?

Ernesto: Jech ta melel. Pe mu xkaʼibe-o smelolal kʼuxi ti te tsakojbe sba skʼoplal xchiʼuk li 1914.

JELAV «VUCUB JABIL»

Julio: Mu xavul avoʼonton, kalbetik skʼoplal yan velta li ajvalil Nabucodonosore. Vuleso ta ajol ti jaʼ skʼoplal Nabucodonosor li jtekʼ teʼ ta albil kʼope. Li ajvalilal tspase kechi kʼuk sjaliluk kʼalal laj yichʼ tuchʼel li teʼe xchiʼuk jelav vukub jabil. Li ajvalile lik xchuvaj, pe kʼalal echʼ xaʼox ti kʼu sjalil taje, lekub xchiʼuk och yan velta ta ajvalil. Ta mas tsʼakale, li albil kʼope kʼot ta pasel kʼalal kechi li ajvalilal tspas Dios liʼ ta Balumile, pe taje maʼuk ta skoj ti oy kʼusi chopol la spas li Diose.

Ernesto: ¿Kʼuxi taje? Mu xkaʼibe smelolal.

Julio: Li ta skʼakʼalil Vivliae, li ajvaliletik ta Israele te toʼox chchotiik ta «xchotleb» Jeova. * Taje jaʼ skʼan xal ti jaʼ toʼox tspasik mantal ta sventa Diose. Li ajvalilal tspasike jaʼ svinajeb li ajvalilal tspas Jeovae. Akʼo mi jech, ta mas jelavele jutuk mu skotolikuk la svalopatinik komel li Jeovae xchiʼuk li  jteklum eke jutuk mu skotolikuk jech la spasik. Ta skoj taje li Diose laj yakʼ ti akʼo xichʼik lajesel ta stojolal jbabiloniaetik li Israel ta sjabilal 607 kʼalal maʼuk toʼox jkʼakʼaliltike. Li ta jabil taje laj skʼoplal li ajvaliletik ti jaʼ toʼox tspasik mantal ta sventa Dios li ta Jerusalene. Jaʼ xkaltik, kechi li ajvalilal yuʼun Diose. ¿Mi xavaʼibe smelolal yaʼeluk li kʼusi chkalbote?

Ernesto: Xkaʼi yaʼeluk.

Julio: Li ta sjabilal 607 kʼalal maʼuk toʼox jkʼakʼaliltike, jaʼo lik xchapik li vukub jabile. Li ta jabil taje jaʼo te lik kechiuk li ajvalilal yuʼun Diose. Kʼalal tsuts li jabil taje, li Diose la svaʼan jun achʼ ajvalil sventa tspas mantal, pe li achʼ ajvalile te oy ta vinajel. Li yan albil kʼopetik la jkʼeltik ta Daniele kʼot ta pasel kʼalal jutuk xaʼox skʼan stsuts li vukub jabile. Pe, ¿bakʼin van tstsuts li vukub jabile? Mi la jtabetik li stakʼobile, ta jnaʼtik kʼusi ora lik ventainvanuk li Ajvalilal yuʼun Diose.

Ernesto: Jkʼeltikik mi jnaʼ, ¿mi jaʼ ta 1914?

Julio: Jech taje Ernesto, toj lek la atakʼ.

Ernesto: Pe, ¿kʼuxi xuʼ jnaʼtik ti jaʼ ta 1914?

Julio: Kʼalal tal ta Balumil li Jesuse laj yal ti muʼyuk toʼox bu tsutsem li vukub jabile. * Jaʼ yuʼun li jabil taje solel jal smakojbe skʼoplal. Li vukub jabile jaʼo lik kʼalal skʼan toʼox jayibuk sien jabil skʼan xtal li Jesuse xchiʼuk jelav to jayibuk sien jabil kʼalal sut muyel ta vinajele. Jech xtok, vuleso ta ajol ti laj kaltik ti jaʼ to chkaʼibetik smelolal li albil kʼopetik ta sventa Daniel kʼalal ‹mi sta slajebal› kʼakʼale. * Labal ta aʼiel, pe li ta slajebaltik siglo 19 oy jtsop jchanolajeletik ta Vivlia ti ta sjunul yoʼontonik la sabeik lek smelolal li albil kʼop ta sventa Daniele xchiʼuk yan albil kʼopetik. Ta kʼunkʼun lik yaʼibeik smelolal ti tstsuts ta 1914 li vukub jabile. Li kʼusitik kʼotemik ta pasel ta balumil li ta jabiletik taje, jaʼ svinajeb ti ta 1914 lik ventainvanuk ta vinajel li Ajvalilal yuʼun Diose xchiʼuk jaʼo lik li yorail slajebal kʼakʼale. Jnaʼoj ti mu kʼunuk ta aʼibel smelolale yuʼun solel ep kʼusitik laj kalbetik skʼoplal.

Ernesto: Jech avaʼuk. Skʼan jchaʼkʼel yoʼ xkaʼibe lek smelolale.

Julio: Mu xavul avoʼonton, li voʼon eke jal laj kaʼibe-o smelolal li albil kʼopetike. Pe li kʼusi la jloʼiltatike xuʼ van la skoltaot yoʼ xavakʼ venta ti ta Vivlia ta jlokʼeskutik li stestigounkutik Jeova kʼalal chkalbekutik skʼoplal li Ajvalilal yuʼun Diose.

Ernesto: La skoltaun. Solel labal onoʼox sba chkil ti ta Vivlia chalokʼesik li kʼusitik achʼunojike.

Julio: Li voʼot chkil eke oy ta avoʼonton chachʼun li kʼusi chal li Vivliae. Jech kʼuchaʼal laj xa kalbote, mu kʼunuk ta aʼibel smelolal yuʼun solel ep kʼusitik laj kalbetik skʼoplal. Ta melel oy van kʼusi chajakʼ. Jech kʼuchaʼal liʼe, laj xa kalbetik skʼoplal ti lik ta 607 kʼalal maʼuk toʼox jkʼakʼaliltik li vukub jabile xchiʼuk ti te stsakojbe sba skʼoplal ta sventa li Ajvalilal yuʼun Diose. Pe, ¿kʼuxi jnaʼtik ti tsuts ta 1914? *

Ernesto: Jaʼ li kʼusi mu to xkaʼibe lek smelolal taje.

Julio: Li Vivliae jaʼ tskoltautik ta xchapel kʼu sjalil chjalij li vukub jabile. ¿Mi chakʼan ti jaʼ xkalbetik skʼoplal li ta yan veltae? *

Ernesto: Lek oy, liʼ ta jmalaote.

¿Mi oy junuk loʼil ta Vivlia ti chakʼan chanabe mas smelolale? ¿Mi chakʼan chanaʼ mas ta sventa li kʼusi xchʼunojik li stestigotak Jeovae? Mi jaʼ jeche, jakʼbo junuk stestigo Jeova. Ta sjunul yoʼonton tstakʼik li kʼusi chakʼan chanaʼe.

[Tsʼibetik ta yok vun]