Li ta svakibal aʼyej yuʼun Jtsop Jbeiltasvanej ta 2020 xi laj yal li Geoffrey Jackson: «Olon tale vokol ta chʼunel chkaʼitik, naka xa ta selular o ta tavleta chichʼ kʼelel li vunetike». ¿Mi jech toʼox chanop ek? Xi to laj yal li Jacksone: «Pe avi ti xyaket li chamele ta van jakʼbe jbatik kʼusi ta jpastik jechuk ti chʼabaluk li JW Library. Voʼne xa onoʼox xchapanojutik tal Jeova ta sventa li kʼusitik xuʼ jnuptantike».

 ¿Kʼuxi xchapanojutik tal li Jeovae? ¿Kʼusi la spasik sventa xlokʼ li aplikasion JW Library? Xchiʼuk ¿kʼusi spasojik sventa lekuk˗o x˗abteje?

 Li ta mayo ta 2013, li Jtsop Jbeiltasvaneje la skʼanbe vokol li buchʼutik te ch˗abtejik li ta Departamento de Programación de MEPS ti te oy ta smeʼ nail abtelal sventa smeltsanik junuk aplikasion ti teuk xichʼ tikʼel li Xchʼul Kʼop Dios sventa Achʼ Balumil sventa jkʼeltike. Xi chal Paul Willies ti te ch˗abtej li ta departamento taje: «Muʼyuk toʼox jpasojkutik junuk aplikasion ti stakʼ yalesel li ta tiendas de aplicaciones jech kʼuchaʼal li Play Store. Sventa spas kuʼunkutike, la jkechankutik spasel yan abtelal, vaʼun la jtsob jbakutik sventa jmoj xi˗abtejkutik xchiʼuk li yan departamentoetik ta Betele. La jpaskutik tajek orasion, vaʼun laj kilkutik ti kʼu yelan koltavan li Jeovae, yuʼun voʼob u ta tsʼakale, laj yichʼ alel li ta tsobajel chichʼ pasel jujun jabil ti xuʼ xa syalesik li aplikasione».

 Oy kʼusi vokol laj kaʼikutik xtok, yuʼun skʼan jtikʼkutik yan vunetik li ta aplikasion taje xchiʼuk yan vunetik ta jeltos kʼopetik. Li ta enero ta 2015, laj yichʼ muyesel vunetik li ta inglése. Ta vakib u ta tsʼakal xtoke, laj yichʼ muyesel jeltos vunetik ti ta sienal xa noʼox kʼopetik oye.

 Li ermanoetike mas xa lekubem yuʼunik li aplikasione, yuʼun ep xa tikʼbil videoetik xchiʼuk xuʼ xa te jchapan jbatik ta sventa li tsobajeletike. Jech xtok, kʼalal ta jchan Jvivliatike, oy butik ti tstakutik batel li ta Saʼobil sventa xchanik mase.

 Li ta jujun ue, mas ta 15 miyon selular, komputadora xchiʼuk tavleta ti ch˗ochik li ta JW Library, li ta 15 miyon taje oy 8 miyon ti jujun kʼakʼal ch˗ochik li ta aplikasione. ¿Kʼusi skʼan pasel sventa lekuk x˗abtej ta jujun dispositivo li aplikasion taje? Xi chal li Paul Willies: «Mu onoʼox xlaj ta abtelanel li aplikasione, yuʼun oy kʼusitik yan chichʼ meltsanbel sventa mas kʼunuk ta tunesele. Ta skoj ti ch˗achʼub li sistema operativo ta jujun dispositivoe, jaʼ jech skʼan xkachʼubtaskutik ek li aplikasion JW Library sventa lek xjam li ta jujun dispositivoe. Ta skoj ti ep yichʼoj vunetik xchiʼuk videoetik li aplikasione, skʼan xichʼ meltsanel xchiʼuk xichʼ achʼubtasel li software». Li avie, te van 200 mil vunetik xchiʼuk mas ta 600 mil audio xchiʼuk video ta jeltos kʼopetik oy li ta JW Library.

 Sventa lekuk x˗abtej li aplikasione, maʼuk noʼox skʼan xachʼubtasik xchiʼuk smeltsanik, yuʼun skʼan tojel licencia sventa software. Li jun noʼox licenciae jaʼ 1,500 dolar stojol ta jun noʼox jabil. Sventa skʼelik mi xjam ta komputadoraetik, ta tavletaetik xchiʼuk ta telefonoetik ti mas achʼike, li Departamento de Programación de MEPS tsmanik jeltos smarkail dispositivoetik, taje chlaj lajunmil dolar jujun jabil.

