MANTAL TA SLIKEBALTIK PAJINA: LI KʼUSI MU XANAʼ TA SVENTA LI STESTIGOTAK JEOVAE
¿Buchʼu jaʼ li stestigotak Jeovae?
«Oy xa ta sjayibal jabil xkojtikin li Mike. Li stuke jaʼ stestigo Jeova, pe toj yan-o chkil li srelijione. ¿Buchʼu jaʼ li Jeovae? ¿Kʼu yuʼun muʼyuk tspasik kʼinetik li stestigotak Jeovae? Ta jvul koʼonton ta stojolal li Mike ti jech stikʼoj sba ta jun sectae (bikʼit relijion ti xchʼakoj sba lokʼel ta yan relijione).» (Becky, likem ta California, Estados Unidos)
«Li jlakʼnatake lik xchanik Vivlia xchiʼuk li stestigotak Jeovae, vaʼun xi la jnope: ‹¡Toj yan-o xa noʼox chkaʼi sbi li srelijionike! ¿Kʼusi xa noʼox skʼan xal taje?›.» (Zenon, likem ta Ontario, Canadá)
«Li kajnil xchiʼuk voʼone ta jnopkutik toʼox ti chtal svulaʼanunkutik li stestigotak Jeova sventa xibatkutik li ta srelijionike, yuʼun kalojkutik mi snaʼojik ti chopol chkaʼi jbakutik ti muʼyuk li-aykutik li ta chʼulnae. Li ta relijionetik ti mas mukʼtike muʼyuk jtaojbekutik stakʼobil li kʼusi ta jkʼan ta jnaʼkutike, ¿mi jaʼ xa xuʼ te ta jtakutik li ta srelijion stestigotak Jeova ti jaʼik noʼox jun sectae?» (Kent, likem ta Washington, Estados Unidos)
«Ti melel xkaltike, mi jsetʼuk jnaʼ buchʼuik xchiʼuk kʼusi xchʼunojik.» (Cecilie, likem ta Esbjerg, Dinamarca)
Oy van aviloj chcholik mantal ta naetik, ta kaye, tspukik vunetik lokʼem ta Vivlia xchiʼuk chakʼik matanal chanubtasel. Xuʼ van jaʼ yakʼojbot junuk stestigo Jeova li revista te atsakoje. Pe jech kʼuchaʼal la sjakʼbe sbaik li krixchanoetik ti laj kalbetik tal skʼoplale, yikʼaluk van oy jech ajakʼojbe aba ek.
Mi oy kʼusi chakʼan chanaʼ ta sventa li stestigotak Jeovae, ¿kʼusi xuʼ xapas? ¿Kʼuxi xuʼ xanaʼ ta sventa li kʼusi xchʼunojike, ti bu tstaik takʼin ta sventa li abtelal tspasik o kʼalal tsvaʼanik li bu ta stsob sbaike xchiʼuk kʼu yuʼun chbat yalik mantal ta ana o ti chchiʼinot ta loʼil ta bee?
Li Cecilie, ti laj xa kalbetik tal skʼoplal ta akʼole, xi chale: «Ep tajek la jchanbe skʼoplal ta Internet li stestigotak Jeovae. Laj kaʼi junantik loʼiletik xchiʼuk epal nopbil kʼopetik ta stojolalik, ta skoj taje chopol kʼusi lik jnop ta stojolalik». Pe kʼalal la xchiʼin ta loʼil li stestigotak Jeovae, laj yaʼibe lek smelolal li kʼusi toʼox snopoj ta stojolalike.
Mi chakʼan chanaʼ mas ta sventa li stestigotak Jeovae, ¿kʼu yuʼun mu xachiʼin ta loʼil? Jaʼik li buchʼutik tstsʼibaik li revista liʼe xchiʼuk ta sjunul yoʼontonik tstakʼik li kʼusi chakʼan chanaʼ ta stojolalike; muʼyuk chloʼlavanik (Proverbios 14:15). Li ta yan mantaletik chtale, xuʼ van skoltaot ta snaʼel buchʼu jaʼ li stestigotak Jeovae, kʼusi xchʼunojik xchiʼuk kʼusitik tspasik.
