LI TA loʼiletik taje, ¿bu junukal ti jech chanope? Ep buchʼutik jaʼ lek chaʼiik li kʼusi laj yal Sauloe, ti ojtikinbil kʼuchaʼal jtakbol Pabloe. Yuʼun chpatbat-o yoʼontonik li kʼusi laj yale (Echos 17:26, 27). Li ta Vivliae ta jtatik yan loʼiletik ti chakʼ spatobil koʼontontik eke. Jun skʼelobile, li Jesuse laj yal ta jun orasion ti xuʼ xojtikin Dios li yajchankʼoptake xchiʼuk ti xuʼ x-akʼbatik bendisione (Juan 17:3).

Pe li filosofoetike jelel li kʼusi tsnopike, jech kʼuchaʼal li Filone. Laj yakʼik ta aʼiel ti mu stakʼ ojtikinel li Diose yuʼun la mu stakʼ naʼel kʼu yelan. Vaʼun chaʼa, ¿buchʼu ti melel kʼusi chale?

Li Vivliae chal ti oy onoʼox kʼusi vokol chkaʼibetik smelolal ta sventa li Diose. Jech kʼuchaʼal ti bu lik tale, ti kʼu to noʼox yelan li snopbene xchiʼuk li spʼijil ti muʼyuk xa noʼox spajebe. Skotol taje mu xkaʼibetik smelolal li voʼotike. Pe maʼuk tsmakutik sventa xkojtikintik Dios ta skoj ti oy kʼusitik mu jnaʼtik ta stojolale. Yuʼun mi la jnopbetik skʼoplal li kʼusi mu jnaʼtike tskoltautik sventa xijnopaj ta stojolal li Jpasvaneje (Santiago 4:8). Jkʼeltik batel jlomuk li kʼusitik mu xkaʼibetik smelolal ta sventa Diose, mi laje ta jkʼeltik batel jlomuk li kʼusi xkaʼibetik smelolale.

TE OY-O SBATEL OSIL. Li Vivliae chal ti ‹sbatel osil te oy-o› li Diose (Salmo 90:2). Jaʼ xkaltik ti muʼyuk slikebe xchiʼuk spajebe, te oy-o sbatel osil. Ta sba jsatike, «li Diose toj echʼem smucʼul, [...] mu xlaj cotquintic; mu xuʼ ta jnaʼbetic sjabilal noxtoc» (Job 36:26).

Kʼuxi ta jtabetik sbalil. Mi laj kojtikintik lek li Diose yaloj ti chakʼbutik kuxlejal sbatel osile (Juan 17:3). Pe mi muʼyuk chkuxi sbatel osil li stuke, ¿mi oy van sbalil jechuk li kʼusi laj yal taje? Taje jaʼ noʼox xuʼ xkʼot ta spasel yuʼun «li Ajvalil ti oy-o sbatel osile» (1 Timoteo 1:17).

LI SNOPBENE. Li Vivliae chal ti «muʼyuc bochʼo xuʼ tstabe [...] [sbijil]» li Diose, yuʼun jaʼ mas toj ep kʼusitik snaʼ kʼuchaʼal voʼotike (Isaías 40:28; 55:9). Jaʼ yuʼun xi tsjakʼe: «¿Buchʼu xojtikinbe snopben Jeova sventa xchanubtas?» (1 Korintios 2:16).

Kʼuxi ta jtabetik sbalil. Li Diose xuʼ yuʼun chchikintabe s-orasion ta smiyonal xa noʼox krixchanoetik akʼo mi koʼol yorail tspasik (Salmo 65:2). Mu jnoptik ti solel mu xokob ta xchikintael li kʼusi chkalbetike. Li stuke chakʼ venta kʼalal chcham jkot uni saktarine, jaʼ yuʼun xi chalbutik li ta Skʼope: «Voʼoxuk mas tsots akʼoplalik, jaʼ xkom to li epal saktarine» (Mateo 10:29, 31).

TI KʼU YELAN SNAʼ X-ABTEJ LI DIOSE. Li Vivliae chal ti «mu xlaj [kojtikintik] scotol li cʼusi spasoj Dios ta sliqueb xchiʼuc cʼalal to ta slajebe» (Eclesiastés 3:11). Jaʼ yuʼun muʼyuk onoʼox bu ta jnaʼtik skotol ta sventa li Diose. Li spʼijil tstunes kʼalal tsmeltsan li kʼusitike mu stakʼ nabel skʼoplal (Romanos 11:33). Akʼo mi jech, li Diose oy ta yoʼonton chakʼbe snaʼ li buchʼutik tspasik li kʼusi tskʼane (Amós 3:7).

Kʼuxi ta jtabetik sbalil. Mi chakʼel xchiʼuk mi chachan li Vivliae, oy onoʼox me kʼusi achʼ chachan ta sventa li Diose xchiʼuk li ta sbetake. Taje jaʼ skʼan xal ti muʼyuk spajeb ti xuʼ xijnopaj ta stojolal li Jtotik ta vinajele.

Ti oy kʼusi mu xkaʼibetik smelolal ta sventa li Diose maʼuk skʼan xal ti mu xuʼ xkojtikintike. Li ta Vivliae ta jtatik epal mantaletik ti tskoltautik ta yojtikinel li Diose. Jkʼeltik batel jayibuk skʼelobiltak.

