Muʼyuk labal sba chkaʼitik ti oy paskʼop li ta slajebal kʼakʼale (Mateo 24:6). Ep ermanoetik chil svokolik ta skoj li paskʼope, pe chichʼik koltael. Kʼalal la jkʼeltik li Yoxibal aʼyej yuʼun Jtsop Jbeiltasvaneje, la spat koʼontontik ti oy kʼusi la spasik li ta Europa del Este sventa skoltaik li ermanoetik ti chil svokolik ta skoj li paskʼop ta Ucraniae. ¿Kʼuxi yakal chichʼik koltael akʼo mi oy˗o li paskʼope? ¿Kʼuxi staojbeik sbalil li ermanoetik ta Ucraniae?

 Li ta 24 yuʼun fevrero ta 2022 kʼalal jaʼo yakal li paskʼope, li Komite yuʼun Kordinadoretike laj yalik kʼu yepal chtun takʼin sventa skoltaik li kermanotaktike. Vaʼun, li Betel ta Ucraniae ta anil lik sman li kʼusitik chtune xchiʼuk jaʼ la spukik li 27 Komiteetik ti chtunik ta skoltael ermanoetik ti chil svokolike.

 Jech xtok, li ermanoetik ta smeʼ nail abtelal yuʼun stestigotak Jeovae anil lik skʼelik kʼuxi xuʼ skoltaik li Betel ta Ucraniae. Li Komite yuʼun Kordinadoretik xchiʼuk li Komite sventa Vunetik yuʼun Jtsop Jbeiltasvaneje laj yakʼbeik sbain li Departamento sventa Smanel kʼusitik ta spʼejel Balumil yoʼ oyuk kʼusi snop spasik xchiʼuk li ermanoetik ta Betel ta Ucrania xchiʼuk Poloniae. Jujun kʼakʼal li ermanoetik ti chtunik ta Departamento sventa Smanel kʼusitik, ta Envíos xchiʼuk Asuntos legalese tstsob sbaik xchiʼuk li Komite sventa Betel ta Ucrania xchiʼuk li Departamento sventa Smanel kʼusitik ta spʼejel Balumil yoʼ xchʼakbe sba li yabtelike.

 Xi chal li Jay Swinney ti chkoltavan li ta Departamento sventa Smanel kʼusitik ta spʼejel Balumile: «Baʼyel skʼan jnaʼkutik li kʼusitik chtun yuʼunik li ermanoetike. Oy ta koʼontonkutik chkakʼbekutik sveʼelik xchiʼuk li kʼusitik onoʼox nopem xaʼi tstunesik sventa sakuk li kʼusitik yuʼunike xchiʼuk li sbekʼtalike. Pe maʼuk noʼox skʼan jnaʼkutik li kʼusi chtun yuʼunike, yuʼun skʼan jkʼelkutik kʼuxi xuʼ anil noʼox xkʼot ta Ucrania li kʼusitike. Pe ti muʼyukuk kʼusi chopol jnuptankutik xtoke».

 Li ta 9 yuʼun marso ta 2022, jnaʼojkutik xa ox li kʼusi ta jtakkutik batele. Laj yichʼ nopel ti chichʼ tikʼel batel ta kajaetik li kʼusi jtunel tajeke, jech kʼuchaʼal bekʼet xchiʼuk choy ta lata, cereal, aros, chenekʼ, xavon xchiʼuk papel. Li vaʼ orae, laj yichʼ chapel kʼu yepal chlaj stojol li kʼusi chichʼ takel batel sventa chanib xemanae, ti jaʼ 65 dolar chlaj yuʼun jujun krixchanoe. Ta skoj ti ta smiyonal xa noʼox ermanoetik chtun yuʼunik li kʼusitik chichʼ takel batele, li Komite yuʼun Kordinadoretike laj yal ti xuʼ xichʼ tunesel epal takʼin sventa xichʼ manel li kʼusitike. Pe ¿kʼuxi xuʼ xichʼ pukel xchiʼuk ti mu kʼusi xibal sba snuptanike?

