Kʼalal chchʼay avabtele, xuʼ van chavil avokol ta takʼin, ta avutsʼ avalal, chavul tajek avoʼonton xchiʼuk ti jeche’ no’ox xkapet ajole. Sventa xkuch avuʼune, oy jayibuk beiltaseletik ta Vivlia ti xuʼ skoltaot xchiʼuk ti oy˗o sbalil avie.

•   Albo yantik ti kʼu yelan chavaʼi abae.

   Li kʼusi chal li Vivliae: «Li melel amigoile skotol ora chakʼ ta ilel ti chkʼanvane» (Proverbios 17:17).

   Mi chʼay avabtele, xuʼ van chavat avoʼonton, cha˗ilin, mu van xanaʼ kʼusi chapas xchiʼuk xuʼ van muʼyuk abalil chavaʼi aba. Pe mi chavalbe avutsʼ avalal xchiʼuk avamigotak ti kʼu yelan chavaʼi abae, xuʼ van skoltaoxuk sventa junuk noʼox avoʼonton. Jech noʼox xtok, xuʼ xakʼboxuk tojobtasel yoʼ xata junuk avabtel.

•   Mu xavul tajek avoʼonton.

   Li kʼusi chal li Vivliae: «Mu me xavul avoʼontonik ta sventa li yokʼomale, yuʼun oy kʼusi chakʼ vul oʼonton xtok li ta yokʼomale» (Mateo 6:34).

   Li Vivliae chalbutik ti kak jnoptik li kʼusitik ta jpastike (Proverbios 21:5). Pe jech noʼox xtok, chalbutik ti mu jvul tajek koʼontontik ta sventa li kʼusi xuʼ xkʼot ta pasele. Mas lek ti junuk noʼox koʼontontik jujun kʼakʼale, yuʼun bakʼintike ta jvul koʼontontik ta sventa li kʼusi muʼyuk to kʼotem ta pasel o ti muʼyuk onoʼox chkʼot ta pasele.

   Li Vivliae chakʼbutik yan tojobtaseletik sventa jtsaltik li vul oʼontone. Mi chakʼan chanabe mas yaʼyejale, kʼelo li mantal «¿Kʼusi xuʼ jpastik yoʼ mu jvul tajek koʼontontike?».

•   K’elo lek ti kʼu yelan chatunes li atakʼine.

   Li kʼusi chal li Vivliae: «Jnaʼoj xa kʼusi ta jpas [...] kʼalal oy ep kʼusi kuʼune xchiʼuk kʼalal chʼabal kʼusi oy kuʼune» (Filipenses 4:12).

   Akʼo persa ti lekuk no’ox sba li akuxlejal avie xchiʼuk xuʼ van skʼan xa jutukajes ti kʼu yelan chalajes li atak’ine. Jech xtok, pʼijan me ti mu xatikʼ aba ta ilil ta jech no’oxe (Proverbios 22:7).

   Mi chakʼanbe to mas yaʼyejal ta sventa ti kʼuxi xuʼ xijkuxiutik akʼo mi chʼabal lek jtakʼintike, xuʼ xakʼel li mantal «¿Kʼuxi xuʼ xijkuxi akʼo mi jutuk jtakʼintik?».

•   Lekuk xatunes li jujun kʼakʼal chjelave.

   Li kʼusi chal li Vivliae: «Jechuk-o me pʼijanik [xchiʼuk] lek me xatunesik li jujun kʼakʼal chjelav avuʼunike» (Kolosenses 4:5).

   Akʼo mi muʼyuk lek yorail li avabtele, lekuk xatunes li jujun kʼakʼal chjelav avuʼune. Taje jaʼ tskoltaot yoʼ lekuk noʼox li akuxlejale xchiʼuk ti junuk noʼox avoʼontone.

•   Chʼamo yan abtelal.

   Li kʼusi chal li Vivliae: «Kʼusiuk tsatsal abtelal chichʼ tabel sbalil» (Proverbios 14:23).

   Oyuk ta avoʼonton spasel kʼusiuk abtelal akʼo mi jaʼ jun abtelal ti muʼyuk bu jech apasoj˗oe. Mu xanop ti maʼuk ta aventa jtosuk abtelal ta skoj ti jutuk chtojvanike o ti muʼyuk tsots skʼoplal yilele.

•   Mu xachibaj.

   Li kʼusi chal li Vivliae: «Tsʼuno sbekʼ atsʼunob li ta sobe xchiʼuk mu me xkux akʼob kʼalal to ta mal kʼakʼal. Yuʼun mu xanaʼ bu junukal chchʼi tal» (Eklesiastes 11:6).

   Mu xavikta aba ta saʼel avabtel. Albo avutsʼ avalal, avamigotak, buchʼutik xavojtikin, achiʼiltak toʼox ta abtel xchiʼuk alakʼnatak ti yakal chasaʼ avabtele. Teuk noʼox asat ti bu tskʼanik yaj˗abtelike xchiʼuk bat jakʼo ti bu anaʼoj ti chakʼik abtelale. Jech xtok, xuʼ van xasaʼ ta Internet. Teuk ta ajol ti sventa xata avabtele ep butik skʼan xabat yoʼ sjakʼboxuk kʼusi xatojob spasele xchiʼuk xuʼ van skʼan xavakʼ avuntak.