Ta spʼejel balumile, oy ep lumetik ti xchʼakoj sba li krixchanoetik ta skoj politikae. Li ta 2022, li centro de investigación Pew Research Center «la sjakʼbe sloʼil krixchanoetik ta 19 jeltos lumetik. Vaʼun, 65% laj yalik ti oy ep chʼakbail li ta slumalik ta skoj ti tikʼajtik ta jeltos politika li krixchanoetike».

 Ti bu nakalote, ¿mi yantik xchʼak sbaik li krixchanoetik ta skoj politikae? ¿Kʼu yuʼun ti jech chkʼot ta pasele? ¿Mi oy van xchapanobil? Kʼelo avil kʼusi chal li Vivliae.

 Li Vivliae yaloj xa onoʼox ti ta slajebal kʼakʼale, ep krixchanoetik ta sok stalelalik ti jaʼ ta xchʼakvan˗oe.

•   «Chtal tsots vokolil li ta slajebal xa kʼakʼale, toj echʼ noʼox xibal sba. Yuʼun tskʼan sba stuk li krixchanoetike, [...] mi jutebuk oy ta yoʼontonik tspas ta jmoj skʼopik» (2 Timoteo 3:1-3).

 Akʼo mi oy ep krixchanoetik ti oy kʼusitik tspasik sventa lekuk spas mantal li ajvaliletike, pe vokol tajek sventa lekuk spas li yabtelike. Yuʼun oy ep buchʼutik ti jelel kʼusi tsnopike, ti mu x-ochik ta rasone, mu skʼan jmoj x-abtejik sventa xchapanik li vokolile. Skotol taje jech xa onoʼox yaloj li Vivliae.

•    «Li krixchanoetike yakʼojbe sba svokol stukik» (Eklesiastes 8:9).

 Akʼo mi jech, li Vivliae chal ti oy xchapanobile, yuʼun oy jun ajvalil vaʼanbil ti jaʼ tslajesbe skʼoplal skotol li vokoliletik tsnuptan li krixchanoetike.

 Li Vivliae chalbe skʼoplal jun jnitvanej ti stuk xa noʼox jeche, yuʼun xuʼ yuʼun tslekubtas li jkuxlejaltike. Li jnitvanej taje jaʼ li Jesukristoe, akʼbil yabtel xchiʼuk sjuʼel sventa xichʼ talel jun oʼontonal li ta balumile xchiʼuk ti stsob li krixchanoetike.

•    «Kʼalal jaʼo ch-ajvalilaje, xnichinajik noʼox li buchʼutik tukʼike, ta x-epaj li jun oʼontonale» (Salmo 72:7).

•    «Skotol li mukʼtik lumetike chtunik ta stojolal» (Salmo 72:11).

 Li Jesuse jaʼ noʼox stuk lekil jbeiltasvanej, yuʼun oy ta yoʼonton li buchʼutik chichʼik ilbajinele xchiʼuk tskʼan tskolta.

•    «Yuʼun tspoj li povreetik ti x˗avet tskʼanik koltaele, tspoj xtok li buchʼu bikʼit yakʼoj sbae xchiʼuk li buchʼu muʼyuk jkoltavanej yuʼune. Chkʼuxubaj ta yoʼonton li buchʼutik bikʼit yakʼoj sbaike xchiʼuk li buchʼutik abol sbaike, jech xtok, chchabibe xkuxlejal li buchʼutik abol sbaike. Chpojatik kʼalal chichʼik ilbajinele xchiʼuk kʼalal tstsakatik ta kʼope» (Salmo 72:12-14).

 Nabo mas skʼoplal li Ajvalilal yuʼun Dios ti jaʼ te tspas mantal li Jesuse xchiʼuk akʼo venta kʼuxi chatabe sbalil ta akuxlejal li kʼusitik tspas li ajvalilal taje xchiʼuk ti kʼuxi xuʼ xakoltae.

•    Kʼelo li video ¿Kʼusi jaʼ li Ajvalilal yuʼun Diose?

•    Kʼelo li mantal «Li Ajvalilal yuʼun Diose: jaʼ jun ajvalil ti mu xchon sba ta takʼine».