Tskʼupin tajek chchanubtasvan li Jeovae, jaʼ yuʼun li s˗organisasione xchapanoj jayibuk eskuelaetik sventa masuk to chapalik spasel yabtel li ermanoetike. Jech kʼuchaʼal, li Chanob vun sventa j˗al lekil aʼyejetik yuʼun Ajvalilal yuʼun Diose. Leʼtik xa tale li s˗organisasion Diose yakʼoj persa sventa xlekub ti kʼu yelan chchanubtasvanike. Jech xtok, lik yakʼ ta yoʼontonik sventa xlekub ti bu chjelav li chanob vune. Li kʼusi oy ta yoʼonton stael li organisasione jaʼ ti skʼupin li jchanunetike xchiʼuk li buchʼu chchanubtasvanike. ¿Kʼuxi tstunesik li matanal takʼin sventa spas yuʼunik jech taje xchiʼuk ti xkʼot mas jchanunetike?

 Oy xa ta sjayibaluk jabiletike te chichʼ pasel li ta Salon sventa Asambleaetike o li ta Salon sventa Tsobobbaile. Jaʼtik toe oy yichʼoj vaʼanel o chaʼmeltsanel naetik ti jaʼ sventa te ch˗echʼ li chanune. ¿Kʼu yuʼun ti jech laj yichʼ pasele? Jkʼelbetik oxib srasonal.

 Chtun koltael. Li ermano Christopher Mavor ti jaʼ jun yajkoltaobba Komite sventa Cholmantal yuʼun li Jtsop Jbeiltasvaneje, xi laj yale: «Li Beteletike laj yalik talel ti chtun yuʼunik mas ermanoetik xchiʼuk ermanaetik sventa xkoltavanik li ta cholmantale. Jun skʼelobile jaʼ li kʼusi laj yal talel li Betel ta Brasil ta 2019, yuʼun laj yal ti chtun tetik van 7,600 ermanoetik ti ayemik li ta Chanob vun sventa j˗al lekil aʼyejetik yuʼun Ajvalilal yuʼun Dios ti bu kʼalal smakoj cholmantal li lum taje». Li Betel ta Estados Unidose laj yal ek ti chtun yuʼun ep prekursoretik sventa xuʼ xchapan yan ermanoetik sventa xbat xcholik mantal ti bu oy ep krixchanoetik ta mukʼtik lumetik ti stuk noʼox jeche, ta skotleb varkoetik xchiʼuk ta chukinabetik. Jech xtok, chtun ermanoetik sventa xkoltavanik li ta Departamento sventa Svaʼanel salonetik xchiʼuk yan kʼusitik xchiʼuk ti skoltaik li Komiteetik ti Tsbeiltasvan batel ta Ospitaletike. Li buchʼutik xuʼ xkoltavanike jaʼ li ermanoetik ti ayemik li ta Chanob vun sventa j˗al lekil aʼyejetik yuʼun Ajvalilal yuʼun Diose.

 Ep buchʼutik tstikʼ batel solisitudik. Ta epal Beteletike ep tstakik batel solisitudik sventa xbatik li ta chanob vune, pe ta skoj ti toj epike mu xtakatik xa ta ikʼel skotolik. Jech kʼuchaʼal liʼe, li ta Betel ta Brasile kʼot yuʼunik tetik van 2,500 solisitudetik ta jun noʼox jabil, pe ta skoj ti toj bikʼit ti bu ch˗echʼ li chanob vune jaʼ noʼox la staik ta ikʼel 950 ermanoetik.

 Ti oyuk bu lek xuʼ xkomike. Kʼalal ch˗echʼ yuʼunik chanun li ta Salon sventa Tsobobbail o li ta Salon sventa Asambleae te chkomik ta sna ermanoetik. Kʼalal jun chib noʼox velta ch˗echʼ chanob vun ta jun jabile lek ti jech xichʼ pasele. Pe kʼalal oy jaykojuk velta ch˗echʼ ta jabile vokol xa van chaʼiik li ermanoetik sventa xuʼ xchʼamvan li ta snaike, jaʼ yuʼun laj yichʼ nopel ti chichʼ tunesel naetik ti te noʼox nopol xkom ti bu ch˗echʼ li chanune.

 Kʼalal chichʼ vaʼanel bu xuʼ x˗echʼ xchanunik, bu xuʼ xkomik li jchanubtasvanejetik xchiʼuk li 30 jchanunetike yalel toyol ti kʼu yepal chlaje. Pe chichʼ onoʼox jayibuk miyon dolar takʼin jaʼ ti bu jotukal tsmeltsaje.

