Ta jtatik epal albil kʼopetik ta Vivlia ti lek xcholet chalbe skʼoplale. Mi junuk krixchano xuʼ tukʼ x-al yuʼun li kʼusi chkʼot ta pasel ta tsʼakale. Jech oxal, ti kʼotemik ta pasel li albil kʼopetike jamal chakʼ ta ilel ti jaʼ Skʼop Dios li Vivliae. (Kʼelo Josué 23:14; 2 Pedro 1:20, 21.)

Ti oy xa kʼotemik ta pasel li albil kʼopetik ta Vivliae tskoltautik sventa oyuk xchʼunel koʼontontik ta stojolal Dios (Evreos 11:1). Jech xtok tskoltautik sventa jchʼuntik ti chkʼot ta pasel li kʼusi kʼupil sba yaloj tspas Dios ta tsʼakale. Jaʼ yuʼun, li albil kʼopetike chakʼbutik spatobil oʼontonal. (Kʼelo Salmo 37:29; Romanos 15:4.)

Oy jlom albil kʼopetik ti chakʼ ta aʼiel ti oy kʼusi skʼan spasik li yajtsʼaklomtak Kristoe. Jun skʼelobile, kʼalal laj yilik ti yakal xa chkʼot ta pasel jlom albil kʼopetik li yajtsʼaklomtak Kristo ta baʼyel sigloe, jatavik lokʼel li ta Jerusalene. Ta mas tsʼakale, kʼalal laj yichʼ lajesel li Jerusalen ta skoj ti muʼyuk la xchikintaik kʼusi laj yal Jesus jutuk mu skotoluk li jnaklejetike, li yajtsʼaklomtak Kristo ti jatavik lokʼele nom xaʼox oyik xchiʼuk muʼyuk kʼusi kʼot ta stojolalik. (Kʼelo Lukas 21:20-22.)

Li albil kʼopetik ti kʼotemik xa ta pasele chakʼ iluk ti poʼot slajesbe skʼoplal ajvaliletik liʼ ta balumil li Ajvalilal yuʼun Diose (Daniel 2:44; Lukas 21:31). Li avi eke oy kʼusi sujom skʼan jpastik ta jujuntal sventa lek xilutik li ajvalil svaʼanoj Diose, ti jaʼ li Jesukristoe. (Kʼelo Lukas 21:34-36.)