LI SBIE. Li Vivliae chal ti oy sbi li Diose, xi chale: «Xata-o albel amukʼulal, ichʼel ta mukʼ xchiʼuk oy ajuʼel Jeova Dios kuʼunkutik». Li biil taje te chvinaj mas ta vukmil li ta Vivliae, ti jaʼ mu sta kʼuchaʼal li yantike (Apokalipsis 4:11).

Kʼuxi ta jtabetik sbalil. Li Jesuse xi laj yal ta s-orasione: «Jtotik ta vinajel, akʼo yichʼ chʼultajesel li abie» (Mateo 6:9). Jaʼ yuʼun, kʼalal chapas orasione tuneso li sbi Diose. Li Jeovae oy ta yoʼonton tspoj skotol li buchʼutik chichʼbeik ta mukʼ li sbie (Romanos 10:13).

TI BU NAKALE. Li Vivliae chal ti oy chaʼjot ti bu oy kuxlejale: li baʼyele jaʼ li kʼusi mu xkil ta jsatike, li teye jaʼ noʼox te oyik li kuxlejaletik ti mu xvinajik ta kʼelele, li xchibale jaʼ li Balumile xchiʼuk skotol li kʼusitik xkil ta jsatik ti oy ta toyole (Juan 8:23; 1 Korintios 15:44). Li jpʼel kʼop vinajel chichʼ alel ta Vivliae jaʼ chalbe skʼoplal ti bu oyik li kuxlejaletik ti mu xvinajik ta kʼelele xchiʼuk jaʼ te nakal li Jpasvanej eke (1 Reyes 8:43).

Kʼuxi ta jtabetik sbalil. Kʼalal ta jnaʼtik skotol taje, tskoltautik ta yaʼibel smelolal kʼu yelan li Diose. Li Jpasvaneje maʼuk jun juʼelal ti mu stakʼ naʼel  kʼu yelane xchiʼuk ti ta buyuk noʼox oye. Li Jeovae kuxul ta melel xchiʼuk oy bu nakal. Pe ti bu nakale chil talel skotol, «muʼyuk bu nakʼal ta sat jtosuk li kʼusitik pasbile» (Evreos 4:13).

LI STALELALTAKE. Li Vivliae chal ti Jeovae oy stalelaltak ti kʼupilik sbae. Jech kʼuchaʼal liʼe, jaʼ jkʼanvanej, mu snaʼ snop kʼop o tsjut kʼop, oy xkʼuxul yoʼonton, mu ta aniluk ch-ilin, oy slekil yoʼonton, oy stukʼil xchiʼuk mu snaʼ xtʼujvan (1 Juan 4:8; Tito 1:2; Éxodo 34:6; Echos 10:34). Pe li kʼusi mas toj labal sbae jaʼ ti tskʼan ti «lec xil sbaic xchiʼuc [...] ti buchʼu ta xʼaqʼue [ta] ichʼel ta mucʼ yuʼune» (Salmo 25:14, Ch).

Kʼuxi ta jtabetik sbalil. Nopo noʼox avaʼi: ¡li voʼote xuʼ xavamigoin li Jeovae! (Santiago 2:23.) Kʼalal mi laj avojtikin batel mas li stalelaltak Jeovae, tskoltaot sventa xavaʼibe lek smelolal junantik loʼiletik ta Vivlia.

Li Vivliae chchapbe lek skʼoplal kʼu yelan li Jeova Diose. Xuʼ xkojtikintik, yuʼun li stuke tskʼan ti xijkʼot ta yamigoe. Xi chal ta melel li Skʼope: «Me oy ta avoʼnton chasaʼe, chacʼ sba ta ilel» (1 Crónicas 28:9). Mi ta jkʼeltik li Vivliae xchiʼuk mi ta jnopbetik skʼoplal li kʼusi chale, tskoltautik sventa xkojtikintik li Diose, vaʼun «chnopaj tal ta [jtojolaltik]» (Santiago 4:8).

Xuʼ van chanop ti mu xuʼ xijkʼot ta yamigo li Jpasvaneje ta skoj ti oy kʼusitik mu stakʼ naʼel ta stojolale. Pe nopo ta sventa liʼe: sventa xijkʼot ta yamigo junuk doktore ¿mi persa van skʼan jaʼutik doktor ek? ¡Mu persauk! Yuʼun li yamigo jun doktore xuʼ van yan-o kʼusi tspas. Pe taje mu xmakatik sventa jaʼuk slekil amigo sbaik, li kʼusi noʼox skʼan spas li amigoile jaʼ ti xojtikin lek li doktore, jech kʼuchaʼal li kʼusi tskʼupin xchiʼuk mu skʼupine. Li voʼot eke, skʼan xavojtikin kʼu yelan stalelal li Jeova sventa xakʼot ta yamigoe.

Li Vivliae lek jamal chal kʼuxi xuʼ xkojtikintik li Jpasvaneje. ¿Mi chakʼan chakʼot ta yamigo? Li stestigotak Jeovae ta sjunul yoʼontonik tskoltaot ta xchanel li Vivliae. Ta jtijkutik avoʼontonik ti xachiʼinik ta loʼile. Jech xtok xuʼ xa-och li ta jpajinakutik ta Internet ta jw.org.