 Li naetike jaʼ te tsvaʼanik ta stiʼil mukʼtik jteklumetike, pe ti oyuk karroetik kʼuxi xuʼ xkʼotike. Jech xtok, jaʼ te chichʼ meltsanel ti bu oy ep jcholmantaletik sventa xuʼ xkoltavanik ta skʼelel li naetike xchiʼuk li kʼusitik oy tee.

 Li bu ch˗echʼ li chanob vune oy svivliotekaik, komputadoraetik xchiʼuk ti bu xuʼ spasik imprimire. Jech xtok, oy bu xuʼ jmoj xveʼik li jchanunetik xchiʼuk li jchanubtasvanejetike, pe maʼuk noʼox taje, yuʼun oy bu xuʼ spasik ejersisio xchiʼuk xchʼay yoʼontonik.

 Li kʼusi mas tsots skʼoplale jaʼ ti bu chjelav li chanune. Jun ermano ti Troy sbi ti te ch˗abtej li ta Departamento sventa Svaʼanel salonetik xchiʼuk yan kʼusitik ta spʼejel Balumil ta Warwick (Nueva York), xi laj yale: «La jkʼanbekutik koltael li Departamento sventa Chanob vunetik sventa Dios ti skoltaunkutik ta smeltsanel splanoaltak li naetik ti bu ch˗echʼ li chanob vune xchiʼuk ti xuʼ skʼupinik chanun li jchanunetike. Li ermanoetike laj yalbunkutik kʼu smukʼul skʼan xkom li naetike xchiʼuk kʼu yelan skʼan xkom xchiʼuk laj yalik ti kʼu yelan skʼan xkom li slusaltake xchiʼuk sventa li audio xchiʼuk videoe». Li Zoltán ti chchanubtasvan li ta Chanob vun sventa j˗al lekil aʼyejetik yuʼun Ajvalilal yuʼun Dios ta Hungriae, xi laj yale: «Kʼalal chʼabal toʼox smikrofono li jchanunetike chkalbekutik ti akʼo tsots xkʼopojik tale. Pe, avi ti oy xa jujun smikrofonoike, ¡lek tajek!».

 ¿Mi staojbeik sbalil li jchanunetik xchiʼuk li jchanubtasvanejetike? Li Angela ti ay li ta Chanob vun sventa j˗al lekil aʼyejetik yuʼun Ajvalilal yuʼun Dios li ta Palm Coast, (Florida, Estados Unidose), xi laj yale: «Muʼyuk kʼusi chchʼay koʼontonkutik xchiʼuk lek tajek ti kʼu yelan meltsanbil ti bu ch˗echʼ li chanune xchiʼuk ti bu chikomkutik ta vayele. Jaʼ jech lek xuʼ xichanunajkutik xchiʼuk ep kʼusi ta jchankutik». Li Csaba ti chakʼ chanubtasele tskʼupin tajek ti koʼol chveʼ xchiʼuk li jchanunetike, ep staojbe sbalil ti jech tspase, xi chale: «Mas to chkojtikinkutik li jchanunetike, yuʼun chalik ti kʼu yelan oyike o li kʼusi echʼem ta xkuxlejalike, vaʼun jaʼ tskoltaunkutik sventa jnaʼkutik kʼuxi xuʼ jkoltakutik».

 Li jchanunetik xchiʼuk li jchanubtasvanejetike lek tajek chaʼiik ti kʼu yelan komem li naetike xchiʼuk ti jaʼ jun bendision chaʼiik ti jaʼ yakʼoj li ‹Mukʼul Jchanubtasvaneje› (Isaias 30:20, 21). Li ta Filipinase la xchʼubaik xchiʼuk la smeltsanik jpʼej na sventa te xjelav li chanob vune. Jun ermana ti te echʼ yuʼun li chanune, xi chale: «Ti kʼu yelan kom li naetike, la skoltaunkutik sventa maʼuk noʼox jchanun chkaʼi jbakutik, yuʼun xkoʼolaj ti jaʼ la staunkutik ta ikʼel stuk li Jeovae. Yuʼun tskʼan ti jchankutik lek li Skʼope xchiʼuk ti jkʼupinkutik xchanele».

 Kolaval ti chavakʼ talel adonasionike. Yuʼun jech xuʼ xichʼ meltsanel, chaʼvaʼanel xchiʼuk ti xichʼuk kʼelel sventa lekuk noʼox oy ti bu ch˗echʼ li chanob vunetike. Li donasionetik taje ep buchʼutik tstakik talel ta donate.pr418.com. ¡Kolavalik tajek ti jech chapasike!