CHLOʼILAJ XCHIʼUK SLAKʼNA JUN STESTIGO JEOVA

¿Bakʼin lik ajvalilajuk li Ajvalilal yuʼun Diose? (Xchaʼvokʼal)

Jkʼelbetik jun skʼelobil ti kʼu yelan chchiʼin sbaik ta loʼil jun stestigo Jeova xchiʼuk slakʼnae. Jnoptik noʼox ti Julio sbi li stestigo Jeova ti chchaʼvulaʼan ta sna jun vinik ti Ernesto sbie.

JVULES TA JOLTIK LI XVAYICH NABUCODONOSORE

Julio: Liʼote Ernesto, toj lek ti liʼ la jtaot yan veltae. Ta jkʼupin tajek ti chijloʼilaj ta sventa Vivlia jujun xemanae. * ¿Kʼu avelan un?

Ernesto: Lek oyun, kolaval.

Julio: ¡Toj lek maʼ taje! Li slajeb velta ay jvulaʼanote laj kalbetik skʼoplal ti kʼu yuʼun chkalkutik li stestigounkutik Jeova ti lik ajvalilajuk ta 1914 li Ajvalilal yuʼun Diose. * La jchantik li ta kapitulo 4 ta slivroal Daniel ti oy jun senyail chakʼbe sventa jnaʼtik ti jech chkʼot li ta jabil taje. ¿Mi xvul ta ajol?

Ernesto: Aa xvul, jaʼ li xvayich ajvalil Nabucodonosore.

Julio: Jaʼ taje. Li Nabucodonosore la xvaychinta jtekʼ mukʼta teʼ ti chkʼot kʼalal to ta vinajele. Vaʼun li ta xvayiche laj yaʼi jun j-almantal ti chal akʼo yichʼ tsʼetel li teʼe. Li kʼusi noʼox kome jaʼ li xchumanil xchiʼuk yisime. Vaʼun jelav «vucub jabil», ta tsʼakale lik chʼiuk tal yan velta li teʼe. * La jchantik xtok ti chib to velta kʼot ta pasel li albil kʼop taje. ¿Mi xvul ta ajol li baʼyele?

Ernesto: Xvul ta jole, jaʼo kʼalal pas ta chuvaj vukub jabil li Nabucodonosore.

Julio: Jech taje. Pas ta chuvaj xchiʼuk lokʼ kʼuk sjaliluk ta ajvalilal. Yan li xchibale jaʼo kʼalal kechi vukub jabil li ajvalilal tspas Dios ta Balumile. Taje jaʼo lik ta sjabilal 607 kʼalal maʼuk toʼox jkʼakʼaliltike, kʼalal laj yichʼ jinesel li Jerusalene. Li ta jabil taje jaʼo te lik kechiuk li ajvaliletik ti tʼujbilik yuʼun Jeova sventa tspasik mantal ta Balumile. Kʼalal tsuts li jabil taje, li Diose la svaʼan jun achʼ ajvalil sventa tspas mantal ta vinajel. Jaʼ xkaltik, chlik spas mantal ta vinajel li Ajvalilal yuʼun Dios mi tsuts li vukub jabile. Jchanojtik xa kʼusi ora lik yichʼ chapel tal li vukub jabile. Li avie une, jaʼ xa skʼan jchantik bakʼin tstsuts li vukub jabil taje, yuʼun jaʼ sventa jnaʼtik kʼusi ora lik ventainvanuk li Ajvalilal yuʼun Diose. ¿Mi xavaʼi yaʼeluk?

Ernesto: Xkaʼi. Chvul xa ta jol li kʼusi la jloʼiltatik li ta slajeb velta ay avulaʼanune.

Julio: Lek un chaʼa. Jkʼeltik bakʼin tstsuts li vukub jabil taje. Li voʼon eke persa la jkʼel baʼyel sventa xvul ta jol skotol li kʼusitik smakoje. Jech oxal, chkakʼ persa sventa lek noʼox chkalbot smelolal.

Ernesto: Lek oy.

TSTSUTS LI VUKUB JABILE, CHLIK LI SLAJEBAL KʼAKʼALE

Julio: Li ta sba veltae jaʼ kʼot ta pasel ta stojolal li Nabucodonosore, taje vukub jabil jalij. Pe  li ta xchibal veltae jaʼ kʼot ta pasel stojolal li Ajvalilal yuʼun Diose, jaʼ noʼoxe mas to jal bat.

Ernesto: Pe ¿kʼuxi xanaʼ taje?