 Li ta 13 yuʼun marsoe, chaʼvoʼ ermanoetik ta Poloniae la spasik preva: li kʼusitik chtun ti te oy ta Betel ta Poloniae laj yichʼik batel ta jpʼej na ta Ucrania ti nopol xil li jteklum Leópolis (Lviv). Kʼalal skʼan toʼox jayibuk kʼakʼale, li ermanoetik ta Betel ta Ucrania xchiʼuk ta Poloniae la skolta sbaik ta xchapanel kʼuxi chichʼ ichʼel batel. La xchapanbeik svunal sventa xtuchʼik jelavel li tsʼake xchiʼuk la skʼelbeik skʼoplal li karroetik sventa xichʼuk ojtikinel ti jaʼ sventa tskoltaik li yantike. Jech xtok, koʼol la skʼelbeik skʼoplal xchiʼuk li ermanoetik ta Ucrania kʼuxi xuʼ mas anil chkʼot li kʼusitik chichʼ takel batele. Kʼot ta Leópolis li kʼusitik laj yichʼ takel batele, vaʼun te van 24 ora ta mas tsʼakale laj xa ox yichʼik pukbel li Komiteetik ti chtunik ta skoltael ermanoetik ti chil svokolike. Lek vulik ta Polonia li ermanoetike. Li kʼusi koltavane jaʼ ti lek laj yichʼ chapanele xchiʼuk ti laj yakʼ tal sbendision li Jeovae.

 Li baʼyel preva la spasike lek lokʼ, pe li ermanoetike mu sta jun tonelada puk yuʼunik (jun tonelada ta Estados Unidos). Skʼan toʼox xichʼ pukel chib sien tonelada (220 tonelada ta Estados Unidos). ¿Kʼuxi tstakik batel xchiʼuk ti aniluk noʼox xichʼ pukele?

 Epal krixchanoetik lokʼ ta yoʼonton chkoltavanik kʼalal la xchanik ta jw.org kʼu yelan yiloj˗o talel svokolik ermanoetik ta skoj li paskʼope. Li buchʼutik nom nakalik ta Ucraniae laj yakʼik matanal takʼin ta sventa li abtelal ta spʼejel balumil yuʼun stestigotak Jeovae, yuʼun snaʼojik ti lek chichʼ tunesel li takʼine. Junantik ti te noʼox nopol nakalik ta Ucraniae la xchʼak skʼakʼalik, koltavanik xchiʼuk laj yakʼ li kʼusitik oy yuʼunike. Liʼe jaʼ junantik skʼelobiltak.

 Li ta Poloniae, epal ermanoetik lokʼ ta yoʼontonik koltavanik ta xchapanel epal kajaetik xchiʼuk epal ololetik la spasik divujo ta tarjetaetik. Li Bartosz Kościelniak ti chkoltavan li ta Departamento sventa Smanel kʼusitik ta Betel ta Poloniae xi chale: «Li Salmo 110:3 chal ti steklumal Jeovae chlokʼ ta yoʼonton tskolta sbaik. Ep ta velta jchanoj li kʼusi chal liʼe, pe muʼyuk toʼox kiloj kʼuxi kʼotem ta pasel. Jaʼ to te laj kil ta jsat jtuk kʼuxi kʼot ta pasel kʼalal kʼot epal ermanoetik sventa xkoltavanike».

 Jun ermano ti oy jun s˗empresa sventa chkuch batel ikatsil ta yantik lumetike laj yakʼ ta chʼom skarro sventa ikats xchiʼuk la stoj li gasolinae. Xi chal li ermanoe: «Jaʼ jech chkakʼbe yil kermanotak xchiʼuk Jeova ti jkʼanojik tajeke. Ximuyubaj ti likoltavane». Sventa xichʼ chʼakel skotol li kʼusi laj yichʼ takel batele, laj mas ta 7,700 litro gasolina xchiʼuk li ermanoetike la xchʼak skʼakʼalik, yuʼun te van 48 mil kilometro la stsʼotik li karroe.

