Li stestigoutik Jeovae oy ta koʼontontik li kermanotaktike (1Pedro 2:17). Yikʼaluk van jech chkaʼi jbatik kʼuchaʼal li Tannise, jun ermana ti likem ta Keniae, xi chale: «Oy tajek ta koʼonton ti jnaʼ li kʼusi chkʼot ta stojolal li kermanotak ta spʼejel balumile». Li stestigoutik Jeovae, ¿kʼuxi jnaʼtik li kʼusi tsnuptanik li yantike? Jaʼ te ta jtabetik skʼoplal li ta jvokʼ ti bu chal «AʼYEJETIK» ti te oy ta jw.org ti lik talel ta 2013.

 Li jvokʼ taje yichʼoj tal aʼyejetik ti chalbe skʼoplal li abtelaletik chichʼ pasel ta sventa li svaʼanel Salon sventa Tsobobbail o yan kʼusitik, ta sventa skoltael ermanoetik ti chil svokolik xchiʼuk ta sventa tsobajeletik ti tsots skʼoplal jech kʼuchaʼal kʼalal tslokʼesik jlikuk Vivliae. Chalbe skʼoplal xtok ta sventa ermanoetik ti tikʼilik ta chukel ta skoj li kʼusi xchʼunojike. Jech xtok, te ta jtabetik kʼupil sba sloʼilaltak li kampanyaetik sventa cholmantal xchiʼuk li Snaʼobil slajel Kristoe. ¿Pe buchʼu tsabe skʼoplal skotol li notisiaetik taje, xchiʼuk kʼuxi chichʼ chapanel?

 Li Oficina de Información Pública jaʼ sbainoj li jvokʼ «AʼYEJETIK» xie. Li Komite yuʼun Kordinadoretik yuʼun Jtsop Jbeiltasvanej ti te oy li ta smeʼ nail abtelale, jaʼ sbainojik li departamento taje xchiʼuk chkoltavan mas ta 100 ermanoetik xchiʼuk ermanaetik, junantike te to sna chkoltavanik tal. Li ermanoetik taje tstsʼibaik tsabeik skʼoplal, tsjelubtasik ta yan kʼop o jaʼ chakʼbeik slokʼoltak. Jech xtok, chchiʼinik ta loʼil li buchʼutik oy yabtelike, li buchʼutik ch˗abtejik ta radio xchiʼuk ta televisione o li maestroetik ta universidade. Jech xtok, chkoltavan mas ta 80 Beteletik li ta departamento taje.

 Li Oficina de Información Pública jmoj ch˗abtejik ta xchapanel notisiaetik xchiʼuk li buchʼutik te oyik ta Betele, ti jaʼ te chkoltavanik li ta Información Públicae. Kʼalal mi laj yaʼiik junuk loʼil li ermanoetike, ta skʼelik mi xuʼ xalik ta notisia, tsjakʼbeik lek skʼoplal xchiʼuk tsabeik lek skʼoplal mi melel jech kʼot ta pasel. Sventa spas yuʼunike yikʼaluk van skʼan oy buchʼu sjakʼbeik sloʼil o xchiʼinik ta loʼil li buchʼu xchanojbe lek skʼoplale. Kʼalal mi laj xa ox spasik skotol taje, tstsʼibaik, tsmeltsanik xchiʼuk tskʼelik mi lek kom. Ta tsʼakale ta xakʼbeik slokʼoltak, mi laje stakbeik batel li Komite yuʼun Kordinadoretik sventa xal mi xuʼ xa xichʼ lokʼesel ta notisia.

 ¿Kʼusi tsnop junantik ermanoetik ta sventa li jvokʼ «AʼYEJETIK» xie? Jun ermana ti nakal ta Filipinas ti Cheryl sbie xi chale: «Ta jkʼupin tajek xchanel jujun sob li aʼyejetik sventa li organisasion xchiʼuk li kermanotake».

 Ep buchʼutik labal sba chilik ti mu xkoʼolaj li aʼyejetik ta jtatik li ta jw.org xchiʼuk li aʼyejetik chalik li ta radio o ta televisione. Li Tatiana ti likem Kazajistáne xi chale: «Ep tajek sbalil chkil li aʼyejetik ta jw.org, yuʼun melel li kʼusi chale». Jun ermana ta México ti Alma sbie xi chale: «Li notisiaetik li ta radio xchiʼuk ta televisione naka chopol aʼyejetik chalik, pe li aʼyejetik ta jpajinatike tspat tajek koʼontontik».

 Li jvok’ «A’YEJETIK» xie, maʼuk noʼox chalbutik notisiaetik ti lek sabil skʼoplale, yuʼun tstsatsubtas xchʼunel koʼontontik. Li Bernard ti likem ta Keniae xi chale: «Koliyal li aʼyejetik taje, avie koʼol xa kʼuchaʼal kutsʼ kalal chkil li ermanoetike, mu ventauk ti bu oyike. Kʼalal ta jpas orasione, xuʼ xkalbe sbiik xchiʼuk ti kʼusi yakal tsnuptanike». Bybron, jun ermana ti nakal ta Keniae xi chale: «Xi muyubaj tajek kʼalal chkil tsmuyesik ti lokʼ Vivlia ta yan kʼope, tsvulesbun ta jol ti skʼanojutik jkotoltik li Jeovae».

 Xuʼ van stsatsubtas koʼontontik kʼalal ta jkʼeltik li aʼyejetik ti bu chal ti yakal chichʼ kontrainel li ermanoetike. Xi chal Jackline, jun ermana ti likem ta Keniae: «Kʼalal ta jnopbe skʼoplal li stsatsal yoʼontonike, mas ta stsatsub˗o li xchʼunel koʼontone, jech˗o ta jkʼel kʼusi koltaatik˗o sventa xkuch yuʼunik. Jech xtok, laj kakʼ venta ti kʼalal tspasik orasion, chchanik Vivlia o chkʼejinike, jaʼ koltaatik˗o li ermanoetik sventa xkuch yuʼunik li kʼusi tsnuptanike».

 Jun ermana ta Costa Rica ti Beatriz sbie tstoj tajek ta vokol li aʼyejetik ti chalbe skʼoplal nikel, nojelal ta voʼ o yan kʼusitike, xi chale: «Labal sba chkil ti kʼuyelan anil tskolta ermanoetik li organisasione, toj lek ti kʼuyelan chkoltavanike xchiuk ta slekil yoʼonton tspasik, kʼalal chkil taje, chkakʼ venta ti ta melel jaʼ s-organisasion Jeova liʼe».

 Ta jtojtik tajek ta vokol ti te oy li jvokʼ «AʼYEJETIK» li ta jpajinatik ta Internete. Koliyal li aʼyejetik taje, xuʼ jnaʼtik li kʼusitik tsnuptan li kermanotaktik ta spʼejel balumile. Pe manchuk chavakʼik li matanal takʼin ta donate.pr418.com mu spas li abtelal taje, jaʼ yuʼun kolavalik tajek ti chavakʼ li kʼusitik lekik oy avuʼunike.