 Koliyal li JW Library, mas jutuk chlaj li takʼine, yuʼun muʼyuk xa mas chichʼ pasel imprimir xchiʼuk chichʼ takel batel. Jun skʼelobile, jaʼ li foyeto Jkʼeltik skotol kʼakʼal li Skʼop Diose. Li ta 2013, laj yichʼ pasel imprimir 12 miyon ta lik li foyeto taje. Pe li ta 2020, kʼajomal xa noʼox voʼob miyon laj yich pasel imprimir akʼo mi 700 mil jcholmantaletik epajem li ta spʼejel balumile. ¿Kʼu yuʼun ti jech taje? Yuʼun ep buchʼutik ta JW Library xa tskʼelik li foyeto Jkʼeltik skotol kʼakʼal li Skʼop Diose. a

 Toj ep me kʼuxi tskoltaot li JW Library. Li Geneviève ti likem ta Canadáe chal ti jaʼ koltaat sventa xchanunaj mase, xi chal li Geneviève: «Ti skʼanuk jlokʼes epal livroetik sventa xi chanunaj mase, muʼyuk jech ta jpas jujun sob jechuke. Pe koliyal li aplikasion JW Library, jaʼ noʼox skʼan jtsan li jtavletae, yuʼun te oy skotol li kʼusitik chtun kuʼun sventa xichanunaje. Ti jech chichanunaje skoltaojun sventa stsatsub mas li xchʼunel koʼontone xchiʼuk ti nopoluk oyun ta stojolal Jeovae».

 Ta skoj li tsatsal chamel COVID-19, mas to toj jtunel li JW Library. Xi chal Charlyn ti te nakal ta Estados Unidose: «Ta skoj li tsatsal chamel COVID-19 oy ta spʼejel balumile, oy xa mas ta jun jabil ti muʼyuk xkil-o jlikuk vun ti pasbil imprimire. Pe li ta JW Library te skotol li kʼusitik chtun kuʼuntik sventa xijtsatsub ta mantale. Ta melel, jaʼ jun mukʼ ta matanal yakʼojbutik li Jeovae».

 Ep buchʼutik jaʼ jech chaʼi sbaik kʼuchaʼal li Faye ti te nakal ta Filipinase xi chale: «Toj kʼupil sba li aplikasione, yuʼun jaʼ tskoltaun sventa nopoluk oyun ta stojolal li Jeovae. Ta jtunes sventa jchan jvuntak jujun sob, oy kʼusitik ta jchikinta kʼalal oy kʼusitik ta jpas ta yut jnae, ta jchapan jba sventa tsobajeletik xchiʼuk te ta jchan Jvivlia. Kʼalal muʼyuk kʼusi mas ta jpase, ta jkʼel videoetik, jech xtok kʼalal oy kʼusi ta jmalae ta jkʼel vunetik xchiʼuk ta jchan Jvivlia. Ta melel, ¡toj echʼ xa noʼox ep sbalil li JW Library!».

 Li aplikasione toj jtunel tajek li ta cholmantale. Jun skʼelobile, jaʼ li kʼusi kʼot ta stojolal li Camerúne, toj lek laj yil jun teksto la stunes li xchiʼil ta cholmantale. Vaʼun ta mas tsʼakale, ta skʼan ox tstunes li teksto eke, pe mu xvul ta sjol, jaʼ yuʼun xi chale: «Jaʼ noʼox bale xvul ta jol jpʼel kʼop ti te chal li ta Vivliae, vaʼun libat li ta JW Library, laje libat ta Vivlia, vaʼun la jsaʼ ta lupa li jpʼel kʼop ti vul ta jole. Jtunel tajek li aplikasion kʼalal chchʼay xkaʼi li tekstoetike».

 Ta skoj ti chavakʼik matanal takʼin li ta donate.pr418.com, xuʼ xichʼ meltsanel, achʼubtasel xchiʼuk xuʼ xichʼ tikʼbel mas vunetik li ta JW Library sventa stabeik sbalil li ermanoetik ta spʼejel balumile. Kolavalik tajek ti ta sjunul avoʼonton chavakʼik li matanal takʼine.

1. Oktuvre ta 2013: Lokʼ li aplikasione xchiʼuk te xa tikʼil tal li Xchʼul kʼop Dios sventa Achʼ Balumile.

2. Enero ta 2015: Laj yichʼ tikʼel yan vunetik ta inglés xchiʼuk ta sienal xa noʼox jeltos kʼopetik.

3. Noviembre ta 2015: Xuʼ xa xichʼ pasel markar li vunetike.

4. Mayo ta 2016: Laj yichʼ tikʼel ti bu chal «Reuniones».

5. Mayo ta 2017: Xuʼ xa jtikʼ jnotatik.

6. Disiembre ta 2017: Te laj yichʼ tikʼel li Biblia de estudio ta inglése.

7. Marso ta 2019: Xuʼ xa jyalestik audioetik xchiʼuk jkʼeltik videoetik. Jech xtok, xuʼ xa te jtatik referensiaetik li ta Saʼobil sventa xchanik mase.

8. Enero ta 2021: Oy kʼusitik yan laj yichʼ tikʼel sventa li livro Kʼupino akuxlejal.