¡CHAPALUKUTIK˗O!
Li kʼusi spasojik talel li relijionetik ta sventa li paskʼop ta Ucraniae | ¿Kʼusi chal li Vivliae?
Kʼelo li kʼusi laj yal li jnitvanejetik ta relijion ta sventa li paskʼop ta Ucraniae:
«Li bankilal yuʼunik li Relijion ortodoxa ta Rusia ti jaʼ sbi Kirill muʼyuk kʼusi yaloj ti yakal tstsakvan ta kʼop li Rusiae [...]. Li kampaña slikesoj Kirill sventa chopol kʼusi xal ta stojolal Ucraniae jaʼ tspak˗o skʼoplal Putin sventa stsak ta kʼop li Ucraniae» (EUobserver, 7 yuʼun marso ta 2022).
«Li Kirille [...] laj yal ti xkoʼolaj ti chichʼ tsakel ta kʼop mulil ti jech yakal chichʼ tsakel ta kʼop li Ucraniae. Li kʼusi laj yale jaʼ tstijbe˗o yoʼonton slumal sventa stsakik ta kʼop li Ucraniae» (AP News, 8 yuʼun marso ta 2022).
«Li Epifanio I ta Kiev ti jaʼ jnitvanej li ta Relijion ortodoxa ta Ucraniae la stsʼuʼiltas steklumal li ta lunese xchiʼuk la stijbe yoʼontonik sventa stsakik ta kʼop li Rusiae. Jech xtok, laj yal ti maʼuk mulil mi tsmilik li soltaroetik ta Rusiae» (The Jerusalem Post, 16 yuʼun marso ta 2022.
«Ta jkoltakutik li soltaroetik ta Ucraniae xchiʼuk skotol li buchʼutik tspak jkʼoplalkutike. Ta jtsʼuʼiltaskutik ti chakʼik persa xchabiel li krixchanoetik ta Ucraniae xchiʼuk ta jpaskutik orasion ta stojolalik» (Jaʼ jech laj yal li Consejo de Iglesias y Organizaciones Religiosas ta Ucraniae, a 24 yuʼun fevrero ta 2022).
¿Kʼusi chanop? ¿Mi lek van ti tstijbe yoʼonton krixchanoetik ta paskʼop li relijionetik ti xchʼunojik Kristo ta alele? ¿Kʼusi chal li Vivliae?
Li relijion xchiʼuk li paskʼope
Ti kʼu sjalil echʼem tale, epal relijionetik ti yalojik ti chakʼik jun oʼontonale muʼyuk chopol chilik li paskʼope xchiʼuk chalik ti persa la skʼan spasike. Voʼne xa onoʼox yakʼojik ta naʼel li stestigotak Jeova ti muʼyuk lek ti jech tspas li relijionetik taje. Xi chal junantik vunetik ti slokʼesojike.
Li mantal ti jaʼ sbi: «Las cruzadas: ‘trágica ilusiónʼ» te laj yal ti koltavan ta smilel epal krixchanoetik ta sbi Dios xchiʼuk ta sbi Kristo li Relijion katolika romanae.
Li mantal ti jaʼ sbi: «La Iglesia Católica y África» chal ti muʼyuk paj yuʼunik paskʼop xchiʼuk milbail ta slumalik li Relijion katolikae.
Li mantaletik ti jaʼ sbi: «¿Tiene la culpa la religión?», «El papel de la religión en las guerras» xchiʼuk «La religión toma partido» chal ti skoltaoj sbaik ta paskʼop li jnitvanejetik ta Relijion katolika, li ortodoxa xchiʼuk li Relijion protestante kʼalal chlik kʼop ta slumalike.
¿Mi stakʼ stikʼ sbaik ta paskʼop li relijionetike?
Li kʼusi laj yal Jesuse: «Skʼan me xakʼan achiʼil jech kʼuchaʼal akʼanoj aba atuke» (Mateo 22:39). «Kʼanik˗o me li avajkontratakike» (Mateo 5:44-47).
Nopbo skʼoplal liʼe: Mi oy junuk relijion ti yakal chchʼun li mantal laj yal komel Jesus ti skʼan jkʼantik li yantike, ¿mi lek ti tstijbe yoʼonton ti akʼo xbatik ta paskʼop li buchʼutik te chaʼiik mantale? Mi chakʼan chanaʼe, kʼelo li mantaletik ti xi sbie: «Los cristianos verdaderos y la guerra» xchiʼuk «¿Es posible amar a un enemigo?».
Li kʼusi laj yal Jesuse: «Maʼuk sventa balumil li Ajvalilal kuʼune. Ti jaʼuk sventa balumile, la spasik kʼop jechuk li kajtuneltak sventa muʼyuk xkichʼ akʼel [jechuke]» (Juan 18:36). «Skotol li buchʼu chakʼ espadae, ta espada chlaj ek» (Mateo 26:47-52).
Nopbo skʼoplal liʼe: Mi albatik yuʼun Jesus li jchankʼopetik ti akʼo mu spasik kʼop sventa spojike, ¿mi lek van ti yan˗o kʼusi spasik˗o kʼope? Sventa xanabe skʼoplal li baʼyel yajtsʼaklomtak Kristo ti la xchanbeik stalelal Jesus xchiʼuk ti jaʼ jech chanubtasvanik kʼuchaʼal Jesuse, kʼelo li mantal ti xi sbie: «El cristianismo y la guerra: ¿son compatibles?».
¿Kʼusi chkʼot ta stojolal li relijionetik ti tstikʼ sbaik ta paskʼope?
Li Vivliae chal ti chopol chil Dios li relijionetik ti chalik ti yakal chchʼunik li kʼusi laj yakʼ ta chanel Jesuse, pe ti ta melele mu jechuk tspasik (Mateo 7:21-23; Tito 1:16).
Mi chakʼan chanaʼ kʼu yuʼune, kʼelo li mantal ti xi sbie: «¿Qué es Babilonia la Grande?».
Li Jesuse laj yal ti Diose tslajesbe skʼoplal li relijionetik ta skoj li kʼusi chopol spasojike, jech kʼu chaʼal jpets chopol teʼ ti chopol chakʼ sat ti «chichʼ tsʼetel xchiʼuk chichʼ jipel ochel ta [kʼokʼe]» (Mateo 7:15-20). Mi chakʼan chanaʼ kʼuxi chkʼot ta pasel taje, kʼelo li mantal ti xi sbie: «Chnopaj xa slajeb li jecheʼ relijione».
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Li organisasion taje te tsakal skʼoplal 15 relijionetik, te skʼoplal li Relijion ortodoxa, li Relijion katolika romana, li Relijion katolika griega, protestanteetik, evanjeliko, judioetik xchiʼuk jmusulmanetik.