«¡Lek tajek chkaʼi ti te oyun ta salone!», jaʼ jech laj yal jun ermana ta Colombia ti Nicol sbie. ¿Kʼu yuʼun ti tskʼupin tajeke? Xi chale: «Yuʼun jaʼ te xuʼ jchiʼin li kutsʼ kalal ta mantale». ¿Mi jaʼ jech chavaʼi aba kʼuchaʼal li Nicole?

 Li ta spʼejel balumile, li stestigotak Jeovae ta jtsob jbatik te van ta 63 mil Salonetik sventa Tsobobbail. Li salonetik taje maʼuk noʼox sventa ta jtsob jbatik, yuʼun oy yan sbalil chichʼ tabel xtok. Xi chal David ti jaʼ jun prekursor regular ti te nakal ta Colombiae: «Toj echʼ xa noʼox kʼupil sba li jsalontike. Jaʼ yuʼun, jaʼ chtijbat˗o yoʼontonik li krixchanoetik sventa oyuk ta yoʼontonik xchikintael li lekil aʼyejetike. Yuʼun kʼalal chkʼotik ta tsobajele, labal sba chilik ti toj echʼ xa noʼox lek tukʼulanbil xchiʼuk ti lek sak li jsalontike». Jech ta melel, yuʼun chkakʼ kipaltik sventa jechuk sakuk oy kuʼuntik xchiʼuk ti kʼelbiluk kuʼuntik li jsalontike. ¿Kʼuxi yichʼoj pasel taje?

 Li ermanoetik ta tsobobbaile jaʼ tsbainik stukʼulanel li salon ti bu tstsob sbaike. Jaʼ yuʼun, nopolik noʼox ta skusik, tstukʼulanik xchiʼuk tsmeltsanik mi oy kʼusitik sokeme. ¿Kʼuxi chichʼ koltael li tsobobbailetike?

 Li Departamento sventa Svaʼanel salonetik xchiʼuk yan kʼusitike (LDC) tsvaʼan ermanoetik sventa xchanubtasvanik kʼuxi ta kʼelel li salonetike. Jujun ermanoe xuʼ van sbain skʼelel vakib salonetik o mi toj epe lajuneb salonetik. Ta svulaʼanan li ermanoetik sventa xchanubtas kʼuxi xuʼ skʼelik li salonike. Jujun ox˗ox jabil chbat skʼel li salonetik sventa skʼel mi oy kʼusitik sokem xchiʼuk mi oy kʼusitik skʼan meltsanel sventa mu kʼusi xibaluk sba jnuptantike.

 Xmuyubajik tajek li ermanoetik xchiʼuk ermanaetik ti laj yichʼik chanubtasele. Jun ermana ta India ti Indhumathi sbie xi chale: «Toj echʼ xa noʼox kʼupil sba ti kʼu yelan laj kichʼkutik chanubtasel sventa jtukʼulankutik li kuni salonkutike». Xi chal jun ermano ta Kenia ti Evans sbie: «Laj kakʼkutik venta ti toj tsots skʼoplal ti skʼan noʼox jmeltsankutik li kʼusitik sokem akʼo mi jutuk noʼox sventa mu sok batel mase xchiʼuk ti mu epuk xlaj takʼine».

 Li ta jun jabile ta smilal xa noʼox dolaretik a chtun sventa xichʼ kʼelel li jpʼej Salon sventa Tsobobbaile. Yalel toyol ti kʼu yepal chlaj li takʼine. Yuʼun li ta junantike salone mas ep takʼin chlaj ta skoj ti bu oye, ti kʼu xa sjalil yichʼoj meltsanele xchiʼuk ta skoj ti ep tsobobbail tstunesike. ¿Bu chichʼ tabel stojol skotol taje?

 Li kʼusitik chichʼ manel sventa chtun li ta salone jaʼ te chlokʼ li ta matanal takʼin chichʼ akʼele. Jun ermano ta Kazajistán ti Alexander sbie xi chale: «Li matanal takʼine jaʼ chichʼ tunesel sventa xichʼ tojel li Internete, li voʼe, li luse o yan kʼusitik. Jech xtok, jaʼ sventa xichʼ manel li kʼusitik chtunanuke, jech kʼuchaʼal li papeletik sventa skusobil jkʼobtike, guanteetik, li kʼusitik chtun sventa xichʼ kusel li salone xchiʼuk pintura. Li kʼu yepal tsovraine koʼol xa chichʼ takel batel xchiʼuk li matanal takʼin sventa li abtelal ta spʼejel balumile sventa xichʼ pasel abtelaletik ti mas ep takʼin chlaj jech kʼuchaʼal ta Salonetik sventa Tsobobbail, Salonetik sventa Asamblea xchiʼuk yan naetik sventa yichʼobil ta mukʼ Dios ta spʼejel balumile.

