¡CHAPALUKUTIK˗O!
2023: Toj echʼ xa noʼox ep vokolil laj kiltik | ¿Kʼusi chal li Vivliae?
Li kʼusitik kʼot ta pasel ta sjabilal 2023, chakʼ ta ilel ti kuxulutik ta ‹slajebal xa kʼakʼal› (2 Timoteo 3:1). Li kʼusitik yakal chkʼot ta pasel li avie jech xa onoʼox yaloj li Vivliae. Jkʼeltik batel:
¿Kʼusi chal Vivlia ta sventa li kʼusitik yakal chkʼot ta pasel avie?
«Chavaʼiik ti oy paskʼop liʼe xchiʼuk ti oy paskʼop ta nome» (Mateo 24:6).
«Ta buyuk xa noʼox lumal yakal ch˗epaj li majbail xchiʼuk milbaile». a
Kʼelo li mantaletik ti xi sbie: «¿Buchʼu van xuʼ spoj li krixchanoetike?» xchiʼuk «Epal takʼin la slajesik ta sventa li abtejebaletik sventa paskʼope».
«Ch-echʼ nikel ta buyuk noʼox»(Markos 13:8).
«Ti kʼuxi lik talel li sjabilal 2023 kʼalal to avie, echʼem xa tal mas ta 13 jeltos nikeletik ti 7.0 stsatsale o mas. Muʼyuk bu xkiltik˗o mas jech ti toj tsotsik ch˗echʼe». b
Kʼelo li mantal ti xi sbie: «Echʼ tsatsal nikel ta Turquía xchiʼuk ta Siria».
«Chichʼ ilel kʼusitik toj xibal sba»(Lukas 21:11).
«Maʼuk xa chkaltik ti kʼixnajem tajek li balumile, yuʼun avie xuʼ xkaltik ti yakal xa chkʼakʼe».(António Guterres, sekretario ta Naciones Unidas). c
Kʼelo li mantal ti xi sbie: «Buyuk xa noʼox ti kʼixnaj tajek ta 2023».
«Chtal viʼnal»(Mateo 24:7).
«2023: Ep buchʼutik ti toj vokol laj yaʼiik ta smakʼlinel li yutsʼ yalalike». d
Kʼelo li mantal ti xi sbie: «Vokol ta tael veʼlil ta skoj paskʼop xchiʼuk ti chjel sikil xkʼixnal balumile».
«Chtal tsots [vokolil,] toj echʼ noʼox xibal sba»(2 Timoteo 3:1).
«Li ta spʼejel balumile, jun li ta vaxakvoʼ krixchanoetike tsakbilik ta jtos chamel ta snopbenik». e
Kʼelo li mantal ti xi sbie: «Toj labal sba ti kʼu yelan yantik chjel snopbenik li kerem tsebetike».
¿Kʼusi chkʼot ta pasel li ta 2024?
Muʼyuk buchʼu snaʼ li kʼusi chkʼot ta pasel ta yan jabile. Pe li kʼusi yakal chkʼot ta pasele, jaʼ chakʼ ta ilel ti poʼot xa xlik ajvalilajuk li Ajvalilal yuʼun Diose, vaʼun tslajesbe skʼoplal li ajvaliletik liʼ ta balumile, li kʼusi chakʼ jvokoltike xchiʼuk li kʼusi chakʼ at˗oʼontone(Daniel 2:44; Apokalipsis 21:4).
Jtos ti kʼusi xuʼ jpastik avie, jaʼ ti xkalbetik Dios ti akʼo skoltautike, yuʼun xi chal li Vivliae:
«Ta jpat koʼonton ta atojolal kʼalal chixiʼe»(Salmo 56:3).
¿Kʼuxi xuʼ xkakʼtik ta ilel ti jpatoj koʼontontik ta stojolal Diose? Ta jtijkutik avoʼonton sventa xachan li spatobil oʼontonal chalbe skʼoplal li Vivliae. Sventa xavaʼibe mas smelolale, kʼano junuk matanal chanubtasel ta Vivlia ti xuʼ skoltaot xchiʼuk li avutsʼ avalale.
a Foreign Affairs, “A World at War: What Is Behind the Global Explosion of Violent Conflict?” (Yakal paskʼop ta spʼejel balumil: ¿Kʼu yuʼun ti jech yakal chkʼot ta pasele?, Emma Beals xchiʼuk Peter Salisbury; 30 yuʼun oktuvre ta 2023.
b Noticias de terremotos (Aʼyejetik sventa nikel), «2023: Mu xa xchap kuʼuntik likel ti jaykoj tsatsal nikel ch˗echʼe»; mayo ta 2023.
c Naciones Unidas, “Secretary-General’s Opening Remarks at Press Conference on Climate” (jaʼ jech laj yal jun sekretario ta sventa li xkʼixnal balumile) 27 yuʼun julio ta 2023.
d Programa Mundial de Alimentos, «Chilik viʼnal krixchanoetik ta spʼejel balumil».
e Organización Mundial de la Salud, “Día Mundial de la Salud Mental”; 10 yuʼun oktuvre ta 2023.