Li stestigoutik Jeovae muʼyuk bu jech kilojtik-o ti xuʼ jyalestik ta selular o ta tavleta li kʼusitik sventa mantal jech kʼuchaʼal li avie. Pe oy ep ermanoetik ta yantik lumetike mu xtoj yuʼunik li Internete. Yantik xtoke jaʼ te nakalik ti bu muʼyuk Internete, ti toj kʼune o ti chbatilan tajeke.

 Pe li avie, epal ermanoetik xuʼ xa syalesik li vunetik ta selularik o ta stavletaik akʼo mi muʼyuk s-internetik. ¿Kʼuxi tspasik taje?

 Li JW Box jaʼ jun chʼin aparato ti ta xichʼ takel batel li ta tsobobbailetik ti bu muʼyuk lek Internete. Yichʼoj jun rúter sventa stsak Internet ti jaʼ laj yichʼ manbel jun empresae, jun programa sventa komputadora ti jaʼ la smeltsan li Departamento de Computación ta Betel xchiʼuk te tikʼil li vunetik xchiʼuk videoetik ti te oy ta jw.org. Li jujun aparatoe te van 1,500 peso stojol.

 Li ta salon sventa tsobobbaile, li ermanoetike ta stsakan selularik xchiʼuk stavletaik li ta JW Box ta wifi sventa syalesik li vunetik xchiʼuk li videoetike. Akʼo mi molik xa li selular o tavletae o mi jaʼ li mas yalelik stojole, xuʼ stsakan sbaik li ta aparato taje. Pe mi oy junuk tsobobbail ti muʼyuk s-internetike, ¿kʼuxi chichʼ yalesel li kʼusitik mas achʼik li ta JW Box? Li Betele tstak batel memoria USB ti te van 80 peso stojole, ti te yichʼoj batel li kʼusitik mas achʼik ta jw.org. Li memoriae chichʼ tsakanel li ta JW Box sventa te syalesik kʼusitik mas achʼik li ermanoetike.

 ¿Kʼuxi skoltaoj ermanoetik li JW Box? Xi chal Nathan Adruandra ti te nakal ta República Democrática del Congo: «Voʼne xa tajek ta jyales kaʼi li videoetik ‹Jeova, voʼot noʼox jpatoj koʼonton ta atojolal› xchiʼuk li Vuleso me ta ajolik li yajnil Lote. Pe muʼyuk xyal kuʼun, taje chkat-o tajek koʼonton. Pe avie, xuʼ xa jyales ta jselular li videoetike xchiʼuk tskoltaunkutik sventa jchanubtas li kalab jnichʼnabkutike».

 Jun ermano ta Nigeria ti tskolta li tsobobbailetik ta stsakanel li JW Box xi chale: «Li ermanoetike jaʼ jun matanal yuʼun Jeova chilik li JW Box. Xmuyubajik tajek, yuʼun li avie xuʼ xa syalesik li vunetik xchiʼuk li videoetik li ta abtejebaletik sventa xijchanubtasvane».

 Laj xa yichʼ takel batel mas ta 1,700 JW Box li ta tsobobailetik ta África, Oceanía, Sudamérica xchiʼuk ta to xichʼ takel batel ta yan tsobobbailetik. ¿Bu chlokʼ stojol li kʼusitik chichʼ pasel taje? Jaʼ te chlokʼ li ta matanal takʼin chichʼ akʼel ta sventa li abtelal ta spʼejel balumile. Ep buchʼutik jaʼ te chakʼik li ta donate.pr418.com. Kolaval ti toj ep slekil avoʼontonike.