Julio: Kʼelavil, li vukub jabile jaʼo lik kʼalal laj yichʼ jinesel li Jerusalene, ta sjabilal 607 kʼalal maʼuk toʼox jkʼakʼaliltike. Jaʼ yuʼun mi lik jchaptik talel vukub jabil li ta 607 kʼalal maʼuk toʼox jkʼakʼaliltike, chijkʼot ta jabil 600 kʼalal maʼuk toʼox jkʼakʼaliltike. Pe li jabil taje muʼyuk kʼusi kʼot ta pasel ta sventa li Ajvalilal yuʼun Diose. Jech kʼuchaʼal laj xa jchantik tale, kʼalal jelav xaʼox jayibuk sienal jabile, tal ta Balumil li Jesuse xchiʼuk laj yal ti muʼyuk toʼox bu tsutsem li vukub jabil taje.

Ernesto: Jech avaʼuk. Vul xa ta jol.

Julio: Jaʼ yuʼun li vukub jabile, maʼuk skʼoplal batsʼi vukub jabil, persa mas ep jabiletik smakoj.

Ernesto: ¿Mas van ep jabiletik? ¿Kʼu sjalil?

Julio: Li ta slivroal Apocalipsise oy jun albil kʼop ti te nitil skʼoplal xchiʼuk li kʼusi chal Daniele. Taje jaʼ tskoltautik sventa jnaʼtik kʼusi ora tstsuts li vukub jabile. Li ta albil kʼop taje ta xalbutik ti oxib jabil xchiʼuk oʼlole, jaʼ 1,260 kʼakʼal. * Jaʼ yuʼun, li vukub jabile chjalij: 2,520 kʼakʼal. ¿Mi xavaʼi yaʼel?

Ernesto: Jech, jaʼ noʼoxe mu to xkaʼi lek kʼu yuʼun chavalik ti lik ajvalilajuk ta 1914 li Ajvalilal yuʼun Diose.

Julio: Mu xa vul avoʼonton, ta jkʼeltik batel. Oy albil kʼopetik ta Vivlia ti chal ti jun kʼakʼale jaʼ skʼan xal jun jabil. * Mi jech la jchaptik batel ta sventa li vukub jabil eke, li 2,520 kʼakʼale, jaʼ skʼan xal 2,520 jabil. Kʼelavil un: mi lik jchaptik 2,520 jabil ti ta jlikestik ta sjabilal 607 kʼalal maʼuk toʼox jkʼakʼaliltike xchiʼuk ti jaʼo lik li vukub jabile, chkʼot ta 1914. * Jaʼ yuʼun xuʼ xkaltik ti jaʼo te tsuts li vukub jabile. Jech xtok jaʼo laj yichʼ vaʼanel Jesús ta Ajvalil li ta Ajvalilal yuʼun Diose. Jech xtok li ta 1914 ep kʼusitik lik kʼotanuk ta pasel ti yaloj xa onoʼox Vivlia chkʼot ta pasel ta slajebal kʼakʼale.

Ernesto: ¿Kʼusitik taje?

Julio: Li ta Mateo 24:7 li Jesuse laj yal kʼusi chkʼot ta pasel kʼalal mi lik ajvalilajuk xaʼox ta vinajele, xi laj yale: «Ta to xlic scontrain sbaic yantic banamil; ta to xlic scontrain sbaic mucʼtic ajvaliletic. Ta to xtal tsots viʼnal; ta xjelov niqueletic ta buticuc banamilal». Kʼelavil, li Jesuse laj yal ti chtal viʼnal xchiʼuk nikeletike. ¿Mi mu jechuk chavil ti jech kʼotemik ta pasel li echʼem tal jabiletike?

Ernesto: Jech ta melel.

Julio: Laj yal xtok ti chlik paskʼope. Li ta slivroal Apocalipsise laj yal ti maʼuk noʼox bikʼtal kʼopetike, moʼoj, laj yal ti chlik paskʼop ta spʼejel Balumil ti chakʼbe svokol skotol krixchanoetike. * ¿Mi xvul ta ajol kʼusi ora lik li Baʼyel Mukʼta Paskʼop ta spʼejel Balumile?

Ernesto: Ta 1914. Ta melel, jaʼ li ta jabil ti lik ajvalilajuk Jesús jech kʼuchaʼal chavalike. Mu toʼox bu jnopbe skʼoplal ti vaʼ yelan taje.

Julio: Jech, kʼalal chkakʼtik venta kʼu yelan tsnitbe sba skʼoplal li albil kʼop sventa vukub jabil xchiʼuk li albil kʼopetik sventa slajebal  kʼakʼale, jamal tajek ta aʼiel. Li stestigounkutik Jeovae lek jchʼunojkutik ti lik ajvalilajuk ta 1914 li Jesuse xchiʼuk ti te lik talel li slajebal kʼakʼale. *

Ernesto: Yakal chkakʼ persa yaʼibel smelolal skotol taje.

