Li ta yan jabile lik lokʼkun ta pelikulaetik xchiʼuk ep ta velta voʼon mas tsots jkʼoplal chivinaj (protagonista). Li buchʼutik tslokʼesik periodikoe tskʼan chchiʼinikun ta loʼil xchiʼuk tslokʼtaikun; chikʼikun batel ta skʼelel li achʼ pelikulaetike, ta inauguraciones xchiʼuk ta veʼel. Tsots tajek jkʼoplal chilikun.

Akʼo mi jech, ta mas tsʼakale laj kakʼ venta ti muʼyuk mas chakʼbun muyubajel li kʼusitik ta jpas jech kʼuchaʼal jnopoj toʼoxe. Jutuk mu skotoluk li pelikulaetik ti bu chilokʼe toj xibal sba, yuʼun chakʼ ta ilel majbail o milbail. Li j-akʼ-elovetik (actores) ta Hong Konge muʼyuk nopem xaʼiik ti yan-o buchʼu tstunesik kʼalal tspasik junuk pelikulae, mu jechuk tspasik kʼuchaʼal ta Hollywood; jaʼ yuʼun voʼon ta jpas jtuk li kʼusitik xibalik sbae, jech kʼuchaʼal ti chivil jelavel ta sba jkot karo ta motosikletae. Ep li jpelikulatak la jlokʼese, chakʼ ta ilel mulivajel, majbail xchiʼuk li jlome chakʼ ta ilel pukujetik.

Li ta 1995 linupun xchiʼuk li buchʼu jaʼ yabtel tspas pelikulaetike. Akʼo mi oy yileluk skotol li kʼusitik chtun kuʼun sventa ximuyubaje —lek ojtikinbilun, oy jtakʼin xchiʼuk oy jmalal ti skʼanojune—, pe ta jvul koʼonton xchiʼuk ipun ta at-oʼonton. Jaʼ yuʼun la jnop chkikta li kʼusi toʼox ta jpase.

Lik jvul koʼonton kʼalal vul ta jol ti koʼol toʼox ta xkichʼkutik chanubtasel ta Vivlia xchiʼuk jvix li ta jujun sabadoe, li buchʼu la xchanubtasunkutike jaʼ jun utsʼ alalil ti jaʼik stestigo Jeova ti lek tajek yoʼontonike. Li totil, Joe McGrath, ti «juntot Joe» chkalbekutike, chakʼbe chanubtasel ta Vivlia li oxvoʼ stsebetake xchiʼuk li voʼonkutike. Yichʼoj lek ta mukʼ li yajnile xchiʼuk li stsebetake. Li voʼone ta jkʼupin kʼalal chbat jchiʼinik ta tsobajele, oy junantik velta ti ay jchiʼinik ta s-asambleaike. Li vaʼ kʼakʼal taje ximuyubaj toʼox tajek xchiʼuk solel jun koʼonton kʼalal te jchiʼukik li stestigotak Jeovae.

Li ta jnae solel muʼyuk smelolal li jkuxlejalkutike, muʼyuk ximuyubajkutik. Ta skoj ti muʼyuk lek xkuxlejal  li jtote chakʼbe tajek svokol li jmeʼe, jaʼ yuʼun ip ta at-oʼonton. Kʼalal te toʼox van lajunebuk jabilale, li jmeʼe laj yikta sba li ta tsobajeletik ti tspas li stestigotak Jeovae. Akʼo mi muʼyuk mas ximuyubaj laj kakʼ persa chibatilan-o li ta tsobajele xchiʼuk laj kichʼ voʼ kʼalal vuklajuneb jabilale. Pe te van kʼuk yuni jaliluke lik sokuk li jtalelale xchiʼuk laj kikta li stsobobbail stestigotak Jeovae.

Kʼalal achʼtik toʼox jnupunele, ay svulaʼanikun chaʼvoʼ stestigotak Jeova ti te noʼox nopol nakalike xchiʼuk ti jaʼik li buchʼu oy ta sbaik skʼelel li tsobobbaile. Laj yalbeikun kʼusi skʼan jpas sventa lekuk xilun yan velta li Jeova Diose xchiʼuk laj yalbeik jun misionera ti akʼo skoltaune, ti Cindy sbie. Li vaʼ kʼakʼal taje muʼyuk xaʼox kʼusi jchʼunoj. Jaʼ yuʼun la jkʼanbe vokol ti akʼo yakʼbun iluk sprevail mi jaʼ ta melel Skʼop Dios li Vivliae. Li Cindy laj yakʼbun kil junantik albil kʼopetik ta Vivlia ti kʼotemik xa ta pasele. Ta kʼunkʼun laj kamigain jbakutik, vaʼun la jchʼam ti xchanubtasun ta sventa li kʼusi melel ta Vivliae. Jaʼ to laj kaʼibe smelolal ti jaʼ jun jkʼanvanej Dios li Jeovae xchiʼuk ti tskʼan ti ximuyubaje.

