Toj chopol tajek chaʼi sba li krixchanoetik kʼalal muʼyuk chkʼot ta pasel kʼusi chal li buchʼu spatoj yoʼontonik ta stojolale, jech kʼuchaʼal liʼe:

•    Kʼalal jaʼ tspas li kʼusi oy ta yoʼonton stuk li jpolitikoetike, maʼuk li kʼusi oy ta yoʼonton yantike.

•    Kʼalal tspukik aʼyejetik ta radio xchiʼuk ta television ti mu meleluke xchiʼuk ti muʼyuk tstabe sbalil yantike.

•    Kʼalal maʼuk tspasik sientifikoetik li kʼusi tstabe sbalil krixchanoetike.

•    Kʼalal jaʼ batem ta yoʼontonik politika li jnitvanejetik ta relijione, maʼuk ti xakʼik ta ojtikinel li Diose.

 Melel onoʼox, skʼan jkʼeltik buchʼu ti xuʼ jpat koʼontontik ta stojolale. Yuʼun xi chal li Vivliae:

•    «Mu xapat avoʼontonik ta stojolal li bankilaletike mi jaʼuk ta stojolal li xnichʼon krixchano ti mu xuʼ yuʼun xkoltavane» (Salmo 146:3).

 Li Vivliae chal ti oy buchʼu xuʼ xapat avoʼonton ta stojolale, jaʼ li Jesukristoe. Yuʼun maʼuk noʼox jun lekil vinik echʼ ta balumil. Li Vivliae chal ti chventainvan sbatel osil li Jesuse xchiʼuk ti «muʼyuk bu chlaj skʼoplal li Ajvalilal yuʼune» (Lukas 1:32, 33). Jaʼ vaʼanbil sventa spas mantal li ta Ajvalilal yuʼun Diose. Li avie te yakal ch˗ajvalilaj ta vinajel (Mateo 6:10).

•    Sventa xavil kʼu yuʼun xuʼ xapat avoʼonton ta stojolal Jesuse kʼelo li mantaletik liʼe: «¿Buchʼu stʼujoj Dios sventa x-och ta Ajvalile?» xchiʼuk «¿Kʼusi tspas ta jtojolaltik li Ajvalilal yuʼun Diose?».