Xi chal Agostinho ti te nakal ta Brasile: «Lichʼi ta jun rancho, abol jbakutik tajek xchiʼuk laj kikta chanun sventa xi-abtej xchiʼuk jkolta li kutsʼ kalale». Li Agostinho jaʼ to la xchan stsʼibael xchiʼuk skʼelel vun kʼalal yichʼoj xa ox 33 sjabilale. Xi to chale: «Ximuyubaj xchiʼuk mas xa oy jbalil chkaʼi ti la jchan skʼelel xchiʼuk stsʼibael vune».

 Li Agostinho te tsakal skʼoplal li ta mas ta 250 mil krixchanoetik ti laj yichʼik koltael yuʼun stestigotak Jeova sventa skʼelik xchiʼuk stsʼibaik vun leʼ xa tal ta 70 jabile. ¿Kʼu yuʼun jech tspasik li stestigotak Jeovae? ¿Kʼuxi staojbeik sbalil li krixchanoetike?

 Li ta sjabilal 1935, li stestigotak Jeovae chcholik xa ox mantal ta 115 mukʼtik lumetik. Sventa xcholbeik mantal li krixchanoetik ti yan-o skʼopike, li misioneroetike chakʼbeik yaʼiik mantaletik ti pasbil gravar ta skʼop stukike, bakʼintike chakʼbeik vunetik. Ep buchʼutik tskʼan chchanik li kʼusi chal Vivliae, pe vokol chaʼiik, yuʼun ep buchʼutik mu snaʼik skʼelel xchiʼuk stsʼibael vun.

 Mi mu xtojobik skʼelel li Vivliae, ¿kʼuxi tsnaʼik li beiltaseletik yichʼoje? Xchiʼuk ¿kʼuxi chakʼ ta xkuxlejalik? (Josue 1:8; Salmo 1:2, 3). Mu kʼunuk chaʼiik sventa spasik li kʼusi sbainojik jech kʼuchaʼal jun yajtsʼaklom Kristoe. Jech kʼuchaʼal liʼe, mi mu snaʼik skʼelel vun li totil meʼiletike, mas me vokol chaʼiik ti xchanubtasik li yalab xnichʼnabike (Deuteronomio 6:6, 7). Jech xtok, li buchʼutik mu to jaluk yochelik ta stestigo Jeova xchiʼuk ti mu snaʼik skʼelel vune vokol chaʼiik sventa xcholik mantal xchiʼuk ti xchanubtasik yantik ta sventa li Vivliae.

 Li ta sjabilaltik 1940 kʼalal to ta 1950, li ermano Nathan Knorr xchiʼuk Milton Henschel ti jaʼik li buchʼutik tsbeiltasik li organisasione batik ta junantik mukʼtik lumetik sventa xchapanik ti kʼu yelan skʼan xcholik mantale. Laj yalbeik li ermanoetik ta Betel ti akʼo xchapanik chanunetik li ta tsobobbailetik ti bu ep buchʼutik mu snaʼik skʼelel vune.

 Li ermanoetik ta Betele laj yalbeik batel tsobobbailetik ti kʼu yelan skʼan xchanubtasvanike. Ta junantik mukʼtik lumetike, li ermanoetike jaʼ la stunesik li vunetik yakʼoj ajvalil xchiʼuk ti kʼu yelan chchanubtasvanike. Jech kʼuchaʼal liʼe, li Betel ta Brasile la stak batel ta tsobobbailetik livroetik ti yakʼoj ajvalile. Ta yantik mukʼtik lumetike, li ermanoetike te la skʼel stukik kʼuxi xuʼ xchanubtasvanik.

 Xuʼ xbatik ta chanun viniketik, antsetik, kerem tsebetik xchiʼuk li buchʼutik oy xa sjabilalike. ¿Kʼu yuʼun ti jech chichʼ pasele? Jaʼ sventa xchanik skʼelel vun ta skʼop stukik, akʼo mi oy tsobobbailetik ti skʼan xakʼik chanun ta jeltos kʼopetike.

 ¿Kʼuxi staojbeik sbalil li chanune? Xi chal jun stestigo Jeova ti te nakal ta Mexicoe: «Avie, xkaʼibe xa smelolal li kʼusi chal Vivliae xchiʼuk chkʼot ta koʼonton. Ti jnaʼ xa skʼelel vune, skoltaojun sventa jun noʼox koʼonton jcholbe mantal li jlakʼnatake xchiʼuk li yan krixchanoetike».

 ¿Kʼusi yan koltaatik-o ti jech laj yichʼik chanubtasele? Xi chal Isaac ti te nakal ba Burundi: «Kʼalal la jchan skʼelel xchiʼuk stsʼibael vune, la skoltaun sventa masuk xitojob svaʼanel li kʼusitike. Avie, jaʼ xa chi-abtej-o xchiʼuk jaʼ xa jbainoj skʼelel li kʼusitik mukʼtik chichʼ vaʼanele».

 Li Jesusa ti te nakal ta Perú xchiʼuk ti yichʼoj xa ox 49 sjabilal kʼalal laj yichʼ chanubtasel ta skʼelel vune, xi chale: «Ta skoj ti jaʼ jbainoj skʼelel li kʼusitik chtun ta yut jnae. Skʼan jkʼelbe stojol xchiʼuk skʼan jkʼelbe sbi li kʼusitik ta jman ta merkadoe. Taje toj vokol toʼox chkaʼi, pe avi ti jnaʼ xa skʼelel vune mas xa jun koʼonton chbat jman li kʼusi chtun yuʼun kutsʼ kalale».

 Ti kʼu xa sjalil echʼem tale, li j-abteletik ta mukʼtik lumetike yilojik ti toj ep sbalil ti chchanubtasvanik ta stsʼib xchiʼuk ta skʼelel vun li stestigotak Jeovae. Li avie, jech-o yakal tspasik. Mas xa xtojobik ti kʼu yelan chchanubtasvanike xchiʼuk oy xa yan kʼusitik tstunesik. Jech xtok, sventa jechuk-o xchanubtasik li krixchanoetik ta skʼelel vune xchiʼuk ti skoltaik li buchʼutik jutuk chanunajemike, spasojik jutuk mu 224 miyon foyetoetik ta 720 jeltos kʼopetik. a