Ta skoj ti chchʼamik takʼin li j˗abteletik yuʼun ajvaliletike, chkil˗o jvokoltik ta spʼejel balumil. a Jech kʼuchaʼal liʼe, kʼalal jaʼo yakal li chamel COVID-19, vinaj ti oy jayvoʼ j˗abteletik ta epal lumetike la stunes stukik li takʼin ti xuʼ ox jaʼ skoltaik˗o li krixchanoetike. Jaʼ yuʼun, epal krixchanoetik laj yil svokolik xchiʼuk chamik ta skoj ti muʼyuk laj yichʼik poxtaele.

 Kʼalal muʼyuk tukʼ kʼusi chichʼ pasele, chopol kʼusi chkʼot ta pasel ta spʼejel balumil. Li David Cameron ti jaʼ toʼox li buchʼu baʼyel jpasmantal ta Reino Unidoe xi laj yale: «Li chonbail ta takʼine xkoʼolaj ta mukʼta na om ti te chukul skotol li lumetike».

 Pe xuʼ jpʼel ta koʼontontik ti ta xlaj skʼoplal ti chchon sbaik ta takʼin li ajvaliletike. ¿Kʼu yuʼun ti jech chkaltike? Jkʼeltik avil kʼusi chal Vivlia ta sventa li kʼusi tspas Diose.

 Xi chal ta jamal Dios li ta Vivliae: «Voʼon Jeovaun, jkʼanoj li kʼusi tukʼe; jpʼajoj li elekʼe xchiʼuk li kʼusi muʼyuk tukʼe» b (Isaias 61:8). Kʼalal oy buchʼu chil svokol ta skoj ti muʼyuk tukʼ kʼusi tspasik li yantike, li Diose yiloj (Proverbios 14:31). Xi chal ta jamale: «Ta skoj ti ilbajinbilik li buchʼutik oy xa onoʼox svokolike, [...] chitots sventa oyuk kʼusi jpas ta stojolalik» (Salmo 12:5).

 ¿Kʼusi tspas li Diose? Ta svaʼan jun ajvalilal ti jaʼ chkʼexolin li ajvaliletik liʼ ta balumile. Jaʼ jun ajvalilal te ta vinajel xchiʼuk ti jaʼ sbi «Ajvalilal yuʼun Diose» (Markos 1:14, 15; Mateo 6:10). Xi chal li Vivliae: «Li Dios te oy ta vinajele tsvaʼan jun ajvalilal ti [...] bikʼitik tslilin xchiʼuk tslajesbe skʼoplal skotol li ajvalilaletik taje, vaʼun stuk xa noʼox te chkom sbatel osil» (Daniel 2:44). Jaʼ jech tslajesbe skʼoplal Dios li chonbail ta takʼine.

 ¿Kʼuxi jnaʼojtik ti muʼyuk chlik xchon sba ta takʼin li Ajvalilal yuʼun Diose? Nopbo skʼoplal liʼe:

1.  1. Li sjuʼele. Li Ajvalilale jaʼ ch˗akʼbat sjuʼel yuʼun li Dios ti skotol xuʼ yuʼune (Apokalipsis 11:15).

    ¿Kʼu yuʼun tsots skʼoplal taje? Sventa spas yabtelik li ajvaliletik liʼ ta balumile, chtun yuʼunik li stakʼin krixchanoetike. Ta skoj taje, jaʼ mas xuʼ xmanvanik˗o ta takʼin, ch˗elkʼajik xchiʼuk chilbajinik˗o yantik. Pe li Ajvalilal yuʼun Diose jaʼ chkoltaat yuʼun li Dios ti skotol xuʼ yuʼune. Jaʼ yuʼun, chakʼbe kʼusitik chtun yuʼun li buchʼutik tsventaine (Salmo 145:16).

2.  2. Li ajvalile. Li Diose jaʼ svaʼanoj ta Ajvalil li Jesukristoe (Daniel 7:13, 14).

    ¿Kʼu yuʼun tsots skʼoplal taje? Akʼo mi lek tajek ch˗ajvalilaj li jun krixchanoe, xuʼ me sok mi jaʼ chchiʼin li buchʼutik chopole (Eklesiastes 7:20). Pe li Jesuse yakʼoj ta ilel ti muʼyuk chchon sba ta takʼine (Mateo 4:8-11). Maʼuk noʼox, yuʼun skotol li kʼusitik tspase jaʼ ta skoj ti skʼanojan xchiʼuk oy ta yoʼonton ta melel li buchʼutik tsventaine (Salmo 72:12-14).

3.  3. Li mantaletike. Li smantaltak Ajvalilal yuʼun Diose tukʼik xchiʼuk chmuyubaj yuʼun li buchʼutik ta xchʼune (Salmo 19:7, 8).

    ¿Kʼu yuʼun tsots skʼoplal taje? Li smantaltak ajvalile toj tsotsik xchiʼuk toj vokol ta aʼibel smelolal. Ta skoj taje, muʼyuk tukʼ k’usi tspasik li ajvaliletike. Pe li smantaltak Diose k’un ta aʼibel smelolal xchiʼuk jaʼ sventa jlekilaltik (Isaias 48:17, 18). Jech noxtok, li mantaletik taje maʼuk no’ox chal li k’usi skʼan spas li krixchanoetike, yuʼun oy k’usi chtijbat˗o yoʼontonik sventa spasike (Mateo 22:37, 39). Li Diose xil li k’usi oy ta koʼontontike xchiʼuk chak’ ta ilel xkʼuxul yoʼonton ta jtojolaltik mi ta jchʼunbetik li smantaltake (Jeremias 17:10).

 Li Vivliae chal ti chlaj skʼoplal li chonbail ta takʼine. Ta jtijkutik avoʼonton ti xakʼele.

•   Kʼelo li mantal ti xi sbie: «Li Ajvalilal yuʼun Diose: jaʼ jun ajvalil ti mu xchon sba ta takʼine», te chalbe oxib srasonaltak ti tukʼ˗o kʼusitik tspas li Ajvalilal yuʼun Diose.

•   Sventa xanabe mas skʼoplal li Ajvalilal yuʼun Dios xchiʼuk li kʼusi tspase, kʼelo li video ti xi sbie: ¿Kʼusi jaʼ li Ajvalilal yuʼun Diose?

•   Kʼelo kʼuxi chkakʼkutik chanubtasel ta Vivlia xchiʼuk akʼo venta kʼuxi xuʼ skoltaot li kʼusi yaloj Vivliae.