Ta epal lumetike, li j-abteletike yalojik ti mu stakʼ xijnopaj ta stojolal li yantike xchiʼuk ti mu stakʼ epuk jtsob jbatike. Li stestigoutik Jeovae ta jkʼan ta jchʼuntik li mantaletik taje, pe ta jkʼantik xtok ti jechuk-o ta jtsob jbatike. Jaʼ yuʼun li ta tsobobbailetike yakal tstunesik jun aplikasion ti jaʼ sbi Zoom sventa stsob sbaik ta videoconferencia.

 Li Jtsop Jbeiltasvaneje laj yal ti xichʼuk tunesel li matanal takʼin sventa xichʼ manel jayibuk kuentaetik ta Zoom sventa jechuk-o xetʼes stsobajelik li junantik tsobobbailetike. Epal koltael laj yaʼiik li tsobobbailetik ti mu xtoj yuʼunik li kuentaetik taje ti tetik van oxib sien, chanib sien o mas stojole. Li tsobobbailetik taje jaʼ toʼox tstunesik li aplikasion ti ta matanal oye, ti mu toj epuk buchʼu xuʼ x-oche xchiʼuk ti mu toj lekuke. Pe jaʼuk li kuentaetik ta Zoom ti jaʼ tstoj li organisasione oy kʼusitik stakʼ jelel sventa mu chopoluk kʼusi xkʼot ta pasel, mas kʼun ta tunesel xchiʼuk ep buchʼutik xuʼ x-ochik li ta tsobajele. Li avie, oy mas ta 65 mil tsobobbailetik ta mas ta 170 lumetik ti yakal tstunesik li kuentaetik taje.

 Li ta jteklum Manado ti te xkom ta Célebes Septentrional ta Indonesia, li tsobobbail Kairagi jaʼ xa lik stunesik jun kuenta ta Zoom ti jaʼ tstoj li organisasione. Li ermano Hadi Santoso xi chale: «Li ermanoetik ti mu masuk snaʼik stunesel li selular, tavleta o yan kʼusitike xuʼ skʼupinik ek li tsobajeletike, yuʼun mu xa persauk ti x-ochik jayibuk velta ta Zoom kʼalal jaʼo yakal li tsobajele».

 Li Léster Jijón ti jaʼ jun mol ta tsobobbail Guayacanes Oeste te ta Guayaquil ta Ecuador xi chale: «Ta skoj ti muʼyuk lek stakʼinik li ermanoetike, epal tsobobbailetike mu van xman yuʼunik jechuk li jun kuenta ta Zoom sventa jmoj x-echʼ yuʼunik li tsobajele. Koliyal li j-organisasionkutike oy xa jkuentakutik ta Zoom ti xuʼ ep buchʼutik x-ochike. Jaʼ yuʼun, ta skoj ti muʼyuk noʼox chapbil ti kʼu yepal xuʼ x-ochike, muʼyuk xa chixiʼkutik ta yalbel mas krixchanoetik ti x-ochik tal li ta tsobajele».

 Li ermano Johnson Mwanza ti te chtun li ta tsobobbail Norte Ngwerere ti te xkom ta Lusaka ta Zambiae xi laj yale: «Ep ta velta xi yalojbunkutik li ermanoetike: ‹Li Zoom ti jaʼ tstoj li organisasione maʼuk noʼox ti jaʼ mas nopol chkaʼi jbakutik-o ta stojolal li ermanoetike, yuʼun te chvinaj xtok ti skʼanojutik li Jeovae›».

 Sventa xichʼ tojel li kuentaetik ta Zoome, jaʼ te chichʼ lokʼesel ti bu chʼakbil takʼin sventa xichʼik koltael li ermanoetik ti chil svokolike. Li takʼin taje jaʼ te chichʼ tael li ta matanal takʼin sventa li abtelal ta spʼejel balumile. Ep buchʼutik jaʼ te tstakik batel li ta donate.pr418.com. Kolavalik tajek ti chavakʼik tal matanal takʼine. Taje ta xichʼ tunesel xtok kʼalal oy chil svokol ermanoetik ta spʼejel balumile (2 Korintios 8:14).