Ta jutuk mu skotoluk snaik li krixchanoetik ti chalbe skʼoplal Vivliae oy toʼox yuni kʼox choʼik sventa tspas yarinaik ti chtun yuʼunik sventa tspasik pane. Li antsetik o li kiaraetike nopem xaʼiik tstunesik jujun kʼakʼal ta snaik. Jujun kʼakʼal buyuk xa noʼox chichʼ aʼiel kʼu yelan chbakʼ li xchoʼik o smolinoike (Éxodo 11:5; Jeremías 25:10).

Oy tabil divujoetik xchiʼuk lokʼoletik sventa li voʼneal Ejipto ti chakʼ ta ilel kʼu yelan tstunesik li choʼe. Li kʼusi ta xjuchʼike ta sbusanik ta sba li choʼe. Li ants o li kiaraile chkeji. Ta tsʼakale ta stsak ta xchibal skʼob li kʼob choʼe, vaʼun ta sjunul yipal chlik sbalalin, xtal xbat noʼox yuʼun. Jlik livroe chal ti kʼob choʼe xuʼ van chib o chanib kilo yalal. Mi oy buchʼu laj yichʼ-o majele, xuʼ xcham-o (Jueces 9:50-54).

Tsots tajek skʼoplal ta jujun utsʼ alalil li choʼe, yuʼun jaʼ chtun-o sventa tspas li sveʼelike. Jaʼ yuʼun xi chal li Vivliae: «Mu me bochʼo scʼanbe sbaic ta prentail smulinoic, o me xchoʼic ti jaʼ sventa chjuchʼ o sveʼelique. Yuʼun me jech tspasique, xcoʼlaj xchiʼuc jaʼ tscʼanbe ta prentail xcuxlejal li xchiʼile» (Deuteronomio 24:6).

Li ta Vivliae chal ti Jesukristoe te «oy ta stiʼ yoʼonton Stot» (Juan 1:18, Reina-Valera, 2000). Taje jaʼ skʼan xal ti lek tajek xil sbaik xchiʼuk Stot li Jesuse. Kʼalal «oy ta stiʼ yoʼonton» xi li ta Vivliae, te likem talel smelolal ti kʼu toʼox yelan nopem xaʼi chveʼik ta voʼne li krixchanoetike.

Li ta skʼakʼalil Jesuse tstelan sbaik ta sba xchotlebik ti te akʼbil ta sjoyobal jkot pekʼel mexa kʼalal chveʼik li judaetike. Jujuntal li jveʼeletike te tstsʼeʼan sbaik ta yeloval mexa xchiʼuk telel li yokike, vaʼun ta skajanik ta jun xonjolil li xukʼub stsʼetkʼobike. Ta skoj taje, jaʼ xokol chkom li sbatsʼikʼobike. Jlik livro chal ti «vaʼ yelan chveʼike, li jun krixchanoe xuʼ nopol chkom sjol ta stiʼ yoʼonton li buchʼu te oy ta stsʼetkʼobe». Jech oxal, chichʼ toʼox alel ti oy «ta stiʼ yoʼonton» xchiʼil li jun krixchanoe.

Pe kʼalal te tsta yavil jun jveʼel «ta stiʼ yoʼonton» li jun jolil ta utsʼ alalil o ta stojolal li buchʼu chtakvan ta ikʼele jaʼ jun mukʼta matanal. Jaʼ yuʼun, li slajeb velta veʼ ta bat kʼakʼal xchiʼuk yajchankʼoptak li Jesuse, li buchʼu te oy ta stiʼ yoʼontone jaʼ li jtakbol Juane, «li jchankʼop ti jaʼ mas kʼanbil yuʼun Jesuse». Jech oxal, li ta Vivliae chal ti «la snapʼan sba ta stiʼ yoʼonton Jesus» sventa oy kʼusi tsjakʼbee (Juan 13:23-25; 21:20).