Li Jeova Diose jaʼ li «nioʼ sventa cuxlejale» (Salmo 36:9). Jaʼ yuʼun, li stuke xuʼ xakʼbe sutel yan velta xkuxlejal li buchʼutik chamemike. Li Vivliae chal ta melel ti jaʼ jech tspas ta jelavel li Diose. (Kʼelo Echos 24:15.) ¿Kʼu yuʼun oy ta yoʼonton chchaʼkuxes animaetik li Diose?

Li Jpasvanej kuʼuntike oy onoʼox ta yoʼonton ti xijkuxiutik sbatel osile (Génesis 1:31; 2:15-17). Muʼyuk jelem-o li kʼusi oy ta yoʼontone. Li stuke chopol chil ti muʼyuk jal chijkuxiutike xchiʼuk ti oy ep jvokoltike. (Kʼelo Job 14:1; Isaías 26:19.)

Kʼalal la spas krixchanoetik li Diose, ¿mi jaʼ van sventa chkuxiik ta vinajel? Moʼoj. Li stuke la smeltsan anjeletik sventa te xkuxiik ta vinajel, pe li voʼotike la spasutik sventa liʼ xijkuxiutik ta Balumile (Génesis 1:28; Job 38:4, 7). Sventa xkaʼibetik lek smelolale, jnopbetik skʼoplal kʼalal la xchaʼkuxes animaetik li Jesukristoe. ¿Bu laj yichʼik chaʼkuxesel li animaetik taje? Liʼ ta Balumile. Jaʼ jech chkʼot ta pasel ta stojolalik jutuk mu skotolikuk li buchʼutik chichʼik chaʼkuxesel ta jelavele: liʼ chkuxiik ta Balumile. (Kʼelo Juan 5:28, 29; 11:44.)

Akʼo mi jech, li Diose stʼujoj uni jtsop krixchanoetik sventa te chichʼik chaʼkuxesel ta vinajel, vaʼun ch-akʼbat sbekʼtalik ti mu xvinaj ta kʼelele (Lukas 12:32; 1 Korintios 15:49, 50). Li jtsop krixchanoetik taje jmoj ch-ajvalilajik xchiʼuk Jesukristo ta spʼejel Balumil. (Kʼelo Apokalipsis 5:9, 10.)