¡CHAPALUKUTIK-O!

2022: Ep kʼusitik kʼotanuk ta pasel | ¿Kʼusi chal li Vivliae?

CHICHʼ TIJEL TA

Li ta sjabilal 2022, juʼ epal paskʼopetik, laj kil jvokoltik ta takʼin, echʼ nikel, nojelal ta voʼ xchiʼuk yan kʼusitik. Jaʼ noʼox Vivlia chalbutik kʼu yuʼun ti jech chkʼot ta pasele.

¿Kʼusi smelolal li kʼusitik kʼot ta pasel ta sjabilal 2022?

Li kʼusitik kʼot ta pasel ta sjabilal 2022, chakʼ ta ilel ti kuxulutik ta ‹slajebal xa kʼakʼal› jech kʼuchaʼal chal li Vivliae (2 Timoteo 3:1). Li slajebal kʼakʼale te lik talel ta 1914. Li kʼusitik yakal chkʼot ta pasel li avie jech xa onoʼox yaloj li Vivliae. Jkʼeltik batel:

«Paskʼop» (Mateo 24:6).

«2022: Li ta jabil taje, laj yil svokolik yan velta ta paskʼop li ta Europae». a

Kʼelo li mantal ti xi sbie: «Li Rusiae tstsak ta kʼop Ucrania».

«Chtal viʼnal» (Mateo 24:7).

«2022: Li ta jabil taje, ep buchʼutik laj yil svokolik ta viʼnal ti muʼyuk toʼox bu jech ilbil˗oe». b

Kʼelo li mantal ti xi sbie: «Li paskʼop ta Ucraniae chkil˗o jvokoltik ta viʼnal».

«Chlik […] tsatsal chamel» (Lukas 21:11).

«Laj kil tajek jvokoltik kʼalal chaʼlik li chamel polioe o viruela del mono xchiʼuk ep to tajek buchʼutik chchamik ta skoj li COVID-19. Taje chakʼ ta ilel ti toj xibalik sba li chameletik taje xchiʼuk ti toj anil xuʼ xij˗ipaje». c

Kʼelo li mantal ti xi sbie: «Chamik vakib miyon ta skoj li COVID-19».

«Chichʼ ilel kʼusitik toj xibal sba» (Lukas 21:11).

«Toj ep laj kil jvokoltik li ta yorail kʼepelal ta sjabilal 2022. Ta skoj ti toj kʼixine, ti toj jal li kʼepelale, li kolemal kʼokʼ xchiʼuk li nojelal ta voʼe, ep buchʼutik chamik xchiʼuk ta smiyonal noʼox krixchanoetik chʼay snaik». d

Kʼelo li mantal ti xi sbie: «Yantik xkʼixnaj li ta spʼejel balumile».

‹Vochlajetel› (Lukas 21:9).

«Li ta sjabilal 2022, kap tajek sjol li krixchanoetik ta skoj ti toy tajek stojol li kʼusitike. Jaʼ yuʼun, la spasik marcha, yuʼun muʼyuk lek chilik kʼu yelan tspas yabtel li ajvaliletike». e

Kʼelo li mantal ti xi sbie: «Chtoy stojol li kʼusitik ta jmantike».

¿Kʼusi chkʼot ta pasel li ta yan jabile?

Muʼyuk buchʼu snaʼ li kʼusi chkʼot ta pasel li ta sjabilal 2023. Pe li kʼusi jnaʼojtike jaʼ ti jutuk xa skʼan sjel jkuxlejaltik li Ajvalilal yuʼun Diose (Daniel 2:44). Li Ajvalilal taje tslajesbe skʼoplal li kʼusi chakʼ jvokoltike xchiʼuk chakʼ kʼotuk ta pasel li kʼusi oy ta yoʼonton Dios liʼ ta balumile (Mateo 6:9, 10).

Ta jtijkutik avoʼonton sventa vikʼiluk˗o asat jech kʼuchaʼal laj yal Jesuse xchiʼuk ti xavakʼ venta kʼuxi yakal chkʼot ta pasel avi li albil kʼopetik chal ta Vivliae (Markos 13:37). Kʼoponunkutik tal sventa xanaʼ kʼuxi tskoltaot Vivlia li avie xchiʼuk kʼuxi xuʼ skolta avutsʼ avalal sventa oyuk kʼusi lek staik ta mas jelavele.

a AP News, «2022: Li ta jabil taje, laj yil svokolik yan velta ta paskʼop li ta Europae» (Jill Lawless, 8 yuʼun disiembre ta 2022).

b Programa Mundial de Alimentos, «Jvokoltik ta viʼnal ta spʼejel balumil».

c JAMA Health Forum, «Kuxulutik ta jun balumil ti oy COVID-19, viruela del mono, polio xchiʼuk yan chameletik» (Lawrence O. Gostin, JD, 22 yuʼun septiembre ta 2022).

d Earth.Org, «¿Kʼu yuʼun ep kʼusitik kʼot ta pasel li ta yorail kʼepelal li ta sjabilal 2022?» (Martina Igini, 24 yuʼun oktuvre ta 2022).

e Carnegie Endowment for International Peace, «Ep buchʼutik la spas marcha ta sjabilal 2022 ta skoj ti toy stojol li kʼusitike» (Thomas Carothers and Benjamin Feldman, 8 yuʼun disiembre ta 2022).