Li ta domingo 20 yuʼun noviembre ta 2022 tsuts li Conferencia de las Naciones Unidas sobre el Cambio Climático (COP27). Li buchʼutik ayik li ta tsobajele laj yalik ti tstsobik takʼin sventa xuʼ skoltaik li jteklumetik ti chil svokolik ta skoj ti chjel xkʼixnal xchiʼuk sikil li balumile. Akʼo mi stuk xa noʼox jech li kʼusi kʼot ta nopel yuʼunike, ep buchʼutik tsnopik ti mu xchapaj-o yuʼun li vokolile.

•    «Ximuyubaj tajek ti chichʼ tsobel takʼin sventa xichʼik koltael li buchʼutik chil svokolik ta skoj ti chjel sikil xchiʼuk xkʼixnal li balumile, melel onoʼox ti mu xchapaj-o li vokolile. Li jbalumiltike tsots tajek yakal chil svokol ti skʼan xa noʼox kʼelel kʼuchaʼal jun krixchano ta ospital ti tsots ipe». Xi laj yal: António Guterres, secretario general de las Naciones Unidas, 19 yuʼun noviembre ta 2022.

•    «Li ta balumile oy kʼusi poʼot xkʼot ta pasel ti jkotoltik chkil-o jvokoltik yuʼune». Xi laj yal: Mary Robinson, pasaro presidenta ta Irlanda xchiʼuk tsots toʼox tajek yabtel ta ONU sventa Derechos Humanos, 20 yuʼun noviembre ta 2022.

 Li buchʼu mas tsvul yoʼontonik ta sventa li balumile jaʼ li kerem tsebetike. ¿Mi xuʼ van jmoj x-abtejik li ajvaliletik sventa skʼelbeik skʼoplal kʼu yelan chjel batel sikil xchiʼuk xkʼixnal li jbalumiltike xchiʼuk mi chkʼot van ta pasel yuʼunik li kʼusi chalike? ¿Kʼusi chal li Vivliae?

 Ti melel xkaltike ep buchʼutik tsots ch-abtejik xchiʼuk ti oy ta yoʼontonik ta melel sventa skʼelbeik skʼoplal li jbalumiltike, pe li Vivliae chal ti oy noʼox spajeb li kʼusi spas yuʼunike. Jkʼelbetik chib srasonal:

•    «Mu xa stakʼ tukʼibtasel li kʼusi xotxote» (Eklesiastes 1:15).

   Li kʼusi skʼan xale: Li ajvaliletike oy ta yoʼontonik ti lek kʼusi spasike, pe mu spas yuʼunik ta skoj ti mu xuʼ sventain sba stuk li krixchanoetike (Jeremias 10:23). Manchuk mi solel jmoj ch-abtejik li ajvaliletike, mu onoʼox xchapaj yuʼunik li kʼusi chkʼot ta pasel ta balumile.

•    «Yuʼun tskʼan sba stuk li krixchanoetike, batem ta yoʼontonik takʼin <u202F>[…], mi jutebuk oy ta yoʼontonik tspas ta jmoj skʼopik» (2 Timoteo 3:2,3).

   Li kʼusi skʼan xale: Li Vivliae laj xa onoʼox yal ti jaʼ noʼox batem ta yoʼontonik saʼel li kʼusi tskʼan stuk li krixchanoetike xchiʼuk ti muʼyuk oy ta yoʼontonik ti jmoj x-abtejik sventa stabeik sbalil skotol li yan krixchanoetike. ¿Mi mu jechuk ti jaʼ jech yakal chkʼot ta pasele?

 Maʼuk oy ta skʼob ajvaliletik ta balumil sventa xlekub li jbalumiltike. Li Diose laj xa svaʼan ta Ajvalil li Jesukristo sventa skʼel xchiʼuk xchabi li jbalumiltike. Li Vivliae xi chal ta stojolale:

•    «Jaʼ ch-och ta skʼob li ajvalilale. Xi chichʼ biiltasele: Pʼijil Jtojobtasvanej, Dios ti oy sjuʼele, Totil sbatel osil, Bankilal J˗akʼ˗jun˗oʼontonal» (Isaias 9:6).

 Li Jesuse jaʼ li buchʼu tʼujbil sventa spas mantal li ta Ajvalilal yuʼun Diose (Mateo 6:10). Li Jesuse oy sjuʼel, spʼijil xchiʼuk oy ta yoʼonton chchabi li balumile xchiʼuk li buchʼutik te nakalike (Salmo 72:12,16). Li Ajvalil ti te oy ta vinajele tslajesbe skʼoplal li buchʼutik yakal tsokesik li balumile xchiʼuk chchaʼmeltsan li kʼusitik sokem yuʼune (Apokalipsis 11:18; Isaias 35:1,7).

 Mi chakʼan to chanabe skʼoplal kʼuxi chchapaj li jvokoltik ta skoj ti yantik sok li jbalumiltike, kʼelo li mantal: «¿Kʼusi chal Vivlia ta sventa ti chjel li sikil xkʼixnal balumile xchiʼuk kʼusi chkʼot ta pasel?».