Li ta abtelal yuʼun stestigotak Jeova ta 2021, a li coronaviruse laj yakʼ tajek jvokoltik. Jech kʼuchaʼal laj yichʼ alel li ta mantal «Chichʼik koltael ta spʼejel balumil ta skoj li coronaviruse». Ta smiyonal noʼox dolar b takʼin yichʼoj lajesel sventa xichʼ koltael li ermanoetike xchiʼuk yichʼoj vaʼanel mas ta 950 Komite ti chtun ta skoltael ermanoetik ti chil svokolike.

 Kʼalal jaʼo xyaket li chamel coronaviruse, oy to yan vokoliletik jelav ti laj yil-o svokolik li kermanotaktike. Jaʼ yuʼun, li Komite yuʼun Kordinadoretik yuʼun Jtsop Jbeiltasvaneje laj yakʼ permiso ti maʼuk noʼox xichʼ koltael li ermanoetik ta skoj li chamele, yuʼun laj yichʼ tunesel vaxakib miyon dolar takʼin sventa xichʼ koltael li ermanoetik ta skoj ti echʼ mas ta chib sien jeltos vokoliletike. Jkʼeltik batel kʼuxi laj yichʼ tunesel li matanal takʼin li ta chaʼtos vokoliletik ti achʼ to jelave.

 Li ta 22 yuʼun mayo ta 2021, tʼom li volkan Nyiragongo li ta República Democrática del Congo. Taje la sokes naetik, eskuelaetik xchiʼuk yav voʼetik. Pe maʼuk noʼox, li vaʼ kʼakʼaletike li volkane la sjip batel tan ta sjunul li jteklum Goma xchiʼuk ep ta velta echʼ nikeletik. Jutuk mu skotoluk li krixchanoetike laj yichʼik lokʼesel ta snaik. Ta sien milal noʼox ermanoetik jatavik lokʼel xchiʼuk junantike kʼotik kʼalal to ta Ruanda.

 Li buchʼutik laj yichʼ lokʼesel ta snaike te tsakal skʼoplal mas ta voʼmil stestigotak Jeova. Junantike laj snaik ta skoj ti tʼom li volkane xchiʼuk yantike elkʼanbat kʼusitik yuʼunik kʼalal chʼabal xa ox te oyike. Li Komite ti chtun ta skoltael ermanoetik ti chil svokolik li ta Ruanda xchiʼuk li ta República Democrática del Congoe koʼol la skolta sbaik. Li Betel ta Congoe xi chalbe skʼoplal jun ermano ti chtun ta komitee: «Kʼalal skʼan toʼox xichʼ alel ti xlokʼ ta snaike, li komitee laj xa ox yakʼ veʼlil, voʼ, kʼuʼiletik, mantaetik xchiʼuk tasiletik. Akʼo mi xyaket xa ox tsots vokol li ta jteklume». Li ta jteklum ti bu batik mas ta chaʼmil ermanoetike, oy jun ermano ti chtun ta komite sventa skoltael ermanoetike la svaʼan karpanaetik, laj yakʼ cubreboca, laj yalbe ermanoetik kʼuxi xuʼ skʼel sbaik li ta coronaviruse xchiʼuk li ta kolerae.

 Ta oxib noʼox u, li ermanoetike la spukik mas ta vakib tonelada aros, vakib tonelada maseka, mas ta vaxakmil litro aseite xchiʼuk mas ta vaxakmil litro voʼ. Sventa mu epuk xichʼ lajesel takʼine li Betele te noʼox nopol la sman li veʼliletike.

 Xi chal jun ermanae: «La jkil tajek jvokolkutik». Li volkane la slajesbe li sna ermana ti achʼ to la svaʼane, li yutsʼ yalal xchiʼuk li stuke laj yichʼik koltael ta sventa li kʼusitik chtun yuʼunike xchiʼuk li ta mantale, avie xi xa chale: «Koliyal Jeova, oy kuʼunkutik li kʼusi chtun kuʼunkutike, laj kil jtukkutik ti la skoltaunkutik Jeova sventa xkuch batel kuʼunkutike».

 Li ta Venezuelae, oy xa sjayibaluk jabil ti chil svokolik ta takʼine, muʼyuk mas veʼlil xchiʼuk yantik ch-epaj li j-elekʼetike, chil tajek svokolik li kermanotaktike. Pe akʼo mi jech, li s-organisasion Jeovae muʼyuk bu yiktaanojan.

 Li echʼ jabile, laj yichʼ lajesel mas ta jun miyon xchiʼuk oʼlol dolar sventa xichʼ manel veʼlil xchiʼuk xabon. Vaʼun, chichʼik ichʼbel batel li utsʼ alaliletik ti chtun yuʼunike. Xi laj yal li Betel ta Venezuelae: «Mu kʼunuk ti xichʼ takel batel jujun u 130 tonelada veʼlil ta jujujot xokon lume xchiʼuk ti xichʼ akʼbel ta skʼob li ermanoetik ti chtun yuʼunike». Li ermanoetike jaʼ tstakik batel li veʼlil ti mu sok ta anil yoʼ jal xkuch yuʼune. Xi to chal li Betele: «Jaʼ ta jmankutik li veʼlil ti jaʼ to chlokʼe, ep ta jmankutik xchiʼuk kʼalal jaʼo tsulul stojole. Ta tsʼakale, jaʼ ta jsaʼkutik li kʼusi yalem stojol sventa xichʼ kuchel batele».

 Li Leonele ch-abtej ta Komite ta skoltael ermanoetik ti chil svokolik ta Venezuelae, tskʼupin tajek li yabtele. Xi chal sloʼile: «Ti ta jkolta li ermanoetik ti chil svokolike, toj tsots skʼoplal chkaʼi. Skoltaojun sventa mu jnaʼ tajek li kajnil ti cham ta coronaviruse. Ep kʼusitik ta jpas xchiʼuk xuʼ jkolta li ermanoetik ti chtun yuʼunik koltaele. Kakʼoj venta ti chkʼot ta pasel yuʼun Jeova ti muʼyuk chikta li steklumale».

 Xi chal jun ermano ti chtun toʼox ta skoltael ermanoetik ti chil svokolike: «Avie, voʼon xa ta jkʼan koltael. Li ermanoetike maʼuk noʼox la skoltaunkutik ta takʼin xchiʼuk li kʼusi yan chtun kuʼunkutike. Yuʼun la skoltaunkutik xchiʼuk kajnil xtok sventa junuk noʼox koʼontonkutik, la spatik koʼontonkutik, la xchabiunkutik xchiʼuk la stsatsubtasunkutik».

 Oy junantik vokoliletik ti ta anil noʼox chkʼot ta pasele. Akʼo mi jech, li j˗organisasiontike anil tskoltaik li ermanoetik sventa xakʼbeik li kʼusitik chtun yuʼunik ti jaʼ tstunesik li matanal takʼin ti chichʼ akʼel ta sventa li abtelal ta spʼejel balumile. Li ta donate.pr418.com te chavil kʼuxi xuʼ xavakʼ matanal takʼin. ¡Ta jtojkutik ta vokol li slekil avoʼontone!