 Koliyal li kʼanelal xchiʼuk ti tsots abtejik li ermanoetike, li ta 28 yuʼun marso kʼalal kʼajomal toʼox jelavem 15 kʼakʼal ti la spasik li baʼyel prevae, laj xa ox yichʼik batel sien tonelada (110 tonelada ta Estados Unidos) li kʼusitik chtun yuʼunik li ermanoetike. Ta skoj ti ep kʼusitik la skʼelanik li ermanoetik xchiʼuk li jchonolajeletike, jutuk takʼin laj yichʼ tunesel kʼalal laj yichʼ chapanel li kajaetike. Li avie, li stestigounkutik Jeovae jtakojkutik batel koltael mas ta 190 tonelada (209 tonelada ta Estados Unidos) ta Ucrania. ¿Kʼu yelan chaʼi sbaik li ermanoetik ti koltaatike?

 Kʼalal kʼot ta Leópolis li kajaetike, li Komiteetik ta Ucrania ti chtunik ta skoltael ermanoetik ti chil svokolike la spukbeik li buchʼutik chtun yuʼunike. Epal kajaetike laj yichʼ ichʼel batel ta lumetik ti mas ta 1,300 kilometro snamal xil li Leópolise. Akʼo mi lek laj yichʼ chapanel, jalij onoʼox. a

 Li Markus Reinhardt ti chkoltavan li ta Komite ta Betel ta Ucraniae xi chale: «Ta skoj li kʼusitik yakal chkʼotanuk ta pasele, epal ermanoetike yilojik kʼu yelan chkoltavan li Jeova ta skoj ti skʼanojutike xchiʼuk li sbalil ta jtatik kʼalal ta jchʼuntik li beiltasel chakʼ s˗organisasion kʼalal skʼan toʼox jnuptantik junuk vokolile. Jech kʼuchaʼal liʼe, jkotoltik kichʼojtik albel ti jkʼej veʼeltik xchiʼuk kaʼaltik sventa jayibuk xemana ta jnatike. Xi chal jun mol ta tsobobbail ta Kiev ti Anton sbie: ‹Ta jtojkutik tajek ta vokol ti kak xa noʼox la xchapanunkutik li j˗organisasiontike. Ta skoj ti la jkʼej kaʼalkutik, jveʼelkutik xchiʼuk jun jradiokutike, kuxulunkutik yuʼun›. Toj lek ti la xchʼunik mantal li ermanoetike, yuʼun jaʼ jech yakʼ to yorail sventa oyuk kʼusi xchapanik ta Betel yoʼ skoltaik li ermanoetike».

 ¿Kʼu yelan laj yaʼi sbaik li ermanoetik kʼalal laj yichʼik koltaele? Xi chalik li Míkola xchiʼuk Zinaida ti te nakalik ta Járkov: «Ximuyubajkutik tajek ti la svul yoʼontonik ta jtojolalkutike. Kolavalik tajek ti la takik tal jveʼelkutik xchiʼuk poxiletike. Xvinaj ti jaʼ Jeova koltavane». Li Valentina ti te nakal ta Járkov eke xi chale: «Kʼalal lik li paskʼope, skʼan jchol jbakutik sventa jman li jveʼelkutike. Pe mu onoʼox jtakutik li kʼusi chtun kuʼunkutike. Li Jeovae laj yil li jvokolkutike. Jaʼ yuʼun, la stunes ermanoetik sventa xichʼik tal li kʼusi chtun kuʼunkutike. Kʼalal tsots kʼusi chanuptan xchiʼuk ti mu xa stakʼ chapanel chavaʼie, chavil kʼu yelan tskoltaot li Jeova xchiʼuk s˗organisasione. Xkuxet to chavaʼi ti tskoltaoxuk kʼalal jaʼo chtun tajek avuʼune».

