¿MI XVUL ta ajol kʼusi ti mas tsots skʼoplal echʼem ta akuxlejale? ¿Mi jaʼo kʼalal lanupune? ¿Mi jaʼo kʼalal ayan li baʼyel akerem o atsebe? O ¿mi jaʼo kʼalal laj avichʼ voʼe? Mi jaʼe, xvul van ta ajol ti la muyubaj tajeke xchiʼuk ti muyubajik li yantike, yuʼun laj yilik ti laj avakʼ ta ilel ti akʼanoj ta sjunul avoʼonton li Jeovae, ta sjunul akuxlejal, ta sjunul anopben xchiʼuk ta sjunul avipal (Mar. 12:30).

Jal xa van xamuyubaj chatun ta stojolal li Jeovae. Akʼo mi jech, jlom ermanoetike mu xa jechuk xmuyubajik kʼuchaʼal toʼox ta voʼnee. ¿Kʼu yuʼun? ¿Kʼusi srasonal oy kuʼuntik sventa xijmuyubaj-o kʼalal chijtun ta stojolal Jeovae?

Xijmuyubaj kʼalal chkalbetik skʼoplal li Ajvalilal yuʼun Diose, yuʼun jnaʼojtik ti mu xa jaluk skʼan slajes chopol balumil li Jeovae, vaʼun chijkuxi ta jun paraiso. Xuʼ jchʼuntik ti poʼot xa xkʼot ta pasel taje, yuʼun xi chal Sofonías 1:14: «Nopol xa scʼan sta li smucʼta cʼacʼalil Mucʼul Diose». Akʼo mi jech, xuʼ van muʼyuk xijmuyubaj kʼalal mu xvul-o yileluk li kʼusi ta jmalatike, vaʼun mu xa jechuk chijtun ta stojolal Dios kʼuchaʼal toʼox ta voʼnee (Prov. 13:12).

Jech xtok, xijmuyubaj kʼalal oyutik ta steklumal li Diose, yuʼun toj lek stalelalik. Taje xuʼ van jaʼ la stij koʼontontik sventa xij-och ta mantal (1 Ped. 2:12). Pe ¿kʼusi van ta jpastik mi laj yichʼ mantal junuk ermano ta skoj ti la spas smule? Taje xuʼ van xchibajik-o jlom ermanoetik, vaʼun muʼyuk xa xmuyubajik.

Ta skoj ti xuʼ jaʼ xbat ta koʼontontik saʼel kʼulejal li ta sbalumil Satanase, xuʼ van muʼyuk xa xijmuyubaj kʼalal chijtun ta stojolal Jeovae, yuʼun chakʼ jnoptik ti ep to kʼusi skʼan kuʼuntike. Jaʼ yuʼun skʼan jvules ta joltik ti xi laj yal li Jesuse: «Mu me xuʼ xtun ta chaʼvoʼ yajval li jun mosoe, yuʼun tskontrain li june, jaʼ tskʼan li yane; o mas nopol chakʼ sba ta stojolal li june, pe tspʼaj li yane. Jaʼ me jech ek, mu me xuʼ xatunik ta smoso Dios xchiʼuk ta smoso kʼulejal» (Mat. 6:24). Melel maʼ taje, yuʼun muʼyuk xijmuyubaj chijtun ta stojolal Jeova mi jaʼ batem ta koʼontontik saʼel li kʼusitik oy ta balumile.

Li buchʼutik skʼanojik Jeovae mu toj tsotsuk chaʼiik ta chʼunbel li smantaltake (1 Juan 5:3). Xi laj yal li Jesuse: «Laʼik ta jtojolal akotolik, voʼoxuk ti tsots tajek cha-abtejike xchiʼuk ti ol avikatsike, voʼon ta jsikubtas avoʼontonik. Jaʼ kuchik li kʼatlom teʼ kuʼune xchiʼuk chanbeikun jtalelal, yuʼun manxoun xchiʼuk bikʼit kakʼoj jba, vaʼun chata siketel avoʼontonik. Yuʼun li kʼatlom teʼ kuʼune kʼun ta kuchel xchiʼuk muʼyuk bu ol li kikatse» (Mat. 11:28-30). Jaʼ yuʼun, tstsatsubtasutik xchiʼuk xijmuyubaj yuʼun ti yajchankʼoputik Jesuse. Pe ¿kʼu yuʼun chkaltik ti xijmuyubaj yuʼun ti chijtun ta stojolal li Jeovae? Jkʼelbetik batel oxibuk srasonal (Hab. 3:18).

Li Jeovae jaʼ yakʼoj jkuxlejaltik, jun Dios ti xmuyubaje (Ech. 17:28; 1 Tim. 1:11). Manchuk mi oy xa ta sjayibaluk jabil ti kichʼojtik voʼe, xijmuyubaj-o chijtun ta stojolal Jeova ta skoj ti jnaʼojtik ti jaʼ yakʼoj jkuxlejaltike.

Kalbetik skʼoplal Héctor ti tun 40 jabil ta jkʼelvanej ta sirkuitoe. Xmuyubaj noʼox chtun ta stojolal Jeova, manchuk mi ep xa sjabilal xchiʼuk ti mu masuk xa kʼusi stakʼ spas ta skoj ti ip li yajnile (Sal. 92:12-14). Xi chale: «Chkat-o koʼonton kʼalal chkil ti yantik stsatsub xchamel li kajnile xchiʼuk tsots chkaʼi kʼalal ta jkʼele, akʼo mi jech, ximuyubaj-o chitun ta stojolal li Jeovae. Jkʼanoj li Jeovae xchiʼuk ta sjunul koʼonton chitun ta stojolal, yuʼun jnaʼoj ti jaʼ yakʼoj jkuxlejale xchiʼuk ti oy kʼusi tspas ta stojolal li krixchanoetike. Sventa ximuyubaj-oe, muʼyuk chkikta jba ta cholmantal xchiʼuk chkakʼ persa ti teuk ta jol li kʼusitik tspas ta jtojolaltik li Ajvalilal yuʼun Diose».