Julio: Jnaʼoj, yuʼun vokol laj kaʼibe smelolal ek kʼalal la xchapbeikun ta sba veltae. Pe, oy ta koʼonton ti lajuk avaʼibe smelolal ti akʼo mi muʼyuk te tsʼibabil talel ta Vivlia li jpʼel kʼop 1914 xie, oy lek srasonal kuʼunkutik ti ta jchʼunkutik ti lik ajvalilajuk Jesús li jabil taje. Jech xtok, jmalaoj ti lajuk avakʼ venta ti ta Vivlia lokʼem skotol li kʼusitik jchʼunojkutike.

Ernesto: Jech avaʼuk maʼ taje, toj labal tajek chkil ti ta Vivlia lokʼem skotol li kʼusitik chavalbune. Kʼusuk noʼox ti ta jakʼbote, muʼyuk bu chavalbun: «Xi xi jnaʼe» o «Xi ta jnope». Skotol velta chatunes li Vivliae. Pe ¿kʼu yuʼun ti toj vokol ta aʼibel smelolale? ¿Kʼu yuʼun mu jamal laj yal Dios ti ch-och ta ajvalil ta 1914 li Jesuse?

Julio: Ernesto, toj lek li kʼusi chajakʼe. Li ta Vivliae, ep kʼusitik ti muʼyuk jamal chalbe skʼoplale. ¿Kʼu yuʼun ti jech la spas li Diose? Jaʼ xkaltik, ¿kʼu yuʼun ti skʼan xkakʼtik persa yoʼ xkaʼibetik smelolale? ¿Mi chakʼan ti jaʼ xkalbetik smelolal kʼalal mi tal jkʼelot ta yan xemanae?

Ernesto: Lek chaʼa. Liʼ ta jmalaote.

¿Mi oy junuk loʼil ta Vivlia ti chakʼan chanabe mas smelolale? ¿Mi chakʼan chanaʼ mas ta sventa li kʼusi xchʼunojik o kʼusitik tspasik li stestigotak Jeovae? Mi jaʼ jeche, ¿kʼu yuʼun mu xajakʼbe mi oy bu laj avile? Yuʼun toj lek chaʼiik chchiʼinoxuk ta loʼil.

[Tsʼibetik ta yok vun]

[Tsʼib ti mukʼtik sletraile ta pajina 9]

Li Jesuse laj yal kʼusi chkʼot ta pasel kʼalal mi lik ajvalilajuk xaʼox ta vinajele, xi laj yale: «Ta to xlic scontrain sbaic yantic banamil; ta to xlic scontrain sbaic mucʼtic ajvaliletic. Ta to xtal tsots viʼnal; ta xjelov niqueletic ta buticuc banamilal»

[Lokʼol ta pajina 10]

 [Tavla ta pajina 11]

LI XVAYICH NABUCODONOSOR XCHIʼUK LI AJVALILAL YUʼUN DIOSE

LI ALBIL KʼOPE

Jtekʼ mukʼta teʼ (Daniel 4:10, 11)

«Tsʼetic li teʼe» (Daniel 4:14)

«Vucub jabil jech acʼo comuc o» (Daniel 4:16)

‹Chlic ochan ta ajvalil yan velta› (Daniel 4:26, Ch)

Ch-ajvalilaj

Lokʼ kʼuk sjalil ta ajvalil

Kʼu sjalil

Och yan velta ta ajvalil

BAʼYEL SKʼOTEB TA PASEL

XCHIBAL SKʼOTEB TA PASEL

Nabucodonosor, ajvalil ta Babilonia

Kʼalal muʼyuk toʼox jal yechʼel li 606 kʼalal maʼuk toʼox jkʼakʼaliltike, pas ta chuvaj li Nabucodonosore xchiʼuk lokʼ ta ajvalil

Batsʼi vukub jabil

Lik lekubuk xchiʼuk lik ochuk yan velta ta ajvalil li Nabucodonosore

J-israeletik ti tʼujbilik yuʼun Dios sventa tspasik mantal ta Balumile

Laj yichʼ jinesel li Jerusalene; muʼyuk xa j-israeletik tʼujbilik yuʼun Dios sventa tspasik mantal

Oktuvre

607

2,520 jabil

Kʼalal maʼuk toʼox jkʼakʼaliltike

606 jabiletik xchiʼuk oxib u

Ta jkʼakʼaliltike

1,913 jabiletik xchiʼuk baluneb u

«Li lum Jerusalén liʼi chlaj ta pechʼel ta teqʼuel yuʼun yanlum cristianoetic, jaʼ to me itsʼaqui scʼacʼalil yuʼunique» (Lucas 21:24)

Li Jesuse laj yichʼ vaʼanel ta Ajvalil li ta Ajvalilal yuʼun Diose xchiʼuk lik spas mantal ta vinajel

Oktuvre

1914