 Li Evguen, Irina xchiʼuk Mikita ti jatavik lokʼel ta Mariúpol xi chalike: «Kolavalik tajek ti la koltaunkutik xchiʼuk ti lavakʼik ta ilel kʼanelal ta stojolal li kutsʼ kalalkutike. Ta melele, ta yorail noʼox vul li kʼusi chtun kuʼuntike. Ta slikebale, la jnopkutik ti jaʼ noʼox noj ta kʼusitik li kajaetike. Pe kʼalal la jamkutike, laj kilkutik ti kʼanbilunkutik tajeke».

 Jamal xvinaj ti jaʼ koltavan li chʼul espiritu xchiʼuk beiltasvan Jeova sventa xichʼik koltael li ermanoetik kʼalal jaʼo yakal li paskʼope. Pe koltavan tajek ek li matanal takʼin la avakʼike. Ep buchʼuoxuk jaʼ te la avakʼik li ta donate.pr418.com. ¡Kolavalik tajek ta sventa li slekil avoʼontonike!

Ta jkʼelkutik lek kʼuxi xuʼ xikoltavankutik ta anil

1. 24 yuʼun fevrero ta 2022: Li Komite yuʼun Kordinadoretike laj yalik kʼu yepal takʼin xuʼ stunesik li Betel ta Ucrania yoʼ skoltaik li ermanoetike.

2. 24 yuʼun fevrero kʼalal ta 8 yuʼun marso ta 2022: Li Betel ta Ucraniae la smanik li kʼusitik chtune xchiʼuk jaʼ lik spukik li Komiteetik ti chtunik ta skoltael ermanoetik ti chil svokolike. Li Betel xtoke la xchʼamik xchiʼuk la spukik li kʼusitik la stakik tal ta Poloniae.

3. 9 yuʼun marso ta 2022: Li Komite yuʼun Kordinadoretike laj yalik ti xuʼ xichʼ takel batel koltael ta Ucraniae.

4. 10 kʼalal ta 12 yuʼun marso ta 2022: Laj yichʼ nopel ti chichʼ pasel jun preva sventa xichʼ takel batel veʼliletik xchiʼuk yan kʼusitik. Ti chtotsik ta Polonia kʼalal to ta Leópolis (Ucrania).

5. 13 yuʼun marso ta 2022: La xkuchik batel ta sba velta veʼlil xchiʼuk yan kʼusitik ta Polonia kʼalal to ta Leópolis.

6. 14 kʼalal ta 16 yuʼun marso ta 2022: Li ta Poloniae, li ermanoetik ti chkoltavanik li ta Departamento sventa Svaʼanel salonetik xchiʼuk yan kʼusitike la stikʼik veʼliletik xchiʼuk poxiletik li ta kajaetike. Jaʼ te la xchapanik li ta Salon sventa Asamblea ta nopol Poznán.

7. 17 yuʼun marso ta 2022: Kʼalal jelav xa ox chanib kʼakʼal ti la spasik li baʼyel prevae, te laj yichʼik batel ta Ucrania li 13 tonelada (14 tonelada ta Estados Unidos) koltaele.

8. 21 kʼalal ta 27 yuʼun marso ta 2022: La xchapanik mas kajaetik ta Polonia xchiʼuk la stakik batel ta Ucrania. Kʼalal mu toʼox sta 24 orae, laj xa ox spukik ti bu chtun yuʼunik mas koltaele.

9. 28 yuʼun marso ta 2022: Kʼalal echʼ xa ox 20 kʼakʼal ti laj yalik ti chichʼ takel batel koltaele, li ta Ucraniae yichʼoj xa ox pukel sien tonelada (110 tonelada ta Estados Unidos) veʼliletik, kʼusitik chtun yuʼunik sventa sakikuk˗oe xchiʼuk yan kʼusitik sventa xichʼik poxtael.

 Li avie, li stestigounkutik Jeovae jtakojkutik batel koltael mas ta 190 tonelada (209 tonelada ta Estados Unidos) ta Ucrania.