Tspojutik lokʼel ta mulil xchiʼuk ta lajelal li Jeovae. Xi chalbutik li Vivliae: «Skʼanoj tajek krixchanoetik li Diose, jaʼ yuʼun laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:16). Ta melel xuʼ xchʼay jmultik xchiʼuk xuʼ jtatik kuxlejal sbatel osil, jaʼ noʼox mi laj kakʼ xchʼunel koʼontontik li ta matanal laj yakʼ Jesuse. ¿Mi mu jechuk ti ta jtojtik ta vokol xchiʼuk ti mas xijmuyubaj chijtun ta stojolal Dios kʼalal ta jnopbetik skʼoplal taje?

Jun ermano ta México ti Jesús sbie laj yakʼ venta ti jaʼ batem ta yoʼonton li yabtele, xi laj yale: «Solel muʼyuk xa ta jkux ta abtel ta skoj ti ta jkʼan ep jtakʼine. Pe lik jchanbe skʼoplal li Jeovae xchiʼuk la jchan ti laj yakʼ Xnichʼon ta jkojtike. Vaʼun ayan ta koʼonton ti chitun ta stojolale  xchiʼuk laj kakʼ jkuxlejal ta stojolal. Oy xaʼox ta 28 jabil chi-abtej ta jun empresa, laj kikta sventa xitun ta tsʼakal ora». Ti jech lik tunuk ta stojolal li Jeovae, mas xa xmuyubaj.

Xijmuyubaj ta skoj ti lek jtalelaltike. ¿Mi xvul to ta ajol kʼu toʼox yelan akuxlejal kʼalal mu toʼox xanabe skʼoplal li Jeovae? Li jtakbol Pabloe laj yalbe yajtsʼaklomtak Kristo ta Roma ti kʼotemik toʼox ta ‹smoso li mulile›, pe laj yalbe xtok ti kʼotemik xa ta «smoso li tukʼilale». ¿Kʼusi sbalil tstabeik? Tstaik kuxlejal sbatel osil ta skoj ti lek stalelalike (Rom. 6:17-22). Jechutik ek, chkakʼtik persa ti lekuk jkuxlejaltike, vaʼun jaʼ tskoltautik sventa mu xijmulivaj xchiʼuk ti mu jsaʼtik kʼope. ¿Mi mu jechuk ti xijmuyubaj yuʼun taje?

Kalbetik skʼoplal jun vinik ti Jaime sbie, jaʼ toʼox jun bokseador. Yaloj ti muʼyuk Diose xchiʼuk tsnop toʼox ti kʼunkʼun kʼataj talel li kuxlejale. Kʼalal lik batuk ta tsobajeletike, solel toj labal sba laj yil ti kʼu yelan skʼanoj sbaike. Sventa xuʼ sjel li stalelale, la skʼanbe Dios ti akʼo xkoltaat sventa stsatsub li xchʼunel yoʼontone. Xi chale: «Kʼunkʼun laj kakʼ venta ti xkoʼolaj ta jun Totil ti chkʼanvan tajek li Jeovae xchiʼuk ti chkʼuxubinvane. Xchabiojun li tukʼil mantaletik yakʼoje. Chamemun xa jechuk ti muʼyukuk la jel li jtalelale, yuʼun jech kʼot ta stojolal li voʼne jchiʼiltake. Ti kʼu xa sjalil tunemun tal ta stojolal Jeovae, jaʼ mas yakʼojbun jmuyubajel».

¿Kʼu yelan chkaʼi jbatik yoʼ to ta jmalatik xlaj li chopol balumile? Teuk me ta ajol ti chijkuxi sbatel osil mi ‹yakal ta jtsʼuntik ta sventa chʼul espiritue›. «Jaʼ yuʼun mu me xkikta jbatik ta spasel li kʼusitik toj leke, yuʼun mi muʼyuk lijlubtsaje ta jtsobbetik sat mi sta skʼakʼalile» (Gal. 6:8, 9). Mu me xchibajesutik ta skoj li vokoliletike, yuʼun tskoltautik li Jeovae. Kakʼtik persa ti lekubuk batel li jtalelaltik sventa kuxul xijkom li ta mukʼta tsatsal vokolile xchiʼuk muyubajkutik noʼox me kʼalal chijtun ta stojolal li Jeovae (Apok. 7:9, 13, 14; Sant. 1:2-4).

Mi chkuch kuʼuntike, ta me xakʼbutik jmotontik li Jeovae. Yuʼun yakʼoj venta ti chkakʼtik persae, chil ti jkʼanojtike xchiʼuk ti jkʼanojbetik li sbie. Ta muyubajeluk xijtun-o ta stojolal, vaʼun jech me chkaʼi jbatik kʼuchaʼal laj yaʼi sba li Davide: «Scotol ora liʼ oy o ta jtojol li Mucʼul Diose, jech muʼyuc bochʼo xuʼ chisjipun ta lum, yuʼun liʼ oy ta jbatsʼicʼob. Jaʼ yuʼun toj xcuxet noʼox coʼnton; jun yoʼnton chcux li jbecʼtale» (Sal. 16:8, 9).