Kʼalal lik batkun yan velta li ta tsobajele, laj kakʼ venta ti jaʼ mas ta jkʼupin kʼalal te oyun xchiʼuk li stestigotak Jeovae jaʼ muʼyuk mas kʼalal te jchiʼuk li krixchanoetik ti lek ojtikinbilike. Pe ta skoj ti kʼu yelan lichʼi tal ta jbikʼtale muʼyuk jbalil chkaʼi jba xchiʼuk mu jpat koʼonton ta stojolal yantik. Li ta tsobobbaile oy buchʼu laj yakʼbun kil ta Vivlia kʼuxi xuʼ stsal kuʼun li at-oʼontone. Jech xtok la jta jlekil amigotak.

Li ta 1997, libatkutik ta naklej xchiʼuk jmalal ta jun jteklum ta Hollywood (California, Estados Unidos). Lik jchʼakbe mas yorail sventa xkakʼbe yil krixchanoetik kʼuxi xuʼ stabeik sbalil li tojobtaseletik ta Skʼop Diose. Ti yakal ta jkolta ta xchanel Vivlia li yantike jaʼ mas chakʼbun muyubajel, jaʼ mu sta kʼalal lek toʼox ojtikinbilune. Li ta 2002 laj kil jbakutik yan velta xchiʼuk li Cheri, ti laj kojtikin ta Hong Kong. Jutuk mu xkoʼolaj ti kʼu toʼox yelan li jkuxlejalkutike. Li stuke jun xaʼox jabil spasoj kanal ta Miss Hong Kong kʼalal la jpas kanal li voʼne. Yuʼun jaʼ la xojbun jkorona kʼalal la jpas kanale. Jech xtok ch-abtej toʼox ta j-akʼ-elov (actriz) xchiʼuk laj toʼox sta yabtel ta pas pelikulaetik, ti jmoj ch-abtej xchiʼuk li direktoretik ti lek ojtikinbilike. Li stuk eke te nakal ta Hollywood.

Kʼalal laj kaʼi ti cham slekom li Cheri ta skoj ti paj ta abtel yoʼontone; toj chopol laj kaʼi. Muʼyuk la sta spatobil yoʼonton li ta srelijion, ti budismo sbie. Jaʼ jech chaʼi sba kʼuchaʼal laj kaʼi jbae, yuʼun akʼo mi lek ojtikinbil jech kʼuchaʼal oy ta yoʼonton li yantike; pe chat yoʼonton xchiʼuk muʼyuk spatoj yoʼonton ta stojolal li krixchanoetike. Lik kakʼbe yil li kʼusi jchanoj ta Vivliae, pe ta skoj ti makbil snopben yuʼun li kʼusi xchʼunoj ta srelijione muʼyuk laj yaʼibe smelolal li kʼusi melele.

Oy jun kʼakʼal li ta 2003, li Cherie la skʼoponun tal kʼalal jaʼo batem spas gravar jun pelikula ta Vancouver (Canadá). Xmuyubaj tajek yuʼun laj yalbun ti kʼalal jaʼo yakal tstsʼot batel skaro ta karetera xchiʼuk ti tskʼel batel li kʼupil sba osiltike, xi la skʼopon Diose: «¿Buchʼuot? ¿Kʼusi abi?». Kʼalal jaʼo yakal jech chal taje, te echʼ ta yelov jun Salon sventa Tsobobbail xchiʼuk te laj yil li biil Jeovae. La snop ti jaʼ stakʼobil li s-orasione xchiʼuk ta anil noʼox la skʼan la xchiʼin ta loʼil junuk stestigo Jeova. Jaʼ yuʼun la jkʼopon batel jlom ermanoetik, vaʼun kʼalal echʼ  junchib kʼakʼale li Cherie bat ta tsobajel ta chino kʼop ta Vancouver.

