¿Mi chlaj skʼoplal li terrorismoe?
Kʼalal chlik jun terrorismoe xuʼ van xi xlik jakʼbe jbatike, ¿mi oy ta yoʼonton Dios li kʼusi chkʼot ta pasele? ¿Kʼu yuʼun ti jech tspasike? ¿Mi chkʼot van skʼakʼalil chlaj li terrorismoe? a ¿Kʼusi xuʼ jpas sventa junuk noʼox koʼonton? Li Vivliae tstakʼbutik li sjakʼobiltak taje.
¿Kʼu yelan chil Dios li terrorismoe?
Li Diose spʼajoj li saʼkʼope xchiʼuk li terrorismoe (Salmo 11:5; Proverbios 6:16, 17). Li Jesus, ti jaʼ Xnichʼon Diose, la stukʼibtas li yajchankʼoptak kʼalal tsaʼik xa’ox kʼope (Mateo 26:50-52). Jlom krixchanoetike ta saʼik kʼop xchiʼuk chmilvanik, yuʼun chalik ti jaʼ la jech oy ta yoʼonton Diose. Pe li Diose muʼyuk lek chil li kʼusi tspasike. Maʼuk noʼox, yuʼun mi jaʼuk chchikintabe li s-orasionike (Isaias 1:15).
Oy ta yoʼonton skotol li buchʼutik chil svokolike ti te tsakal skʼoplal xchiʼuk li buchʼutik yiloj svokolik ta skoj terrorismoe (Salmo 31:7; 1 Pedro 5:7). Jech xtok, li Vivliae chal ti tslajesbe skʼoplal Dios li buchʼutik tsaʼik kʼope (Isaias 60:18).
¿Kʼu yuʼun ti jech tspasike?
Li Vivliae chalbe skʼoplal kʼu yuʼun ti jech tslikesik li terrorismoe: «Li krixchanoetike yakʼojbe sba svokol stukik» (Eklesiastes 8:9). Ta voʼne xa onoʼox li krixchanoetik ti tsots yabtelike ta sibtasik yantik sventa xilbajinik. Jech oxal, junantik li buchʼutik chichʼik ilbajinele tslikesik li terrorismoe (Eklesiastes 7:7).
Chlaj li terrorismoe
Li Diose jamal yaloj ti tslajesbe skʼoplal li buchʼutik tsaʼik kʼope xchiʼuk ti chakʼ jun oʼontonal liʼ ta balumile (Isaias 32:18; Mikeas 4:3, 4). Liʼe jaʼ li kʼusitik tspas Diose:
Tslajesbe skʼoplal ta j-echʼel li terrorismoe. Li Diose tslajesbe skʼoplal li ajvaliletik ta balumile xchiʼuk jaʼ chlik ajvalilajuk li Ajvalilal yuʼune. Li Jesukristo, ti jaʼ vaʼanbil ta ajvalile, tukʼ kʼu yelan tspas mantal xchiʼuk tslajesbe skʼoplal li ilbajinele xchiʼuk li buchʼutik tsaʼik kʼope (Salmo 72:2, 14). Kʼalal jech xa’ox kʼotem ta pasele muʼyuk xa buchʼu tslikes li terrorismoe, skotol li krixchanoetike «tskʼupinik tajek li jun oʼontonal ti muʼyuk spajebe» (Salmo 37:10, 11).
Tslajesbe skʼoplal li vokolil chakʼ li terrorismoe. Li Diose chpoxta li buchʼutik yiloj svokolik ta skoj terrorismoe (Isaias 65:17; Apokalipsis 21:3, 4). Maʼuk noʼox taje, li Diose jamal yaloj ti chchaʼkuxes li buchʼutik chamemik ta skoj li terrorismoe xchiʼuk te chnakiik ta jun balumil ti bu oy jun oʼontonale (Juan 5:28, 29).
Li Vivliae chalbe skʼoplal kʼu yuʼun xuʼ jchʼuntik ti poʼot xa spas Dios skotol taje. Pe xuʼ van chajakʼbe aba, ¿kʼu yuʼun muʼyuk to slajesojbe skʼoplal Dios li terrorismoe? Mi chakʼan chanabe li stakʼobile kʼelo li video ¿Kʼu yuʼun yakʼoj to oyuk vokolil li Diose?
a Kʼalal chichʼ albel skʼoplal terrorismoe jaʼ van skʼan xal kʼalal oy buchʼu tstsakvanik ta kʼop o tsibtasik li jnaklejetik ta junuk jteklume. Ti jech tspasike jaʼ ta skoj ti tskʼanik ti chjel ti kʼu yelan tspas mantal li ajvaliletike, li kʼusitik sventa relijione o ti kʼu yelan li kuxlejale. Pe kʼalal oy jech chkʼot ta pasele jelel kʼusi tsnop junantik krixchanoetik, jlome xuʼ van chalik ti jaʼ terrorismoe, jlome xuʼ van chalik ti maʼuke.