Mas xa ep ti buchʼu stuk chaʼi sbae | ¿Kʼusi chal li Vivliae?
Laj yichʼ kʼelbel skʼoplal ta spʼejel balumil a ti jun li ta chanvoʼ krixchanoe stuk chaʼi sba.
«Avie, mas xa ep krixchanoetik ti tskʼan ti stuk oyike, mu ventauk jayib sjabilalik o ti bu nakalike» (Chido Mpemba, copresidenta de la Comisión de la Organización Mundial de la Salud sobre Conexión Social).
Labal sba ta kʼelel, pe maʼuk noʼox li buchʼutik oy xa sjabilalik o ti nom nakalik ti stuk chaʼi sbaike, yuʼun jaʼ jech chaʼi sbaik li kerem tsebetik eke, li buchʼutik mu masuk x˗ipajike, li buchʼutik nupunemike o li buchʼutik lek noʼox li xkuxlejalike. Kʼalal ta jchʼak jbatik ta stojolal yantike xchiʼuk kʼalal jtuk chkaʼi jbatike, xuʼ me tsots xij˗ipaj˗o yuʼun xchiʼuk xuʼ syayijes koʼontontik.
«Kʼalal jtuk chkaʼi jbatike, maʼuk noʼox ti mu kʼusi jkʼantike o ti j-echʼel be noʼox jech chkaʼi jbatike [...]. Yuʼun kʼalal ta jchʼak jbatik ta stojolal yantike, xkoʼolaj ti ta jbutsʼtik 15 sikʼolal ta kʼakʼal ti xuʼ xijcham˗o yuʼune» (Vivek Murthy, director general sventa Salud Pública ta Estados Unidos).
Li kʼusi chal Vivliae
Li Jpasvanej kuʼuntike mu skʼan ti jchʼak jbatike. Li Diose tskʼan ti oyuk lek kamigotik sventa jmojuk kʼusi jpastik xchiʼuke.
Xi chal li Vivliae: «Xi laj yal li Jeova Diose: ‹Mu lekuk ti stuk˗o li vinike›» (Jenesis 2:18).
Li Diose tskʼan ti xkamigointike. Jamal chal ti chnopaj ta jtojolaltik mi chkakʼtik persa chijnopaj ta stojolal eke (Santiago 4:8).
Xi chal li Vivliae: «Xmuyubajik noʼox li buchʼutik chakʼik venta ti chtun yuʼunik li beiltasel chakʼ Diose, yuʼun jaʼ chuʼuninik li Ajvalilal ta vinajele» (Mateo 5:3).
Li Diose tskʼan ti tsobol xkichʼtik ta mukʼe. Kʼalal jech ta jpastike, mas me xijmuyubaj.
Xi chal li Vivliae: «Skʼan me oyuk ta koʼonton jbatik ta jujuntal yoʼ jtijbe jba koʼontontik sventa jkʼan jbatik xchiʼuk jpastik li kʼusitik toj leke, jech xtok, mu me xkiktatik ti ta jtsob [jbatike] [...], jaʼ lek jpatbe jba koʼontontik ta jujuntal» (Ebreos 10:24, 25).
Mi chakʼan to chanabe mas skʼoplal sventa xanaʼ kʼusi xuʼ xapas yoʼ mu atukuk xavaʼi abae, kʼelo li mantal «Soledad en la era de la comunicación».
a Li Meta xchiʼuk Gallupe jaʼ la skʼelbeik skʼoplal ta 2023 li The Global State of Social Connections (Estado de las conexiones sociales en el mundo).