Jujun ue jmalaojtik xa tajek ti xmuy li programaetik xchiʼuk videoetik ta JW Broadcasting ti tspat tajek koʼontontike. Akʼo mi jech, ep kermanotaktik ta África mu xuʼ skʼelik ta Internet. ¿Kʼu yuʼun?

 Ta jutuk mu sjunul Africae chʼabal lek Internet, ti bu oy xtoke kʼun tajek, moʼoje toj toyol. Jun veltae, li jkʼelvanej ta sirkuito ta Madagascare la syales jun Broadcasting ta jun Internet xchiʼuk persa la stoj 16 dólar (tetik van mas ta oxib sien li ta jtakʼintike). a Taje epal takʼin jaʼ mu sta jech yepal tspasik kanal ta jun xemanae.

 Akʼo mi muʼyuk lek li Internete ta smiyonal xa noʼox krixchanoetik ta África xuʼ skʼupinik skʼelel li JW Broadcasting akʼo mi muʼyuk tstunesik li Internete. ¿Kʼuxi xa noʼox jech taje?

 Leʼtik ta 2017, li buchʼutik nakalik ta África subsaharianae xuʼ xa skʼelik li JW Broadcasting ta jun kanal ta television ta jun satélite. Li kanal taje chjelav ta moton ta kʼakʼal akʼobal sjunul xemana ta 16 jeltos kʼopetik.

 Sventa spasik jech taje li stestigotak Jeovae, ta slokʼik jun señal ta satélite sventa oyuk kʼusi sjelubtasik ta television. Li señal satelitee chkʼot ta 35 lumetik li ta África subsahariana xchiʼuk chichʼ tojel mas ta 12,000 dólar ta jujun u (tetik van 240,000 li ta jtakʼintike). Bakʼintike, chichʼ tojel mas ep sventa xjelav li asamblea rejionaletik xchiʼuk li programaetik ti stuk xa noʼox jech ti tsjelubtas li yajkʼopojel smeʼ nail abtelale. Koliyal taje xuʼ skʼelik ta smilal xa noʼox krixchanoetik.

 Ep stestigotak Jeova xchiʼuk li buchʼutik maʼukike tskʼelik li kanal ta televisione. Akʼo mi jech, ep ermanoetik mu xman yuʼunik li kʼusi chtun sventa xuʼ skʼelik-oe. Sventa xilik Broadcasting li ermanoetik taje oy kʼusitik chapanbil sventa xkʼot señal li ta 3,670 Salonetike. Mi oy xa stelevisionik o sproyektorike, jaʼ xa noʼox 70 dólar chichʼ tojel sventa xichʼik takbel batel (tetik van mas ta mil li ta jtakʼintike). Mi muʼyuk yuʼunike, te van 530 dólar chichʼ tojel (tetik van mas ta lajuneb mil li ta jtakʼintike).

 Li ermanoetike tstojik tajek ta vokol taje. Jun mol ta tsobobbail ta Camerún xi chale: «Li kutsʼ kalal xchiʼuk voʼone xkoʼolaj kʼuchaʼal mana ta takixokol balumil chkilkutik li kanale». Jun ermana ta Nigeria ti Odebode sbie xi chale: «Oxib velta ta xemana ta jtsob jbakutik xchiʼuk kutsʼ kalal sventa ta jkʼelkutik li kanale. Li jnichʼnabtake tskʼan xa yaʼiik ti jtsob jbakutike, bakʼintik xtoke tskʼanik ti akʼo jtsanbekutik li kanale». Rose ti likem ta Nigeria eke, xi chalbutike: «Ximuyubaj tajek. Olon tale, jaʼ lek xkaʼi skʼelel li notisiae, pe avie jaʼ xa ta jkʼupin skʼelel li kanal JW. Kʼalal ta jkʼel toʼox li notisiae anil chi-ilin xchiʼuk chmuy jpresion, pe li kanal JW toj lek kʼusitik chakʼ jchan xchiʼuk jun koʼonton yuʼun... Jaʼ ta jkʼupin tajek skʼelel xchiʼuk jaʼ jun bendision yakʼojbutik li Jeovae».

 Jun jkʼelvanej ta sirkuito ta Mozambiquee chalbutik li ta sirkuito bu chtune lek chapanbil xa li Salonetik sventa xkʼot li señale xchiʼuk skʼelik li kanal JW. Li ermanoetike sob snaʼ xkʼotik ta Salon sventa jaʼ baʼyel skʼelik li Broadcasting, mi laje chlik li stsobajelike.

 Kʼalal jaʼo ch-echʼ li asamblea internasional ta 2019 li ta Johannesburgo (Sudáfrica), li kanal liʼe laj yichʼ tunesel sventa xaʼiik ta baluneb lum junantik mantaletik ti stuk noʼox jech ta asamblea ti jaʼ laj yetʼes jun li ta jtsop jbeiltasvaneje. Sphumelele ti chtun ta Departamento sventa Broadcasting li ta Betel ta Sudafricae xi chale: «Olon tale ta Internet toʼox tskʼelik li mantaletike sventa xilike skʼan ti lekuk li Internete xchiʼuk ti xichʼ manele. Pe kʼalal ta satélite xa ch-echʼ li kanale, mas xa tsulul xchiʼuk mas lek».

 Koliyal ti chavakʼik li matanal takʼin ta slekil avoʼontonike, li ermanoetik ta Africae xuʼ xa skʼelik li JW Broadcasting ta satelitee. Kolavalik tajek ti chavakʼik li matanal takʼin sventa li abtelal ta spʼejel balumil ti ep ta tos kʼuxi chavakʼik li ta donate.pr418.com.