 Bateltik li ta salonetike oy abtelaletik ti toj mukʼtik ti toj ep takʼin chichʼe, ti mas to ep chlaj kʼuchaʼal onoʼox xlaj stunesik ta chib˗oxib ue. Kʼalal jech chkʼot ta pasele, li moletike ta skʼoponik batel li ermano ti ch˗abtej li ta LDC. Mi laj yal LDC ti xuʼ xichʼ pasel li abtelal la sjakʼik li moletike, jutuk mu skotoluk velta jaʼ xa chichʼ tunesel li matanal takʼin ta sventa li abtelal ta spʼejel balumile. Li ta septiembre ta 2022 kʼalal ta agosto ta 2023, laj yichʼ pasel 8,793 abtelaletik xchiʼuk laj 76.6 miyon dólar. Jkʼeltik batel chaʼtos abtelaletik ti laj yichʼ pasele.

 Li ta Angolae, oy jun salon ti leʼ xa ta 15 jabil laj yichʼ meltsanele xchiʼuk ti ep xa ox kʼusitik sokemike. Sokem xa ox li luse, tsikʼemik xa ox li yibel nae xchiʼuk li buchʼutik te nopol nakalike muʼyuk lek chilik ti te chjelav ta stiʼ snaik li balakvoʼ chlokʼ tal ta salone. Jaʼ yuʼun, li LDC laj yal ti xuʼ xichʼ meltsanele. Laj 9,285 dólar. Li buchʼutik te nopol nakajtike labal laj yilik ti kʼu yelan laj yichʼ pasel li abtelale xchiʼuk la stojik tajek ta vokol.

 Li ta Polaniae, oy jpʼej salon ti ch˗echʼ xa ox voʼ ta sjole xchiʼuk ti mol xa ox tajek li alfombra ta pisoe. Li LDC laj yal ti akʼo xichʼ meltsanbel li sjole xchiʼuk ti xichʼ jelbel li s˗alfombraile. Ta skotolale, laj 9,757 dólar. Lek tajek kom li salone xchiʼuk jech˗o chtun batel sventa jayibuk jabil li kʼusitik laj yichʼ meltsanele.

 Kʼalal lek kʼelbil xchiʼuk achʼik noʼox chichʼ meltsanel li jsalontike, mas juteb takʼin ta xlaj xchiʼuk jaʼ sventa xichʼ kʼupil kʼoptael li Jeovae. Jun ermano ta Tonga ti Shaun sbie xi chale: «Ti achʼik noʼox chichʼ kʼelel li salone jaʼ chkoltavan sventa lekuk noʼox sak xchiʼuk chʼubabil xvinaje, jech xtok xuʼ lek xichʼ albel skʼoplal Jeova li ta jlumaltike. Mas jun koʼontontik ta jtaktik ta ikʼel li krixchanoetik sventa xbatik li ta salone».

 Jkotoltik xuʼ xkakʼ jkʼobtik sventa jchʼubatik xchiʼuk jkʼeltik li kuni salontike. Jun ermano ti Marino sbi ti te nakal ta Australiae xchiʼuk ti jaʼ chtun ta jchanubtasvanej ti kʼu yelan skʼan kʼelel li salonetike xi chale:« Jaʼ jun mukʼta matanal jtaoj jkotoltik ti xuʼ xijkoltavan ta skʼelel li jsalontike akʼo mi jsetʼ juteb noʼox ti kʼusi ta jpastike. Mi jech ta jpastike, xuʼ xijkoltavan sventa lekuk xichʼ tunesel li matanal takʼine».

 Jun ermano ti te nakal ta India ti Joel sbie xchiʼuk ti tskʼupin tajek chkoltavan ta skʼelel li salone xi chale: «Kʼalal koʼol chi˗abtej xchiʼuk li ermanoetike xkoʼolaj xa chkaʼi ti te yakal chi˗abtej li ta achʼ balumile». Xi chal li Nicol ti laj xa kalbetik skʼoplale: «Li ta jsalonkutike oy bu ta xpʼaj voʼ, pe jaʼtik toe li ermanoetike la smeltsanik, li vuʼune likoltavan ta stakijesel li pisoe. Akʼo mi maʼuk vuʼun la jmeltsan li kʼusi sokeme, pe likoltavan sventa muʼyuk buchʼu xjaxbun yakan».

 Mi chakʼan chakoltavan ta skʼelel li asalone, albo li moletik ta atsobobbaile. Jech xtok, xuʼ me xavakʼ matanal takʼin li ta kajaetik oy ta salone o li ta donate.pr418.com. Skotol li matanal takʼin chichʼ akʼele chtun sventa chichʼ kʼelel skotol li salonetik ta spʼejel li balumile. Kolavalik tajek ti chavakʼ ta ilel li slekil avoʼontonike.