Li ta marso 2020 li Organización Mundial de la Salud laj yal ti pukem ta spʼejel balumil li chamel coronaviruse, muʼyuk bu snopojik ti jech˗o chakʼ vokolil li chamel taje ti jelav xa mas ta jun jabile. Ta skoj li chamele ta smiyonal xa noʼox krixchanoetik ti te kapal skʼoplal li stestigotak Jeova eke, ipajemik, tsvul yoʼontonik xchiʼuk yiloj svokolik ta takʼin. ¿Kʼusi spasojik li stestigotak Jeova yoʼ skoltaik li yermanoike?

 Li Komite yuʼun Kordinadoretik yuʼun Jtsop Jbeiltasvanej yuʼun stestigotak Jeovae, la svaʼan ta spʼejel balumil 950 Komite ti chtun ta skoltael ermanoetik ti chil svokolik ta skoj li chamel coronaviruse. Junantik veltae, li komitee xchapanojik kʼuxi tskoltaik li ermanoetik ti te noʼox ta slumalike, ta yantik xtoke li ermanoetike xchʼamojik li koltael chakʼ ajvalile. Maʼuk noʼox, yuʼun li Komite ti chtun ta skoltael ermanoetik ti chil svokolike xchapanojik kʼuxi tskoltaik li ermanoetik ta yantik lume.

 Jun skʼelobile jaʼ li kʼusi kʼot ta pasel ta Paraguaye. Jlik periodiko chal ti jutukajem takʼin ta skoj li chamele. Jaʼ yuʼun, li buchʼutik te nakalik ta Paraguaye mu xman yuʼun li kʼusi tslajesike. Pe li Komite ti chtun sventa skoltael ermanoetik ta Paraguaye lik xchʼakbe li kʼusi chtun yuʼun ermanoetik sventa chib xemanae. Li kʼusi akʼbatike tetik van 600 peso stojol (30 dolar), te yichʼoj tal veʼlil, xavon xchiʼuk yan kʼusitik chtun yuʼunik sventa chanvoʼ krixchano.

 ¿Kʼuxi chchabi sbaik xchiʼuk chchabiik yantik sventa mu x-ipajik ta coronavirus li buchʼu chkoltavanike? Tstunesik cubreboca xchiʼuk muʼyuk chnopajik mas ta stojolal li yantike. Jech xok, li buchʼu chbat smanik talel li veʼlile tskʼelik lek mi chchʼunik li mantal sventa xchabi sbaik li ta chamel li buchʼutik chchonik veʼlile. Tskʼel beik lek skʼoplal ti xchabiojuk sbaik lek li buchʼutik tspukik echʼel li veʼlile ti sakuk lek li skaroike xchiʼuk ti bu chakʼik li veʼlile. Jech xtok, li buchʼutik chchʼakik li veʼlile muʼyuk mas chnopajik ta stojolal li ermanoetike.

 Li ta enero ta 2021, li Komite yuʼun Kordinadoretike laj yalik ti xuʼ xichʼ tunesel tetik van 500 miyon takʼin (mas ta 25 miyon dolar) sventa xichʼ koltael li buchʼutik chil svokolik ta skoj li coronaviruse. Li Beteletik xchiʼuk li Komite ti chtun ta skoltael li ermanoetike tskʼelik ti kʼu yelan chichʼ tunesel li matanal takʼine xchiʼuk tsaʼik ti bu yalelik stojol li kʼusitik tsmanike. Jun skʼelobile, li ta Chilee li ermanoetik ti sbainojik ta skoltael ermanoetike tskʼan ox tsmanik 750 kilo lenteja. Pe ta jun noʼox u muy j-oʼlol stojol li lentejae. Li ermanoetike laj yalik ti tstojik jeche. Pe chib ora ta tsʼakale, li jchonolajele laj yal ti sutesbat li lenteja ti laj xa ox xchon batele. Jaʼ yuʼun, li jchonolajele laj yal ti jech ch˗akʼbatik stojol kʼuchaʼal ta baʼyuke.

 Kʼalal bat xa ox xkuchik tal lenteja li ermanoetike mu xa ox xchonbatik tal, yuʼun laj yalik ti muʼyuk lek tspukik li veʼlil kʼu chaʼal li yan organisasione. Jun ermano la spas ta anil orasion, laje laj yalbe li jchonolajel ti sjakʼojik xa ta skotol tsobobbail ti buchʼu chtun yuʼunik ta melel li veʼlile. Laj yalbeik xtok ti tstsakik ta venta ti jelel kʼusi chtun yuʼunik li ermanoetike xchiʼuk ti ta jujuchʼak li veʼlile jelel kʼusi tstikʼik echʼel jaʼ ti kʼu yelan chtun yuʼun jujun utsʼ alalile. Laj to yalbeik xtok ti ta sjunul yoʼontonik chkoltavanik xchiʼuk chakʼik matanal takʼine. Toj labal sba laj yaʼi li vinike. Jaʼ yuʼun, chon batik echʼel. Pe maʼuk noʼox, yuʼun kʼalal bato smanik tal ta tsʼakale kʼelanbatik 400 kilo lenteja.

 Li ermana Lusu ti oy xa sjabilale xchiʼuk ti chamem smalale te nakal ta Liberia xchiʼuk voʼob yutsʼ yalal. Jun sob kʼalal jaʼo yakal chveʼik xchiʼuk tskʼelik li teksto sventa jujun kʼakʼale, li smom ermana Lusu ti vukub sjabilale laj yakʼ venta ti chʼabal xa sveʼelik te ta nae. Xi laj sjakʼe: «¿Kʼusi xa ta jlajestik tana un?». Patbat yoʼonton yuʼun syaya, yuʼun laj yalbe ti laj xa skʼanbe koltael Jeovae xchiʼuk ti xchʼunoj ta melel ti chkoltaatike. Ta smalel noʼox kʼakʼale, li moletik ta tsobobbaile la skʼoponik echʼel li ermana Lusu sventa xbat yichʼ tal kʼusi stakʼ slajesike. Xi chal li ermanae: «Li jmome xchʼunoj xa ta melel ti chchikinta j˗orasiontik li Jeovae, yuʼun laj yakʼ venta ti la stakʼbun li j˗orasione».

 Jun ants ta República Democrática del Congo ti te nopol nakal xchiʼuk jun utsʼ alalil ti jaʼik stestigo Jeovae. Kʼalal chil ti chkoltaat yuʼun yan testigoetik li slakʼnae, xi laj yale: «Mi echʼ li coranaviruse chij˗och ta stestigo Jeovae ek, yuʼun tskolta yermanotakik kʼalal chil svokolike». Xi laj sjakʼ li smalae: «¿Mi ta jchep noʼox aros cha˗och ta stestigo Jeovae?». «Moʼoj, maʼuk ta skoj taje, yuʼun li jchep arose jaʼ svinajeb ti skʼanoj sbaik ta melel».

 Koliyal li matanal takʼin chavakʼike, li stestigotak Jeovae skoltaojik li yermanoik ta skoj li coronaviruse. Ta jtojkutik tajek ta vokol li slekil avoʼontonike xchiʼuk ti jeltos chavakʼik matanal takʼin ta donate.pr418.com.