Xi laj yalbun li Cherie: «Li krixchanoetik liʼe chakʼbeikun iluk ti oyun ta yoʼontonik ta melele. Yuʼun xuʼ xkalbeik ti kʼu yelan chkaʼi jbae». Limuyubaj tajek kʼalal laj kaʼi ti jech laj yal taje, yuʼun kʼalal te toʼox ch-abtej li ta empresaetik ti tspasik pelikulaetike muʼyuk bu la sta yamigotak. Muʼyuk laj yikta sba ta tsobajel li Cherie. Pe li ta 2005 pasat kontratar sventa tspasik chib pelikula, jaʼ yuʼun sut batel ta Hong Kong. Li ta 2006, xmuyubaj laj yakʼ xkuxlejal ta stojolal Jeova: laj yichʼ voʼ ta jun asamblea ta Hong Kong sventa kʼot ta stestigo Jeova. Li stuke tskʼan chchʼak mas skʼakʼal sventa chtun ta stojolal Jeova, pe chmakat yuʼun li yabtele, ta skoj taje chat-o yoʼonton.

Li ta 2009, li Cherie jel li xkuxlejale. La snop chikta li yabtel ta empresaetik ti bu tspasik pelikulaetik sventa mas xtun ta stojolal Jeovae. La sta ep yamigotak li ta tsobobbaile. Lik xchʼakbe mas yorail li cholmantale, li avi une tskʼupin tajek skoltael li krixchanoetik yoʼ xmuyubajike (Mateo 24:14).

Li Cherie lik xchan nepalí kʼop sventa tskolta li stestigotak Jeova ti chcholbeik mantal li krixchanoetik ti likemik ta Nepale; pe ti te xa nakalik ta Hong Konge. Li ta Hong Konge muʼyuk lek chilik li krixchanoetik ti likemik tal ta Nepal ta skoj ti mu snaʼ lek xkʼopojik ta inglés, ta chino kʼop xchiʼuk ti jelel skostumbreike. Li Cherie chalilanbun ti tskʼupin tajek skoltael ta yaʼibel smelolal kʼusi chal Vivlia li krixchanoetik taje. Jun skʼelobile, kʼalal jaʼo chchol mantal ta naetike, la xchiʼin ta loʼil jun ants ti snabe skʼoplal jutuk li Jesuse; pe ti mu snaʼ jutebuk ta sventa li Jeovae. Li Cherie laj yakʼbe yil ta Vivlia ti la spas orasion ta stojolal Stot ta vinajel li Jesuse. Kʼalal laj yaʼibe smelolal ti xuʼ spas orasion ta stojolal melel Dios li antse, la skʼan xchan batel mas. Te van kʼuk yuni jalil echʼe, lik xchan Vivlia li smalal eke xchiʼuk li stsebe (Salmo 83:18; Lukas 22:41, 42).

Kʼalal laj kakʼ venta ti tskʼupin tajek ti kʼu sjalil xchʼakojbe yorail chlokʼ ta cholmantal li kamigae, xi la jnope: «¿Kʼu yuʼun mu jechuk jpas li voʼon eke?». Li vaʼ kʼakʼal taje, sutemun xaʼox tal ta Hong Kong ek. La jnop ti ta jchapan lek li kʼusitik ta jpas ta jkuxlejal yoʼ jchʼakbe mas yorail ta xchanubtasel krixchanoetik ta sventa li kʼusi melel ta Vivliae. Ta jkʼupin xchikintael li kʼusi chal krixchanoetike xchiʼuk ti ta jkoltaik ta yaʼibel smelolal li Skʼop Diose.

Jech kʼuchaʼal liʼe, laj kakʼbe chanubtasel ta Vivlia jun ants ti likem ta Vietnam ti chat noʼox tajek yoʼontone xchiʼuk ti ch-okʼ tajeke. Li avie xmuyubaj xa xchiʼuk oy xa yamigotak li ta tsobobbaile.

Li Cheri xchiʼuk voʼone oy kʼusi la jtakutik ti mu xkoʼolaj xchiʼuk ti lek ojtikinbilunkutike. Akʼo mi laj kichʼkutik lek ojtikinel xchiʼuk toj labalik sba li empresaetik ti bu tspasik pelikulaetike, pe jaʼ mas chakʼ muyubajel kʼalal ta jchanubtastik ta sventa Jeova li krixchanoetike, yuʼun jaʼ sventa yichʼobil ta mukʼ. Kakʼojkutik venta ti jaʼ melel li kʼusi laj yal Jesus liʼe: «Jaʼ mas xmuyubaj li buchʼu chakʼe, jaʼ mu sta li buchʼu chichʼe» (Echos 20:35).