Li stestigotak Jeovae mas ta 200 lumetik smakoj sventa tskoltaik ta mantal xchiʼuk mi oy kʼusi chtun yuʼunik li krixchanoetike. Pe jaʼ noʼox 35 lumetik ti mas tstsob sba stakʼinik li ermanoetik sventa li kʼusitik chtune. Pe ¿kʼusi chkʼot ta pasel li ta lumetik ti mu masuk kʼusi x-ayan yuʼunike?

 Li Jtsop Jbeiltasvanej yuʼun stestigotak Jeovae tskʼelbe li yabteltak xchiʼuk li kʼusi chtun yuʼunik ta mantal li stestigotak Jeova ta spʼejel balumile. Lek chichʼ kʼelel ti bu chtun li matanal takʼin tstsob sbae. Mi oy junuk Betel ti chkom to stakʼinike tstakbeik batel yan Betel ti chtun yuʼunike. Taje jaʼ chchanbeik li baʼyel jchʼunolajeletike. Kʼalal mi kom to stakʼinike jaʼ tstunesik sventa skoltaik li yan jchʼunolajeletik ti chʼabal mas kʼusi oy yuʼunike sventa koʼoluk yepal yuʼunik (2 Korintios 8:14).

 ¿Kʼu yelan chaʼi sbaik li ermanoetike kʼalal ch-akʼbatik li takʼin ti chkom yuʼun li yan Beteletike? Jech kʼuchaʼal li ta Tanzaniae, mas ta oʼlol li jnaklejetik te ta lume mu sta 42 peso stakʼinik (2 dolares) sventa li kʼusitik chtun yuʼunik jujun kʼakʼale, jaʼ yuʼun li matanal takʼin akʼbatike, jaʼ te laj yichʼ tunesel sventa xichʼ achʼubtasel li Salon sventa Tsobobbail ta Mafingae. Xi laj yalik li ermanoetik li ta tsobobbail taje: «Ti kʼalal laj yichʼ meltsanel li jsalonkutike mas xa ep ta jtsob jbakutik. Ta jtojbekutik tajek ta vokol li s-organisasion Jeova xchiʼuk li ermanoetik ta spʼejel balumil ti chakʼ li kʼusi x-ayan yuʼunike, avie toj kʼupil xa sba ti bu chkichʼkutik ta mukʼ li Jeovae».

 Ta skoj li coronaviruse, junantik ermanoetik ta Sri Lankae, muʼyuk xa mas ep sveʼelik. Jaʼ jech la snuptan li ermana Imara Fernando xchiʼuk li yuni kʼox kerem Enoshe. Pe koliyal li matanal takʼin laj yakʼik li yantik lume, laj yichʼik koltael. Xi la stsʼibaik batel ta jun uni tarjetae: «Ta jtojbekutik ta vokol li ermanoetik ti la xkʼuxubinunkutik ta skoj li vokolil ta jnuptankutike. Ximuyubajkutik ti te jkʼoplalkutik li ta utsʼ alalil ta mantale xchiʼuk jech-o ta jkʼanbekutik Jeova ti akʼo skolta li ermanoetik avi li ta slajebal kʼakʼale».

 Mu ventauk ti bu oy li ermanoetike, skotolik lek chaʼiik yakʼel li kʼusi oy yuʼunike. Jech kʼuchaʼal li Enoshe, la spas jun yuni kaxa sventa tstikʼ matanal takʼin te yoʼ skolta li utsʼ alaliletik ti chtun yuʼunike. Jaʼ jech li Guadalupe Álvarez eke, lek snaʼ xakʼ li kʼusi oy yuʼune. Te nakal ta yosilal México ti bu muʼyuk lek tspasik kanal takʼin li krixchanoetike xchiʼuk ti chʼabal lek yabtelike. Akʼo mi jech, chakʼ persa chkoltavan. Xi chal li Guadalupee: «Ta jtojbe ta vokol Jeova ti kʼanvanem xchiʼuk ti oy slekil yoʼontone. Li matanal takʼin chkakʼ xchiʼuk li yan matanal takʼin chakʼ ermanoetike, jnaʼoj lek ti chtun yuʼunik li ermanoetik ti chil svokolike».

 Li Beteletike xmuyubajik ti tstakik batel takʼine. Xi chal Anthony Carvalho ti chtun ta Komite sventa Betel ta Brasile: «Oy jayibuk jabil laj kichʼkutik koltael ta takʼin yuʼun yan Beteletik. Koliyal taje chʼiem batel li steklumal Jeovae. Avie, oy xa kʼusi x-ayan kuʼunkutik xchiʼuk xuʼ xa jkoltakutik yantik. Jaʼ jun abtelal ta spʼejel balumil chilik cholmantal li ermanoetike xchiʼuk chakʼik venta ti xuʼ skolta sbaike, jech kʼuchaʼal jun lekil yajchankʼop Kristoe».

 Li stestigotak Jeovae, ¿kʼuxi xuʼ skolta li yermanotakik kʼalal chil svokolike? Li kʼusi mas lek xuʼ spasike, jaʼ ti stakik batel li ta obra mundiale, maʼuk ti tstak batel stukik ta Betel ta yantik lume. Xuʼ stikʼ stakʼinik li ta kaxa ti bu chal «Obra Mundial» ta jujun tsobobbaile o li ta donate.pr418.com. Ep sbalil skotol li matanal takʼine.